«ՁԵՐ ՕԳՆՈՒԹՅԱՄԲ ԴԱՎԻԹԸ ԿՐԿԻՆ ԿԱՊՐԻ ԼԻԱՐԺԵՔ ՈՒ ԱՌՈՂՋ»

«ՁԵՐ ՕԳՆՈՒԹՅԱՄԲ ԴԱՎԻԹԸ ԿՐԿԻՆ ԿԱՊՐԻ ԼԻԱՐԺԵՔ ՈՒ ԱՌՈՂՋ»

17-ամյա ԴԱՎԻԹ ՄԱԿՈՅԱՆԸ տարիներ շարունակ տառապում է, բայց եւ պայքարում է իր հիվանդության դեմ: Մեծ երազանքներ ունեցող տղան ցանկանում է օգտակար մարդ լինել հասարակության համար, սակայն այն իրագործելու համար անհրաժեշտ է առաջին հերթին վերականգնել առողջությունը: Եվ այսօր Դավիթն ունի բարի կամքի տեր մարդկանց աջակցության կարիքը: Ինչպես »Իրավունքի» հետ զրույցում նշեց Դավիթի մայրը` ԳՈՀԱՐ ԴԱՆԻԵԼՅԱՆԸ. որդին այս տարի պետք է հաճախեր 12-րդ դասարան. «Սակայն ցավերի պատճառով դուրս մնաց դպրոցից:  Հինգ տարի առաջ Դավիթի մոտ հայտնաբերվեց «Յուվենիլ իդիոպատիկ արթրիտ» եւ պարբերական հիվանդություն: Արթրիտը` դա հոդերի ծանր, խրոնիկական հիվանդություն է: Վնասվում են ինչպես հոդերը,այնպես էլ ներքին օրգանները: Հոդերը շատ արագ դեֆորմացվում են եւ կորցնում շարժունակությունը, որը բերում է երեխայի մոտ հաշմադամության առաջացման»: 17-ամյա պատանին հսկողության տակ է գտնվում «Արաբկիր» բժշկական կենտրոնի ռեվմոտոլոգիական եւ պարբերական դիսպանսերում, ստանում է հորմոնալ եւ ցիտոստատիկ բուժում (մետոտրեքսատ, դիկլոֆենակ, պրեդնիզոլոն, սուլֆասալազին, ca d3, կոլխիցին), որը ըստ տիկին Գոհարի, ոչ միայն արդյունավետ չէ,այլեւ թողնում է անդառնալի ու կողմնակի ազդեցություն` կանգնեցնելով երեխայի նորմալ աճը եւ զարգացումը. «Բայց այս դեղերի օգնությամբ է, որ կարողանում է որդիս քայլել: Մեր միակ հույսը «Ակտեմրա» դեղամիջոցն էր, որ Դավիթին պետք է օգներ, բայց մեր սպասումները չարդարացան... Մեզ մնացել է մեկ ճանապարհ. Դավիթի բուժումը շարունակել Գերմանիայում: Սակայն, պահանջվում են ֆինանսական մեծ միջոցներ (ծախսերը կազմում են 15.000 եվրո), ինչի հնարավորությունը մեր ընտանիքը չունի: Ուստի` Դավիթի առողջությունը փրկելու համար կարեւոր է ցանկացած ամենափոքր ներդրումն անգամ»: Ապա կոչ անելով հանրությանը` Գ. Դանիելյանը հավելեց. «Խնդրում ենք օգնեք մեր որդուն: Ձեր օգնությամբ Դավիթը կրկին կապրի լիարժեք եւ առողջ կյանքով ու կիրագործի իր բոլոր երազանքները: Դուք անցավ պատանեկություն ու հուսալի ապագա կպարգեւեք նրան»:

Նշենք, որ Դավիթի համար բացված է հաշվեհամար HSBC բանկում.

005-003504-001 (AMD) (ստացող` Գոհար Դանիելյան (096) 61-14-17):

Չլինենք անտարբեր, չէ՞ որ հիվանդության դեմ անհավասար պայքարում կարող է հայտնվել յուրաքանչյուրիս ընկերը, բարեկամը, որդին կամ հայրը… Այսօր Դավիթին օգնող մարդիկ, կարող է վաղը իրենք օգնության կարիք ունենան ու նրանց վստահաբար աջակցության ձեռք կմեկնի առաջին հերթին հենց Դավիթը, ում կարող ենք հիմա օգնել մենք եւ դուք:

ՀՐԱՆՏ ՍԱՐԱՖՅԱՆ