ՎԱԶԳԵՆ ԲԱԴԱԼՅԱՆ. ՙՀՆԱՐԱՎՈՐՈՒԹՅՈՒՆ ԵՆՔ ՏՎԵԼ ԵՐԿՐՈՐԴ ՀԱՄԱՐՆԵՐԻՆ՚

ՎԱԶԳԵՆ ԲԱԴԱԼՅԱՆ. ՙՀՆԱՐԱՎՈՐՈՒԹՅՈՒՆ ԵՆՔ ՏՎԵԼ ԵՐԿՐՈՐԴ ՀԱՄԱՐՆԵՐԻՆ՚

Բռնցքամարտի Հայաստանի երիտասարդական հավաքականը` մարզիչ Վազգեն  Բադալյանի գլխավորությամբ, պատրաստվում է Եվրոպայի առաջնությանը, որը կանցկացվի հոկտեմբերի 17-ից 26-ը Խորվաթիայի Զագրեբ քաղաքում: Սեպտեմբերի 27-ից Ծաղկաձորում թիմը անցկացրել է ուսումնամարզական հավաք, որին մասնակցել է 13 բռնցքամարտիկ: Թիմի մարզավիճակի եւ Եվրոպայի առաջնությունից ունեցած սպասելիքների մասին ՙԻրավունքի՚ հետ խոսեց Հայաստանի բռնցքամարտի երիտասարդական հավաքականի գլխավոր մարզիչ ՎԱԶԳԵՆ ԲԱԴԱԼՅԱՆԸ:
-Ի՞նչ մարզավիճակում է թիմը` Ծաղկաձորի ուսումնամարզական հավաքից հետո:
- Ծաղկաձորում մենք հիմնականում անցկացնում ենք ֆիզիկական պատրաստությունը բարելավող հավաքներ, քանի որ ֆիզիկապես լավ պատրաստ լինելուց հետո, տեխնիկատակտիկականը հեշտ է տրվում, մարզիկները կարողանում են բոլոր հանձնարարություները ավելի լավ կատարել: Ուսումնամարզական հավաքը լավ է անցել, ֆեդերացիան բոլոր պայմանները ստեղծում է, որ կարողանանք պատշաճ անցկացնել բոլոր հավաքները:

Ինձ հետ աշխատում է թիմի երկրորդ մարզիչ Հարություն Նազարյանը, ում հետ փորձում ենք հնարավորինս արդյունավետ անցկացնել հավաքները: Տղաները լավ մարզավիճակում են, Ծաղկաձորի հավաքն իր արդյունքները տվել է: Այս անգամ որոշեցինք, նույն քաշային կարգում հանդես եկող երկու մարզիկներից ընտրել երկրորդ համարներին, եթե մարզիկներն իրար հավասար են: Կան մարզիկներ, որ երիտասարդների աշխարհի առաջնությանը չեն մասնակցել, քանի որ պատրաստ չէին այդ տեսակ խոշոր մրցաշարի, բայց այս առաջնությանը կմասնակցեն, թեեւ ասեմ, որ այդ տղաները պատանիների աշխարհի առաջնությունների փորձ ունեն: Փաստորեն, 49 կգ, 56 կգ, 64 կգ, 69 կգ, 75 կգ եւ գերծանրքաշային կարգերում մասնակցելու են երկրորդ համարները: Իսկ մեր օլիմպիական խաղերի բրոնզե մեդալակիր Նարեկ Մանասյանին որոշել ենք հանգիստ տալ. նա բավականին բարդ մրցումների է մասնակցել: Այնպես որª Նարեկը կհանգստանա, այդ քաշային կարգում ներկայացուցիչ չենք ունենա:
- Փաստորեն, կարելի է ասել, որ Եվրոպայի առաջնությանը Հայաստանը կմասնակցի անփորձ թիմով:
- Դե՝ այո, կարելի է այդպես ասել: Հիմա մեր խնդիրը չեմպիոն ունենալը չէ, ավելի շատ ուզում ենք հնարավորություն տալ մարզիկներինª դրսեւորվել խոշոր մրցաշարերում: Լինում է ինչ-որ քաշային կարգում նույն մարզիկը մի քանի տարի մասնակցում է բոլոր մրցաշարերին, իսկ այդ քաշային կարգի երկրորդ համարը այդպես էլ երկրորդն է մնում եւ, փաստորեն, աճ ստանալու հնարավորություն չի ունենում: Այս փոփոխությունները ինքնանպատակ չեն, ուզում ենք պատրաստել լավ բռնցքամարտիկներ, որոնք հետագայում կհամալրեն մեծահասակների թիմը: Պետք է շատ մարզիկների հանարավորություն տանք` մեծ մրցաշարերի մասնակցելու: Եթե որեւէ քաշային կարգի առաջին եւ երկրորդ համարները հավասար մարզիկներ են, ուրեմն` երկուսն էլ հավասար հնարավորություններ պետք է ստանան:
- Ի՞նչ սպասելիքներ կան առաջնությունից:
- Գիտեք, չեմ կարող ասել, թե ոսկե մեդալի սպասելիքներ ունեմ: Բայց մեդալների ակնկալիքներ կան իհարկե: Որեւէ մեկի անունը նշել չեմ կարող, դա սխալ եմ համարում. սա սպորտ է, ամեն բան պատահում է, կանխատեսել հնարավոր չէ: Շատ ուժեղ թիմերն են մասնակցելու առաջնությանը. նույն Ռուսաստանի, Ուկրանիայի, Խորվաթիայի թիմերը, Ադրբեջանն էլ է լավ թիմ բերում... Գիտեք, հետո վիճակահանությունն էլ մի քիչ բարի պետք է լինի, ինչը ոչ միշտ է լինում... Ինչեւէ, տղաները պատրաստ են, հուսանք` ամեն բան լավ կլինի:

ՔՐԻՍՏԻՆԵ ՊԵՏՐՈՍՅԱՆ