ՎԱՐՉԱՊԵՏԻ ՎԱՇԻՆԳՏՈՆՅԱՆ ԱՅՑ. ՆՈՐ ՆԵՐԴՐՈՒՄՆԵՐԻ ՍՊԱՍԵԼԻՍ

ՎԱՐՉԱՊԵՏԻ ՎԱՇԻՆԳՏՈՆՅԱՆ ԱՅՑ.
ՆՈՐ ՆԵՐԴՐՈՒՄՆԵՐԻ ՍՊԱՍԵԼԻՍ

Այս օրերին, երբ քաղաքական-հասարակական շրջանակներն ակտիվորեն քննարկում են Եվրասիական տնտեսական միությանը Հայաստանի միանալու փաստը, միաժամանակ ոչ պակաս կարեւոր իրադարձություն է տեղի ունեցել Միացյալ Նահանգներում: Գուցե առաջին հայացքից վարչապետ Հովիկ Աբրահամյանի մասնակցությունը Վաշինգտոնում կայացած Համաշխարհային բանկի եւ Արժույթի միջազգային հիմնադրամի տարեկան լիագումար նիստին` ընդամենը աշխատանքային բնույթ էր կրում, բայց թերեւս այս այցի կարեւորությունը հենց ԵՏՄ պայմանագրի ստորագրման համատեքստում արժեւորվում է այն հանգամանքով, որ հստակ ի ցույց է դնում Հայաստանի որդեգրած ՙեւ-եւ՚ քաղաքականության լինելիությունը:
ՀՀ վարչապետի գլխավորած պատվիրակությունը մասնակից է դարձել շուրջ 180 երկրի մոտ 1500 մասնակիցներով կայացած ՀԲ-ի եւ ԱՄՀ-ի տարեկան լիագումար նիստին, ուր քննարկվել են համաշխարհային ֆինանսատնտեսական իրավիճակին, զարգացումներին, խնդիրներին եւ մարտահրավերներին վերաբերող հարցեր: Լիագումար նիստին մասնակցելուց բացի, վարչապետ Հովիկ Աբրահամյանը հանդիպումներ է ունեցել Ամերիկայի հայկական համագումարի ներկայացուցիչների, Համաշխարհային բանկի հոլանդական խմբի տնօրեն Ֆրենկ Հիմսկերկի հետ: Ինչպես տեղեկացնում են պաշտոնական աղբյուրները` վարչապետը բարձր է գնահատել ՀԲ-ի դերը եւ աջակցությունը Հայաստանում բարեփոխումների իրականացման գործում եւ համոզմունք հայտնել, որ համագործակցությունը էլ ավելի կզարգանա եւ կխորանա:
Ֆրենկ Հիմսկերկը կարեւորել է Հայաստանի հետ Համաշխարհային բանկի արդյունավետ փոխգործակցության շարունակականությունը եւ շեշտել, որ այսուհետ եւս ՀԲ-ն կաջակցի մեր երկրում ընթացող բարեփոխումներին, որոնք ուղղված են տնտեսության զարգացմանը, ներդրումների խթանմանը, աղքատության նվազեցմանը, աշխատատեղերի ստեղծմանը:
Վաշինգտոնում հավատարմագրված դեսպանների, ԱՄՆ պետքարտուղարության, կառավարական այլ գերատեսչությունների, ՀԲ ու ԱՄՀ բարձրաստիճան ներկայացուցիչների, հայկական կազմակերպությունների ղեկավարների, հայ համայնքի ներկայացուցիչների մասնակցությամբ նույն օրը ԱՄՆ-ում ՀՀ դեսպանությունում կազմակերպված Հայաստանի անկախության տարեդարձին նվիրված պաշտոնական ընդունելությանը` վարչապետ Հովիկ Աբրահամյանն ընդգծել է. ՙԲարձր ենք գնահատում այն կարեւոր ծրագրերը, որոնք Հայաստանում 1992 թվականից ի վեր իրականացնում է Միջազգային զարգացման ամերիկյան գործակալությունը: Երախտապարտ ենք ամերիկյան օրենսդիրներին` Հայաստանին եւ Արցախին ամեն տարի տրամադրվող ֆինանսական աջակցության համար: Եվ, իհարկե, երախտապարտ ենք Միացյալ Նահանգներում բնակվող մեր հայրենակիցներին` հայ-ամերիկյան հարաբերություններում իրենց կարեւոր եւ տեսանելի դերակատարության, Հայաստանում իրականացվող բազմաթիվ ծրագրերի համար՚: Հավելենք, որ ընդունելությանը ներկա Պենտագոնի ընդլայնված ներկայացուցչության անդամ դոկտոր Էվելին Բարկասը գերազանցապես անդրադարձել է ռազմական համագործակցության թեմային` չմոռանալով ընդգծել Հայաստանում հաստատված կայունությունը. ՙԴա մի ճանապարհ է, որ միասին ենք անցել՚,- եզրափակել է նա:
Անդրադարձ կատարելով Հայաստանի սոցիալ-տնտեսական իրավիճակին, տնտեսությունում ընթացող բարեփոխումներին, վարչապետն ընդգծել է. ՙՀՀ կառավարությունն անում է հնարավոր ամեն ինչ, որպեսզի հենարան դառնա ներդրողներին ու ձեռներեցներին, զարգանալու նոր հնարավորություններ ընձեռի խոշոր ձեռնարկություններին եւ պետության ամուր թեւի տակ առնի միջին ու փոքր բիզնեսին: Պետք է լրջորեն շարունակել արտահանման նոր հնարավորությունների ստեղծման եւ արտադրական նոր հզորությունների գործարկմանն ուղղված ջանքերը: Գյուղի ու գյուղացու խնդիրների հանդեպ ամեն օր անգամ չի կարելի ուշադրությունը նվազեցնել ու չի նվազեցվելու: Այս ու բազմաթիվ այլ առաջնահերթություններ եռանդով աշխատանք են պարտադրում, եւ այդ աշխատանքը տեսանելի է լինելու մոտ ապագայում՚:
Նկատենք, որ վարչապետ Հովիկ Աբրահամյանը հետեւողական է հայկական արտադրության արտահանման նոր հնարավորություններին ուղղված այս կառավարության որդեգրած քաղաքականության հարցում:
Հիշեցնենք, որ դեռեւս օգոստոսի կեսերին կայացած խորհրդակցության ժամանակ վարչապետը արտահանող մի շարք ձեռնարկությունների ներկայացուցիչների հետ քննարկել էր հայկական արտադրանքի արտահանման ծավալի ավելացմանն ուղղված մի շարք նախագծեր: Հաշվի առնելով այն հանգամանքը, որ արտահանման ծավալի մեծացումն էապես կխթանի տնտեսության զարգացմանը, Հովիկ Աբրահամյանն ընդգծել էր այդ նպատակով տարբեր ծրագրերի իրագործմանն ուղղված կառավարության պատրաստակամության մասին:
Չափազանց կարեւոր է, որ այսօր Միացյալ Նահանգներում` նման ներկայացուցչական լսարանում Հայաստանի վարչապետը բարձրաձայնում է ոչ միայն ներդրումների համար մեր երկրի բարենպաստ պայմանների մասին, այլեւ` հայկական արտադրանքի արտահանման ծավալների մեծացման եւ նոր հնարավորությունների ստեղծման մասին: Այս համատեքստում, կարծում ենք, որ վարչապետի անդրադարձը կոնկրետ ազդակ էր տեղական արտադրողներին եւ այդ խնդիրները կանոնակարգող գերատեսչություններին:

ԱՐՏԱԿ ԳԱՍՊԱՐՅԱՆ