"ԺԱՌԱՆԳՈՒԹՅՈՒՆԸ" Զ. ՓՈՍՏԱՆՋՅԱՆԻ ԴԵՄ ՈՐՊԵՍ ԾԱՆՐ ՀՐԵՏԱՆԻ ՕԳՏԱԳՈՐԾՈՒՄ Է Ն. ԶՈՀՐԱԲՅԱՆԻՆ

"ԺԱՌԱՆԳՈՒԹՅՈՒՆԸ" Զ. ՓՈՍՏԱՆՋՅԱՆԻ ԴԵՄ ՈՐՊԵՍ ԾԱՆՐ ՀՐԵՏԱՆԻ

ՕԳՏԱԳՈՐԾՈՒՄ Է Ն. ԶՈՀՐԱԲՅԱՆԻՆ

Արի ու տես, որ "Ժառանգությունն" այլեւս ի զորու չէ ԱԺ "Ժառանգություն" խմբակցության պատգամավոր Զարուհի Փոստանջյանին համոզել, որ կուսակցության առվով հոսի: Այլ ճիշտ հակառակը` Զ. Փոստանջյանն օր օրի էլ ավելի "պայթյունավտանգ" է դառնում: Հենց ինքն է շտապում քարկոծել իր իսկ խմբակցության ու կուսակցության վարած քաղաքականությունն ու ամոթով թողնում հարազատ խմբակցությանն ու կուսակցության առաջնորդ Րաֆֆի Հովհաննիսյանին: Սակայն "Ժառանգության" տղամարդիկ այստեղ անզոր են, եւ թերեւս դա է պատճառը, որ օգնություն են խնդրել ԱԺ ԲՀԿ խմբակցության քարտուղար, ոչ պակաս "պայթյունավտանգ" Նաիրա Զոհրաբյանից: Դա է փաստում այն, որ երեկ լրագրողների հետ զրույցում Ն. Զոհրաբյանն անդրադառնալով Զ. Փոստանջյանի` վերջին հարցազրույցների ժամանակ արված հայտարարություններին` նշել է, թե "Ժառանգության" գործընկերներն իրենց հորդորել են հիմք ընդունել միայն "Ժառանգության" նախագահի ու փոխնախագահի, մամլո խոսնակի, ինչպես նաեւ խմբակցության ղեկավարի հայտարարությունները, մյուս անդամների հայտարարություններն իրենց համար հիմք չեն, եւ այդ պատճառով էլ չեն մեկնաբանում: Այս հայտարարությանն անդրադարձել է նաեւ քաղաքագետ ՍՈՒՐԵՆ ՍՈՒՐԵՆՅԱՆՑԸ` ուշագրավ փաստ հիշեցնելով. "Ծանոթ ձեռագիր է. ժամանակին էլ, Լեւոն Զուրաբյանն էր Վարդան Օսկանյանին ասել, որ ՀԱԿ-ում "գծից" շեղվողներ կան, որոնց ասածը, սակայն, պետք չէ բանի տեղ դնել": Ինչեւէ, այսպես որ շարունակվի, Զ. Փոստանջյանը, ով հրաժարվում է անցնել ԲՀԿ-ական սրի տակով, ստիպված կլինի համալրել "Ժառանգություն" խմբակցությունը վաղուց լքած նոր ՀՀՇ-ական Ալեքսանդր Արզումանյանի եւ "Ազատ դեմոկրատներ" կուսակցության նախագահ Խաչատուր Քոքոբելյանի շարքերը:

ՀՐԱՆՏ ՍԱՐԱՖՅԱՆ