ՀԱՅ ՇԱԽՄԱՏԻՍՏՆԵՐԸ ԿՄԵԿՆԵՆ ԲԱՔՈՒ

ՀԱՅ ՇԱԽՄԱՏԻՍՏՆԵՐԸ ԿՄԵԿՆԵՆ ԲԱՔՈՒ

Հնդկաստանի Պունե քաղաքում մեկնարկել է շախմատի մինչեւ 20 տարեկանների աշխարհի առաջնությունը, որտեղ Հայաստանն ունի երկու ներկայացուցիչ` Կարեն Գրիգորյան ու Մարիա Գեւորգյան:
Մեր երկու շախմատիստներն էլ մրցաշարը մեկնարկել են հաղթանակով. Կարեն Գրիգորյանը սեւերով հաղթել է հնդիկ Ուտկալ Սահոյին, իսկ Մարիա Գեւորգյանը սեւերով պարտության է մատնել նույնպես հնդիկ Շետի Քրիստիին: Հավելենք, որ մրցաշարը մեկնարկել է հոկտեմբերի 5-ին, կանցկացվի 13 տուր եւ կավարտվի հոկտեմբերի 20-ին:  
Այս օրերին գրոսմայստեր Գաբրիել Սարգսյանը մասնակցում է Անգլիայի Մեն կղզում անցկացվող օփենին: Պատանի շախմատիստները եւս փորձառուներից հետ չեն մնում. ՖԻԴԵ-ի վարպետության թեկնածու Շանթ Սարգսյանը Հարավաֆրիկյան Հանրապետության Դուրբան քաղաքում ավարտված աշխարհի մինչեւ 12 տարեկան շախմատիստների առաջնությունում 11 հնարավորից վաստակեց 8,5 միավոր եւ 105 մասնակիցների մեջ բաժանեց 1-4-րդ տեղերը: Ցավոք, լրացուցիչ ցուցանիշներով Շանթին բաժին հասավ չորրորդ հորիզոնականը: Բայց հայ պատանու ելույթն աշխարհի առաջնությունում չի կարելի անհաջող համարել:
Հայ շախմատիստների մասնակցության կարեւորությունը միջազգային մրցաշարերում եւ միջոցառումներում այս անգամ էլ ընդգծել է Շախմատի միջազգային ֆեդերացիայի նախագահ Կիրսան Իլյումժինովը, ով Ադրբեջանի մայրաքաղաքում հանդես է եկել հայտարարությամբ. ՙՀՀ նախագահ Սերժ Սարգսյանի հետ հանդիպմանը կքննարկեմ Հայաստանի մասնակցությունը Բաքվում կայանալիք Աշխարհի գավաթի խաղարկությանն ու Համաշխարհային օլիմպիադային: ՖԻԴԵ-ն մեծ ընտանիք է, եւ մենք ցանկանում ենք, որ Հայաստանը մասնակցի Բաքվում անցկացվելիք մրցաշարերին: Կլինեն քննարկումներ Երեւանում: Մենք ցանկանում ենք, որ բոլոր հավաքականները մասնակցեն Աշխարհի գավաթի խաղարկությանն ու Համաշխարհային օլիմպիադային՚,- Կիրսան Իլյումժինովի խոսքը մեջբերում է azerisport-ը: Հիշեցնենք, որ 2015-ին Բաքուն կընդունի Աշխարհի գավաթի խաղարկության մրցաշարը, 2016-ինª Համաշխարհային օլիմպիադան: Իսկ ՖԻԴԵ-ի նախագահի այցը Երեւան նախանշված է հոկտեմբերի 17-ին:

ՔՐԻՍՏԻՆԵ ՊԵՏՐՈՍՅԱՆ