ՈՒՍԱՆԵԼԻ ԴԱՍ

Ոգեկոչում

ՈՒՍԱՆԵԼԻ ԴԱՍ

Այսօր հայ մամուլի առաջնեկը` "Ազդարարը" 220 տարեկան է: Այդ առթիվ իրենց դասը մամուլի շենքի առջեւ տեղադրված Հարություն քահանա Շմավոնյանի կիսանդրու առջեւ անցկացրին Երեւանի Խ. Աբովյանի անվան պետական մանկավարժական համալսարանի կուլտուրայի ֆակուլտետի հեռուստալրագրության բաժնի 2-րդ կուրսի ուսանողները:
Օրվա բանախոսները` բանասիրական գիտությունների դոկտոր, պրոֆեսոր Սերգո Երիցյանն էր եւ Դերենիկ Մովսիսյանը: Նրանք ներկայացրին "Ազդարարի" եւ հայ մամուլի հիմնադրման պատմությունը, էջեր ներկայացրին հնդկահայ գաղութի կյանքից:
"Ուրախ եմ, որ Երեւանում, մամուլի շենքի առջեւ կա այս գողտրիկ անկյունը,- ասում է Սերգո Երիցյանը:- Այն ապագա լրագրողների համար կարող է դառնալ մասնագիտական երդման վայր: Շատ ուրախ եմ, որ այս ուսանելի դասը հենց այստեղ է":
"Կյանքում առանց զուգադիպությունների չի լինում: Ուղիղ 10 տարի առաջ այն ժամանակվա ՀՀ կրթության եւ գիտության նախարար Սերգո Երիցյանի ջանքերով այստեղ տեղադրվեց Լեւոն Թոքմաջյանի հեղինակած Հարություն քահանա Շմավոնյանի արձանը,- իր խոսքն ուսանողներին ուղղեց Դերենիկ Մովսիսյանը:- Այդ օրն ուսանողներին դիպլոմներ հանձնեցին հենց այստեղ: Արարողությանը ներկա էր հնդկահայ գաղութի ղեկավար Սոնա Ջոնը: Տպավորիչ էին բոլորի ելույթները: Իսկապես, ըստ արժանվույն գնահատվեց "Ազդարարը" եւ նրա հիմնադիրը` Հարություն քահանա Շմավոնյանը":
Այնուհետեւ Սերգո Երիցյանը պատմեց, թե ինչ ջանքեր ներդրվեցին, որ 2004 թվականին, Հարություն քահանա Շմավոնյանի արձանը տեղադրվի նաեւ Կալկաթայի Հայոց Մայր եկեղեցու բակում եւ նշվի "Ազդարարի" 210-ամյակը:
Ուսանողները, մինչ այս ինքնատիպ դասին ներկա գտնվելը, գրականություն էին կարդացել, ոմանք հասցրել էին թերթել "Ազդարարի" էջերը:
""Ազդարարը" մեր մամուլի մեծ սկիզբն է, որին պետք է միշտ հավատարիմ լինել,- ասաց ուսանողուհի Մարիամ Հակոբյանը":
Իսկ Մերի Աղաջանյանն ավելացրեց, որ Հարություն քահանա Շմավոնյանը, իսկապես, սխրանք է գործել` հեռավոր Հնդկաստանի Մադրաս քաղաքում սկզբնավորելով հայկական մամուլը, այն դեպքում, երբ շատ ազգեր այդ մասին անգամ չէին մտածում:
""Ազդարարը" եւ այն ստեղծողը մեզ համար պետք է սրբության սրբոց լինեն եւ մենք միշտ պատկառանքով հիշենք 1794 թվականը,- շարունակում է ուսանողուհի Քրիստինե Նանյանը":
Դասն ավարտվում է: Ուսանողները ծաղիկներ են խոնարհում հուշարձանին ու մտածում շա՞տ, թե քի՞չ է 220 տարեկանը:

Կարինե Տիտանյան