ՍԱՐԿԻՍՈՎԸ ԿԱՐՈՂ Է ՓՐԿՕՂԱԿ ԴԱՌՆԱԼ ԱԶԳԱՅԻՆ ԸՆՏՐԱՆՈՒ ՀԱՄԱՐ

ՍԱՐԿԻՍՈՎԸ ԿԱՐՈՂ Է ՓՐԿՕՂԱԿ ԴԱՌՆԱԼ ԱԶԳԱՅԻՆ ԸՆՏՐԱՆՈՒ ՀԱՄԱՐ

Հոկտեմբերի 11-ին Հայաստանի ազգային հավաքականը կանցկացնի ՙԵվրո-2016՚-ի ընտրական փուլի հերթական հանդիպումը` հյուրընկալելով Սերբիայի հավաքականին, իսկ հոկտեմբերի 14-ին տեղի կունենա Հայաստան-Ֆրանսիա ընկերական հանդիպումը:
Այդ հանդիպումներին նախապատրաստվելու համար Հայաստանի ազգային հավաքականը հոկտեմբերի 6-ից 14-ը կանցկացնի մարզական հավաք` Հայաստանի ֆուտբոլի ֆեդերացիայի տեխնիկական կենտրոնում` Ֆուտբոլի ակադեմիայում: ՀՖՖ-ն օրերս ներկայացրեց Հայաստանի ազգային հավաքականի գլխավոր մարզիչ Բեռնար Շալանդի հրապարակած նախապատրաստական ծրագիրը: Այն իր մեջ ներառում է վերկանգնողական մարզում հոկտեմբեր 6-ին, երկուական մարզումներ հոկտեմբերի 7-ին եւ 8-ին, մեկ մարզում 9-ին եւ երկուսն արդեն հոկտեմբերի 10-ին: Իսկ սերբերը Երեւան կժամանեն հոկտեմբերի 9-ին:
Այսպիսովª առաջիկայում Հայաստանի հավաքականին բարդ փորձություն է սպասվում, հաշվի առնելով, որ պետք է փորձի առավելագույնը ստանալ այս հանդիպումից` առանց առաջատարների: Թեեւ Հայաստանի ազգային ընտրանու ֆուտբոլիստներն ու գլխավոր մարզիչը բավականին լավ տրամադրվածություն են ցուցաբերում, բայց հանդիպման կարեւորությունն ու եղած խնդիրները մտահոգության տեղիք են տալիս: Միավորներ կորցնել տնային խաղերում` այս պահին Հայաստանի հավաքականն այլեւս իրեն թույլ տալ չի կարող: Չնայածª ՙկիսակազմ՚ թիմից մեծ սպասելիքներ ունենալ նույնպես չի կարելի: Սակայն Հայաստանի հավաքականի եւ հոլանդական ՙԱլմերե Սիթիի՚ կիսապաշտպան Նորայր Ասլանյանը կարծիք է հայտնել, որ եղած կազմով էլ, ազգային ընտրանին կարող է հաղթել սերբերին, ու նման տրամադրվածությունը, ինչ խոսք, հուսադրող է: Եթե ֆիզիկական պատրաստվածությամբ սերբերին հայ ֆուտբոլիստները այս պահին գերազանցել չեն կարող, ապա տանտերերի կարգավիճակը հոգեբանական առավելություն պետք է ստեղծի: Ինչեւէ, սա լավ առիթ է` ստուգելու համար, թե ինչի է ընդունակ Հայաստանի հավաքականի ՙերկրորդ՚ կազմը:
Ի դեպ, Արթուր Սարկիսովը, որը հոկտեմբերի 11-ին, ամենայն հավանականությամբ, իր վրա պետք է վերցնի ե°ւ Յուրա Մովսիսյանի, ե°ւ Հենրիխ Մխիթարյանի պարտականությունները, բավականին տպավորիչ խաղ է ցուցադրում Նիժնի Նովգորոդի ՙՎոլգայի՚ կազմում: Սարկիսովը մերձմոսկովյան ՙԽիմկիի՚ դեմ ֆուտբոլի Ռուսաստանի Առաջին դիվիզիոնի առաջնության 13-րդ տուրի խաղում դուբլի եւ գոլային փոխանցման հեղինակ է դարձել: Բայց նաեւ նա փոխարինվել է` վնասվածքի պատճառով: ՙԳիտեինք, որ ՙԽիմկին՚ խաղալու է ագրեսիվ, բայց կարողացանք հաղթահարել մրցակցի մեկնարկային ակտիվությունը եւ գոլ խփեցինք: Խաղակեսի վերջնամասում կորցրեցինք զգոնությունը, ինչից օգտվեց մրցակիցը: Ընդմիջումից հետո մեր խաղը ստացվեց եւ, խփելով 2 գոլ, հասանք հաղթանակի: Ինչ վերաբերում իմ փոխարինմանը, ապա ունեի մկանային խնդիր, որը մինչեւ փոխարինվելը չէր խանգարում՚,- Սարկիսովի խոսքը մեջբերում է ՙՎոլգայի՚ կայքը: Ավելացնենք, որ ընթացիկ առաջնությունում Սարկիսովը ՙՎոլգայի՚ կազմում անցկացրած 10 խաղերում խփել է 6 գոլ: Երկրպագուների շրջանում անցկացված հարցման արդյունքում նա ճանաչվել էր սեպտեմբեր ամսվա թիմի լավագույն ֆուտբոլիստ: Հիմա մնում է հուսալ, որ մկանային խնդիրն այնքան չի լրջանա, որ Սարկիսովն էլ վնասվածքների պատճառով հայտնվի  խաղերից զրկված մեր մյուս առաջատարների շարքերում:

ՔՐԻՍՏԻՆԵ ՊԵՏՐՈՍՅԱՆ