ՙՆՈՒԲԱՐԱՇԵՆՈՒՄ ԻՐ ՀԱՄԱՐ ՀԱՆԳԻՍՏ ՆՍՏԱԾ Է. ԼՈՒՅՍԸ ՁՐԻ, ԳԱԶԸ ՁՐԻ, ԲՆԱԿՎԱՐՁ ԷԼ ՉԻ ՄՈՒԾՈՒՄ՚

ՙՆՈՒԲԱՐԱՇԵՆՈՒՄ ԻՐ ՀԱՄԱՐ ՀԱՆԳԻՍՏ ՆՍՏԱԾ Է.
ԼՈՒՅՍԸ ՁՐԻ, ԳԱԶԸ ՁՐԻ, ԲՆԱԿՎԱՐՁ ԷԼ ՉԻ ՄՈՒԾՈՒՄ՚

Ինչպես հայտնի է, օֆշորային սկանդալի գլխավոր դերակատարի եւ սնանկացման եզրին հայտնված գործարար Փայլակ Հայրապետյանի միջեւ տեղի է ունեցել այդքան սպասված առերսումը: Առերսումից հետո գործարարը պնդեց, որ Աշոտ Սուքիասյանը փաստել է, որ իրեն ՙքցել են՚ նախկին վարչապետը եւ սրբազանը: Սակայն, մեզ հետ զրույցում ադամանդագործ Աշոտ Սուքիասյանի փաստաբան ՅՈՒՐԻԿ ԽԱՉԱՏՐՅԱՆԸ հերքեց գործարարի վերոնշյալ պնդումները` մասնավորապես ասելով.
ՙՓայլակ Հայրապետյանի` մամուլում հնչեցրած հայտարարությունները, ըստ որի` Աշոտ Սուքիասյանը առերեսման ընթացքում հիշատակել է նախկին վարչապետի եւ սրբազանի անունները, չեն համապատասխանում իրականությանը: Ընդհակառակըª Աշոտը առերես հարցաքննության ընթացքում պնդեց, որ ո°չ նախկին վարչապետը, ո°չ սրբազանը տեղյակ չեն եղել, որ նա օֆշորում իրենց անուններով ընկերություն է բացել: Ասել է, որ դա արել է միայն իրեն ապահովագրելու համար: Ես զանգահարել եմ քննիչին եւ խնդրել, որ Հայրապետյանին զգուշացնեն, որ ստահոդ լուրեր չտարածի՚:
Ըստ փաստաբանի` պակաս սնանկացած վիճակում չէ նաեւ իր պաշտպանյալ Աշոտ Սուքիասյանը.
ՙԳիտեք Աշոտի վիճակը ավելի լավ է: Ինքն ավելի սնանկ վիճակում է, ՙՊրոմեթեյ՚ բանկը առգրավել է իրեն պատկանող ամեն ինչ: Էսօր Աշոտը ո°չ տուն ունի, ո°չ մեքենաներ, ամբողջը վաճառքի է հանված, կարող է եւ վաճառված լինի: Չգիտեմ էլª ընտանիքի անդամները որտեղ են ապրում: Գոնե բախտը բերել է, որ բռնել են` Նուբարաշենում իր համար հանգիստ  նստած է. լույսը ձրի, գազը ձրի, բնակվարձ էլ չի մուծում (ծիծաղում է- Ի. Ա.)՚:
Անդրադառնալով առերեսման մանրամասներին` փաստաբանը հավելեց.
ՙԱռերեսման ընթացքում ամեն մեկը մնացել է իր դիրքորոշմանը: Աշոտ Սուքիասյանն ասել է այն, ինչ հանրությանն արդեն հայտնի է: Նա ասում է, որ դիտավորություն չի եղել եւ Հայրապետյանին բացատրել է, թե. ՙԴու էլ եկար Աֆրիկա, տեսար, ինչ պայմաններ կային: Մենք պետք է սկսեինք այնտեղից հումք արտահանել, դու էլ անցար այլ գործարարների կողմը, քրեական գործ հարուցեցիր իմ դեմ, գործին խոչընդոտեցիր: Հայտարարեցիր, թե այնտեղ հանք չկա, եւ Հայաստանում բանկային արգելքներ դրեցին գույքի վրա՚:
Հավելենք, որ արդեն քանի օր է, մենք փորձում ենք կապվել նաեւ գործարար Փայլակ Հայրապետյանի հետ, բայց նրա հետ կապ հաստատել մեզ այդպես էլ չի հաջողվում:

ԻԼՈՆԱ ԱԶԱՐՅԱՆ