ԶԱՐՈՒՀԻ ՓՈՍՏԱՆՋՅԱՆԸ «ԺԱՌԱՆԳՈՒԹՅԱՆԸ» ԿՐԱ՞ԿՆ Է ԳՑԵԼ

ԶԱՐՈՒՀԻ ՓՈՍՏԱՆՋՅԱՆԸ «ԺԱՌԱՆԳՈՒԹՅԱՆԸ» ԿՐԱ՞ԿՆ

Է ԳՑԵԼ

«Ժառանգություն» կուսակցության փոխնախագահ Արմեն Մարտիրոսյանից այսօր «Իրավունքը» պարզեց  ՀԱԿ-ն ու ԲՀԿ-ը կընդունե՞ն  «Ժառանգության»    այն պայմանները, որոնք հնչեցվել են երեկ  «Ժառանգություն» խմբակցության պատգամավոր Զարուհի Փոստանջյանի կողմից:  «Դրանք  Զարուհի Փոստանջյանի պայմաններն  են, ոչ թե «Ժառանգության»»,- ասաց  կուսակցության փոխնախագահը:

-Այդ դեպքում ինչո՞ւ  է Զարուհի Փոստանջյանը  խոսել կուսակցության, ոչ թե  իր անունից:

- Ես դա հիմա ճշտում եմ:

-Բայց ինչպես կարող  էր տիկին Փոստանջյանը  նման ինքնուրույն  քայլ աներ առանց կուսակցության հետ համաձայնեցնելու:

-Զարուհի Փոստանջյանն ամեն ինչ կարող է: Իր խիզախությունն ու ա զատությունը թույլ են տալիս, որ ինքը նման մոտեցում  ցուցաբերի: Ավելին ասեմ մեր անդամների նկատմամբ  որեւէ խիստ սահմանափակումներ չեն դրվում: Իսկ «Ժառանգության» պաշտոնական տեսակետը ներկայացնում են Րաֆֆի Հովհաննիսյանը, ես, Ռուբեն Հակոբյանը, մամլո խոսնակը:

- Կարելի՞ է ենթադրել, որ լուրջ չեք վերաբերվում «Ժառանգություն» խմբակցության նախկին ղեկավարի Զարուհի Փոստանջյանի  հայտարարություններին:

-Դրանք բնականաբար լուրջ մոտեցումներ են, բայց դրանք իր, ոչ թե Ժառանգության  մոտեցումներն են:  Զարուհի Փոստանջյանն օգտվել է Րաֆֆի Հովհաննիսյանի  ընձեռած ազատությունից, որից օգտվում են կուսակցության մյուս անդամները, եւ արտահայտել իր  մոտեցումները:  Բայց վերջնական որոշումները կայացվում են Ժառանգության վարչությունում, խորհրդում, համագումարում:

- Պրն Մարտիրոսյան, համաձա՞յն եք տիկին Փոստանջյանի այն տեսակետին, որ ԲՀԿ-ը պետք  է ընդունի Ռոբերտ Քոչարյանին որպես հանցագործի եւ հետամուտ լինի նրա քրեական հետապնդմանը եւ օրինական դատավճռով ազատազրկմանը:

-Ես  կարիք չունեմ մեկնաբանելու Զարուհի Փոստանջյանի  կարծիքը, քանի որ նա իմ հարգարժան  գործընկերն է:

-Իսկ ԲՀԿ-ը  Ռ. Քոչարյանին  հանցագործ կճանաչի, թե՞ ոչ:

-Ես չգիտեմ: Ես չեմ մեկնաբանում Զարուհի Փոստանջյանի խոսքերը:

-Լավ: Իսկ համամի՞տ եք  Ձեր գործընկերոջ  տեսակետներին:

-Ես կարող եմ հանդիպել Զ. Փոստանջյանին  եւ իմ համամիտ լինել-չլինելու մասին խոսել նրա հետ:  Ես չեմ կարծում, որ իմ հարգարժան գործընկերոջ ասածները  հրապարակավ պետք է մեկնաբանեմ:

-Կես կատակ կես լուրջ` տիկին Փոստանջյանը «Ժառանգությանը» կրակն է գցել:

-Ոչ, Զ. Փոստանջյանը «Ժառանգությանը» կրակը չի գցել: Նա  ներկայացրել է իր մոտեցումները:  Արշալույսները մեզ մոտ խաղաղ են:

Սոնա Դավթյան