"ԱՅՍ ՄԻՏԻՆԳԱՅԻՆ "ԿԱՄՊԱՆԻԱՆԵՐԸ", Ի ՎԵՐՋՈ, ԱՆՀԱՋՈՂՈՒԹՅԱՆ ԵՆ ՄԱՏՆՎԵԼՈՒ"

"ԱՅՍ ՄԻՏԻՆԳԱՅԻՆ "ԿԱՄՊԱՆԻԱՆԵՐԸ",
Ի ՎԵՐՋՈ, ԱՆՀԱՋՈՂՈՒԹՅԱՆ ԵՆ ՄԱՏՆՎԵԼՈՒ"

Այդպես էլ չկայացած թեժ քաղաքական աշունը կամաց-կամաց իր տեղը զիջում է ձմռանը, ու սա ոչ թե պայմանավորված է եղանակով, այլ` քաղաքական գործընթացներով: Այլեւս իրականություն է Հայաստանի` Եվրասիական միության անդամ լինելը, իսկ ոչ իշխանական "եռյակը" մի կերպ իր իսկ կողմից խոստացած հանրահավաքի տակից է դուրս գալիս: Վերջին քաղաքական իրադարձությունների մասին էլ ծավալվեց "Իրավունքի" զրույցը ԱԺ ՀՀԿ խմբակցության պատգամավոր, ԱԺ արտաքին հարաբերությունների մշտական հանձնաժողովի անդամ ՀԱՄԼԵՏ ՀԱՐՈՒԹՅՈՒՆՅԱՆԻ հետ:

"ՐԱՖՖԻՆ ՄԵԿ-ՄԵԿ ԷԴՊԻՍԻ ՃԻՇՏ ԲԱՆԵՐ ԷԼ Է ԱՍՈՒՄ"

-Պարոն Հարությունյան, մոտ ապագայում Հայաստանի` ԵՏՄ անդամակցման հարցը կդրվի Ազգային ժողովի քվեարկությանը: Ըստ Ձեզ, ինչպիսի՞ն կլինի օպոզիցիայի դիրքորոշումը:
- Օպոզիցիայի վերաբերմունքը, կարծում եմ, որ Լեւոն Տեր-Պետրոսյանն է նշել: Այս վերջին հանրահավաքի ժամանակ նա ասաց, թե ողջունում է, որ Հայաստանը մտավ Եվրասիական տնտեսական միության մեջ: Կարծում եմ` կարող է միասնական չքվեարկեն, բայց օպոզիցիայից կլինեն մարդիկ, որ կողմ կքվեարկեն:
- Ըստ Էության, նույն հանրահավաքի ժամանակ միայն "Ժառանգություն" կուսակցության նախագահ Րաֆֆի Հովհաննիսյանը դեմ խոսեց ԵՏՄ-ի մասին: Արդյո՞ք սա նրա անձնական տեսակետն էր, թե "եռյակը" որոշ տողատակերով համամիտ է նրա հետ:
- Արդեն ասացի, որ Լեւոն Տեր-Պետրոսյանը դրական խոսեց այդ մասին, իսկ դա ընդամենը Րաֆֆի Հովհաննիսյանի կամ իր կուսակցության դիրքորոշումն է եղել: Այնպես որ, "եռյակում" այդ հարցի վերաբերյալ ակնհայտ է, որ միասնական դիրքորոշում չկա:
- Եվ ընդհանրապես, ինչպես օրերս Ր. Հովհաննիսյանն է մամուլում անկեղծացել, "եռյակը" միասնական օրակարգ չունի:
- Գիտեք, Րաֆֆին մեկ-մեկ էդպիսի ճիշտ բաներ էլ է ասում:

"ԵՌՅԱԿԸ ՆՈՒՅՆ ՀԱՐՑԻ ՎԵՐԱԲԵՐՅԱԼ ՏԱՐԲԵՐ
ԿԱՐԾԻՔՆԵՐ Է ԱՐՏԱՀԱՅՏՈՒՄ"

-Իսկ կկարողանա՞ "եռյակը" հոկտեմբերի 24-ին էլ իր երեք ուժերը միավորվել եւ հանրահավաք անցկացնել:
- Չի բացառվում, որ "եռյակը" համաձայնության կգա եւ կկարողանա ամսի 24-ին նորից հանրահավաք անել: Բայց իմ խորին համոզմամբ, իրենք էլ, կարծում եմ, համոզված են, որ այս միտինգային "կամպանիաները", ի վերջո, անհաջողության են մատնվելու:
- Ի դեպ, քանի որ խոսեցիք անհաջողության մասին, նշենք, որ մամուլը հանրահավաքից հետո բազմիցս անդրադարձել է, թե ինչպիսի նվաստացած վիճակում էր գտնվում "Ժառանգության" առաջնորդը ԲՀԿ եւ ՀԱԿԿ առաջնորդների կողքին...
- Ճիշտն ասած, չեմ տեսել իր նվաստացած վիճակը, բայց որ գրում են, ուրեմն` իրենք տեսել են:
- Այնուամենայնիվ, կարո՞ղ ենք ասել, որ այսօր "եռյակում" կան ավագ եւ կրտսեր ներկայացուցիչներ:
- Օբյեկտիվորեն այդպես է, որովհետեւ նայած ինչ կուսակցություն ինչպիսի հզորությամբ է հանդես գալիս: Պարզ է, որ տարբերություն կլինեն:

"ԶԱՐՈՒՀԻՆ ԱՆԼՈՒՐՋ ԲԱՆԵՐ Է ԱՌԱՋԱՐԿՈՒՄ"

-Անդրադառնանք նաեւ կուսակցություններին` ՀԱԿԿ առաջնորդ Լեւոն Տեր-Պետրոսյանը հանրահավաքի ժամանակ իր ելույթում ասաց, թե իրենք շարունակում են մնալ որպես հրաշալի "քառյակ"` նկատի ունենալով հենց ՀԱԿԿ-ի մաս կազմող ՀԺԿ-ին: Ըստ Ձեզ, "քառյակը" կշարունակի՞ մանրանալ ու ավելի շատանալ:
- Չեմ կարող այդպես ասել, բայց կարող է եւ քչանան ու հակառակ գործընթացն էլ լինի: Այսինքն` երկուսն էլ հավասարազոր կարելի է մտածել. կարող է ե՛ւ ավելանան այդ կուսակցությունները, կարող է ե՛ւ կրճատվեն: Այստեղ կուսակցությունների թվով չէ պայմանավորված հաջողությունը, որ կարեւորենք շատ լինի կամ քիչ լինի: Կարծում եմ` ամենակարեւորը ընդդիմության օրակարգի ձեւավորումն է, որը դժբախտաբար չի ձեւավորվում եւ, կարծես թե, նույն հարցի վերաբերյալ տարբեր կարծիքներ են արտահայտում:
- Իսկ "եռյակը" կընդունի՞ ԱԺ "Ժառանգություն" խմբակցության պատգամավոր Զարուհի Փոստանջյանի առաջարկը, թե պետք է քրեական պատասխանատվության ենթարկել ՀՀ երկրորդ նախագահ Ռոբերտ Քոչարյանին եւ գործող նախագահին:
- "Եռյակն" ինչպե՞ս կարող է գնալ այդ քայլին, եթե Զարուհի Փոատանջյանը, ինչպես դուք եք ասում, պահանջում է նաեւ Քոչարյանին պատասխանատվության ենթարկել: Չեմ կարող ասել, որովհետեւ Զարուհին անլուրջ բաներ է առաջարկում: Եվ ընդհանրապես, նման հայտարարություններ չի՛ կարելի անել: Ես լուրջ չեմ վերաբերվում այդ կնոջը:

ՀՐԱՆՏ ՍԱՐԱՖՅԱՆ