ՀՀ ԱԺ նախագահ Գալուստ Սահակյանը շնորհավորական ուղերձ է հղել Հայ մամուլի օրվա առթիվ

ՀՀ ԱԺ նախագահ Գալուստ Սահակյանը շնորհավորական ուղերձ է հղել Հայ մամուլի օրվա առթիվ

«Լրատվամիջոցների հարգելի ներկայացուցիչներ, շնորհավորում եմ ձեզ Հայ մամուլի օրվա առթիվ:

Խորհրդանշական է, որ այս տարի Հայ մամուլի օրը համընկնում է հայ առաջին պարբերականի` «Ազդարարի» հիմնադրման 220-ամյակի հետ, ինչը ենթադրում է լավագույն ավանդույթների շարունակում, սակայն, միաժամանակ, նշանակում է ժամանակի մշտարթուն զգացողություն եւ այդ զգացողության ճշմարտացի վավերագրում այսօրվա ու վաղվա սերունդների, պատմության համար: Բնական է, որ ի տարբերություն «Ազդարարի» ժամանակների՝ մամուլն այսօր ոչ միայն մարդկանց լուսավորելու միջոց է, այլեւ նրանց առաջնորդող, գաղափարներ մատուցող եւ դրանք իրականացնող`  ձեւավորելով եւ տեղեկատվական տարածք, եւ աշխարհայացք, եւ, իհարկե, հասարակական կարծիք:

ԶԼՄ-ները երբեք անտարբեր տարեգիրներ չեն եղել` մշտապես գտնվելով իրադարձությունների կենտրոնում, լավագույնս զգալով հասարակական տրամադրությունները, արձանագրելով, արտահայտելով եւ գնահատելով դրանք: Այսօր անկասելի արագությամբ, երբեմն առարկություն չհանդուրժող ոճով մեր կյանք ներխուժող երեւույթներն ու գործընթացները զանգվածային լրատվամիջոցներին ավելի բարդ ու նոր, սակայն դրանց հետ մեկտեղ` նաեւ բոլոր ժամանակներում առկա խնդիրներ են առաջադրում: ԶԼՄ-ի ու լրագրողի վարպետությունից, պարկեշտությունից ու պատասխանատվության զգացումից է մեծապես կախված, թե ինչպես հասարակությունը կարձագանքի դրանց, ինչպիսի լուծումներ կառաջարկի ու կակնկալի պետությունից ու հենց ինքն իրենից: Մյուս կողմից, մամուլի ու լրատվամիջոցների գործունեության համար պետության ստեղծած միջավայրով ու մթնոլորտով են պայմանավորված հենց իր` պետության եւ հասարակության զարգացումն ու ապագան: Հայաստանյան լրատվական դաշտն այսօր աչքի է ընկնում հասարակական տրամադրությունների հանդեպ ակտիվ ու աչալուրջ վերաբերմունքով, հասարակության շահերից բխող հարցեր բարձրացնելու եւ դրանց պատասխանները գտնելու բնական ձգտումով` ողջամտորեն օգտագործելով խոսքի ազատության ու տարաբեւեռ կարծիքների արտահայտման բարենպաստ միջավայրի լայն հնարավորությունները, առաջարկելով ազատ քննարկումների ու վերլուծությունների ընդարձակ տարածք:

Եւս մեկ անգամ շնորհավորելով մասնագիտական տոնի առթիվ` մաղթում եմ ստեղծագործական եռանդ եւ նոր մտահղացումներ, լավատեսություն եւ բարեկեցություն: Թող որ ԶԼՄ-ների ներկայիս քանակական բազմազանության մեջ մշտապես գերակայող լինեն մասնագիտական ու բարոյական բարձր նորմերը, արժանապատվությունն ու հավատարմությունը ճշմարիտ խոսքին»: