ԵՐԲ ԵՏՄ-Ի ՙՀԱՐՑԻ ՎԵՐԱԲԵՐՅԱԼ ԿԼԻՆԻ ԽՈՐՀՐԴԱԿՑՈՒԹՅՈՒՆ ԿԱՄ ԴԻՐՔՈՐՈՇՈՒՄ...՚

ԵՐԲ ԵՏՄ-Ի ՙՀԱՐՑԻ ՎԵՐԱԲԵՐՅԱԼ ԿԼԻՆԻ
ԽՈՐՀՐԴԱԿՑՈՒԹՅՈՒՆ ԿԱՄ ԴԻՐՔՈՐՈՇՈՒՄ...՚

ԱԺ ոչ իշխանական ուժերի` ԲՀԿ-ի, ՀԱԿ-ի, ՙԺառանգության՚ համատեղ մարզային հանրահավաքները շարունակվում են: Սակայն, կարծես թե, ժողովուրդն այդքան էլ ոգեւորված չէ դրանցով, քանի որ ի թիվս այլ հարցերի, խոսվում է նաեւ սահմանադրական բարեփոխումների մասին, որը դեռ խմորման փուլում է եւ ՀՀ քաղաքացիների մեծամասնության համար չինական այբուբենի պես մի բան է: ՙԻրավունքն՚ այս  եւ այլ հարցերի շուրջ զրուցեց ԲՀԿ մամլո խոսնակ ՏԻԳՐԱՆ ՈՒՐԻԽԱՆՅԱՆԻ հետ:
-Պրն Ուրիխանյան, ԲՀԿ խմբակցության քարտուղար Նաիրա Զոհրաբյանը  մարզային հանրահավաքներից մեկում հայտարարել էր. ՙԳնում ենք իշխանափոխության՚: Սա տիկին Զոհրաբյանի անձնական, թե կուսակցության դիրքորոշումն է:
- Ես զարմանում եմ ձեր հարցադրման վրա, քանի որ Նաիրա Զոհրաբյանը ԲՀԿ-ի առանցքային դեմքերից է, եւ նա պատահական արտահայտություններ չի անում:
- Այսինքն` սա կուսակցության դիրքորոշումն է, ոչ թե` Ն. Զոհրաբյանի:
- Ես ձեզ տվեցի պատասխան, որը կարող եք մեջբերել:
- Այս հայտարարությունից կարելի է ենթադրել, որ ԲՀԿ-ն պահանջում է ՀՀ նախագահի հրաժարականը:
- ԲՀԿ-ն առաջ էր քաշել ոչ իշխանական այլ ուժերի հետ միասին  սոցիալական օրակարգ, որը  վերաբերում է ձեզ հայտնի 12+ եւս մի քանի կետերին, այսինքն` երկրում ՀՀ քաղաքացու ապրելու անհնարինությանը: Քանի որ սոցիալական օրակարգի շրջանակներում առաջ քաշվող պահանջները  իշխանությունները չեն բավարարում, սոցիալական օրակարգը վերածվել է քաղաքականի: Հետեւաբար, պրոբլեմների առաջացման կամ  դրանք չվերացնողները պետք է կրեն պատասխանատվություն: Եվ որեւէ սահմանափակում` պատասխանատվության մեջ, լինել չի կարող:
- Պրն Ուրիխանյան, հստակեցնենք, հիմա ԲՀԿ-ն պահանջո±ւմ է նախագահի հրաժարականը, թե± ոչ:
- ԲՀԿ-ն մտահոգ է երկրում առկա իրավիճակով եւ Հայաստանում կենսակերպ կազմակերպելու անհնարինությամբ: Եթե դրանում կան մեղավորներ, իսկ մենք գտնում ենք, որ դրա մեղավորն իշխանությունն է, բոլորը պետք է կրեն պատասխանատվություն:
- Երբ ասում եք, որ մեղավոր է իշխանությունը, ո±վ է առաջին մեղավորը:     
- Առաջին, երկրորդ ու այլ հերթականություններ չունեմ ու խնդրում եմ ինձ նման հարցերից զերծ պահեք:
- Հայտնի է, որ ՙեռյակի՚ մարզային հանրահավաքներին ՀՅԴ-ն չի մասնակցում, քանի որ  օրակարգում դրված է նաեւ սահմանադրական բարեփոխումների  հարցը: Կարելի± է  ենթադրել, որ ոչ իշխանական ուժերը, դեմ արտահայտվելով սահմանադրական բարեփոխումներին, առաջ են քաշում ոչ թե համակարգի փոփոխության, այլ` անձերի խնդիր:
- Կարելի է ասել միայն մեկ բան. ԲՀԿ-ն դեմ է Սահմանադրության  վերաձեւմանը` իշխանության վերարտադրման համար:
- Մարզային հանրահավաքների ժամանակ, երբ ՙեռյակը՚ խոսում է սահմանադրական բարեփոխումների մասին, հանրահավաքի մասնակիցների քանի± տոկոսը, ըստ ձեզ, գիտի դրանց մասին, եւ վաղ չէ± խոսել  մի երեւույթից, որը դեռեւս խմորման փուլում է:
- Ինչ է նշանակում խմորման փուլում է: Միթե նախագիծ չի ներկայացվել:
- Պատրաստ է սահմանադրական բարեփոխումների նախագծի հիմնադրույթների տարբերակը:
- Խորհրդարանական  կառավարման համակարգին կարելի էր անցնել ավելի առաջ, ոչ թե` երբ ավարտվում է իշխող  կուսակցության ղեկավարի ու իշխող կուսակցության կառավարման ժամկետները:
- Իսկ ժողովրդի քանի± տոկոսը գիտի` ինչ են սահմանադրական բարեփոխումները:
- Իմ կարծիքը երկրորդական է, հարցրեք ժողովրդին:
- Դուք Ձեր անձնական կարծիքը հայտնեք:
- Այն երկրորդական է: Առաջնայինն այն է, ինչ հնչում է հանրահավաքներին:
- Հոկտեմբերի 10-ի հանրահավաքի ժամանակ ՙեռյակը՚ բարձրաձայնելու է Հայաստանի` ԵՏՄ անդամակցության հարցը:
- Հոկտեմբերի 10-ը` որպես հանրահավաքի եւ որպես ԵՏՄ պայմանագրի ստորագրման օր, իրար հետ կապ չունեցող իրադարձություններ են:  
- Իսկ ԵՏՄ-ի անդամակցության հարցը ՙեռյակի՚ համար առաջնային է, թե երկրորդական:
- ՀՀ-ին առնչվող որեւէ հարց  չի կարող ՙեռյակի՚ համար երկրորդական լինել:
- ԲՀԿ-ն Հայաստանի` ԵՏՄ անդամակցության մասին  հարցին ի պատասխան` հայտարարել էր, որ անդամակցության մասին կարծիք կհայտնի փաստաթղթի հրապարակումից հետո  միայն: Հոկտեմբերի 2-ին  ՀՀ կառավարությունը հավանության արժանացրեց ՙՀայաստանի Հանրապետության ՙԵվրասիական տնտեսական միության մասին՚ 2014թ. մայիսի 29-ի պայմանագրին միանալու մասին՚ պայմանագրի նախագիծը: ԲՀԿ-ն ուսումնասիրե±լ է  պայմանագրի նախագիծը:
- Առաջիկայում, երբ այդ հարցի վերաբերյալ կլինի խորհրդակցություն կամ դիրքորոշում, ես ձեզ սիրով կտեղեկացնեմ:

ՍՈՆԱ ԴԱՎԹՅԱՆ