ՊԱՇՏՈՆԱՊԵՍ ԲԱՑՎԵԼ Է ՖՐԻԴՅՈՖ ՆԱՆՍԵՆԻ ԱՆՎԱՆ ԹԱՆԳԱՐԱՆԸ

Արխիվ 12-16 13 Հոկտեմբեր, 2014 9:37

Երևանի Նոր Նորք համայքնում ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոսի ձեռամբ օծվեց նորակառույց եկեղեցու գմբեթի խաչը, զանգը, դուռը, եկեղեցու սյուները, մկրտության Ս. Ավազանը, սրբապատկերները, եկեղեցու շրջափակի ութ խաչքարը: Որից հետո Տնօրհնեքի կարգ կատարվեց երիցատանն ու Ֆ.Նանսենի թանգարանում:

Հաջորդ օրը` հոկտեմբերի 12-ին Նավասարդ սրբազան հոր ձեռամբ օծվեց նորակառույց եկեղեցու Ս. Սեղանը: Այնուհետև մատուցվեց Ս. Պատարագ: Արարողությանը ներկա էր ՀՀ նախագահ Սերժ Սարգսյանը: Արարողությունից հետո պաշտոնապես բացվեց Ֆ. Նանսենի թանգարանը:

Նանսենի այգում դպրոցականները ներկայացեցին իրենց նկարները, ելույթ ունեցան Մայր Աթոռ Սուրբ Էջմիածնի և ՀԲԸՄ Նոր Նորքի Հայորդյաց տան ազգագրական երգ ու պարի համախմբերը: Այնուհետեւ սիրո ճաշի սեղանին մատուցվեց մատաղ:

Եկեղեցու, Ֆ. Նանսենի անվան թանգարան –հուշահամալիրի և երիցատան կառուցման բարերարներ են ՀՀ վաստակավոր բժիշկներ Կառլեն և Սառա Եսայանները: Թանգարան-հուշահամալիրի շինարարական աշխատանքները սկիզբ են առել 2012 թվականին: Այնուհետև սկսվել են եկեղեցու, երիցատան և հարակից հուշարձանախմբերի կառուցման աշխատանքները:

Այսօր հուշահամալիրն իր գողտրիկ տարածքում ընդգրկում է եկեղեցին, երիցատունը՝ հարակից հանգստյան տաղավարով, մոմավառության խորանը` սրբաքանդակներով: Այստեղ են շուրջ 30 հուշարձան և խաչքար՝ նվիրված հայ ժողովրդի պատմության հերոսական և ողբերգական էջերին, անվանի հայորդիներին և հայ ժողովրդի բարեկամներին:

Ֆ. Նանսենի անվան թանգարանի տարածքում տեղադրված է նաև բարերար Կառլեն Եսայանի հուշարձանը և նրա հիշատակին նվիրված թևավոր խաչքարը:

ԶՎԱՐԹ ԽԱՉԱՏՐՅԱՆ