ԱՇՈՏ ԱՂԱԲԱԲՅԱՆ. ՙՈՒԶՈՒՄ ԵՆ ԻՄ ԱՆՎԱՆ ՀԵՏ ԽԱՂԱԼ՚

ԱՇՈՏ ԱՂԱԲԱԲՅԱՆ. ՙՈՒԶՈՒՄ ԵՆ ԻՄ ԱՆՎԱՆ ՀԵՏ ԽԱՂԱԼ՚

ՙՇրջանառության հարկի՚ մասին նոր օրենքի դեմ բողոքների հետ կապված` շրջանառվում են խոսակցություններ, թե դժգոհող առեւտրականների թիկունքում կանգնած են նաեւ որոշ տոնավաճառների տերեր: Ակցիային մասնակցում են նաեւ ՙՀրազդան՚ տոնավաճառի աշխատակիցները, եւ ահա, խոսվում է, որ հիշատակված տոնավաճառների տերերի թվում է նաեւ ՙՀրազդանի՚ սեփականատեր, ԱԺ պատգամավոր ԱՇՈՏ ԱՂԱԲԱԲՅԱՆԸ: Վերջինս, սակայն, մեզ հետ զրույցում հերքեց վերոնշյալ լուրերի իսկությունը.
-Այդ խոսակցությունները զուտ հերյուրանքներ են իմ անձի շուրջ: Ընդհակառակը` մենք բացատրական աշխատանքներ ենք իրականացնում առեւտրականների հետ, պարզաբանելով, որ այդ օրենքը ոչ մի կերպ չի խանգարի իրենց բիզնեսին, եւ որ դրա միակ նպատակը խոշորներին ստվերից դուրս բերելն է: Այդ օրենքի ընդունման առաջին իսկ օրվանից դա ենք փորձում բացատրել մեր աշխատակիցներին. մենք ինչ ունենք կորցնելու կամ շահելու, որ մարդկանց դրդենք` դուրս գան փողոց: Ընդհակառակըª մենք ասել ու ասում ենք` մաքուր աշխատեք: Ինքս անձամբ բազմիցս ասել եմ, որ ուղղակի անհրաժեշտ է, որ օրենքը աշխատի, իսկ ժամանակի ընթացքում ինչ պրակտիկ թերություն տեսնենք, կսկսենք վերացնել:
Ես չգիտեմ, թե ով է նման կեղտոտ ստեր փորձում տարածել, ուզում են իմ անվան հետ խաղալ, բայց դա նրանց մոտ չի ստացվի: Ես կլինեմ օրենքի հղկման ջատագովը, քան` օրենքի դեմ: Իսկ մանր ու միջին բիզնեսմեններին, դա ընդհանրապես չի խանգարում, թող խոշորները մտածեն, թե ոնց են նոր օրենքի տակից դուրս գալու:
- Իսկ ինչ կասեք այն տարածված լուրերի մասին, որ հոկտեմբերի 8-ին Գյումրիում եռյակի հանրահավաքը բազմամարդ է լինելու: Արդյո±ք Գյումրիում եռյակի դիրքերն այդքան ամուր են:
- Գյումրիում ընդդիմադիր մարդ չկա, գյումրեցիները մշակույթի ժողովուրդ են, ուղղակի, իրոք, գյումրեցիների վիճակը լավ չէ: Եթե հանրապետության այլ տեղերում մարդիկ լավ են ապրում, ապա Գյումրիում, Ղուկասյանում, Ամասիայում, Ախուրյանում մարդիկ աղքատ են: Աշխատանք չկա` մեկ, ցուրտը ամեն ինչ տանում է` երկուս, բա չբողոքե±ն: Իսկ ընդդիմությունը օգտվում է առիթից եւ ամեն հնարավոր պատճառ օգտագործում է, որ մարդկանց հանի փողոց: Բայց իրենց մոտ, հավատացնում եմ, չի ստացվի: Էլի եմ ասումª ճիշտ է, մարդիկ դժգոհ են, բայց դժգոհ են իրենց կյանքից, ոչ թե ընդդիմության առաջացրած հարցերից: Ես չեմ բացառում, որ այս ակցիաները արվում են հատուկ նպատակով` ընդառաջ հոկտեմբերի 10-ին, որպեսզի ինչ-որ մարդիկ ցույց տան դրսի ուժերին, որ` տեսեք, Հայաստանում խառը իրավիճակ է եւ այլն: Վերջիններս հաշվի չեն առնում, որ Եվրասիական միությանն անդամագրվելով` մտնում ենք մեծ շուկաներ: Հետագայում, եթե նկատենք, որ Հայաստանի` ԵՏՄ-ին անդամագրվելը կխանգարի Ղարաբաղի կայունությանը, ուրեմն, իմ կարծիքով, կթողենք դուրս կգանք: Հետո, որ մտանք, դա չի նշանակում, որ հետեւներիցս դուռը փակեցին, էլ չենք կարող դուրս գալ: Ցանկացած քայլ համարվում է ճիշտ, երբ քայլը անելուց հետո ճիշտ երեւույթների ես հանդիպում, եւ ճիշտ ապրելակերպ ես ընդունում: Իսկ ինչ վերաբերում ընդդիմադիրների ցանկություններին, որ Գյումրիում հանրահավաքը բազմամարդ է լինելու, կասեմ հետեւյալը` գյումրեցուն տնից դուրս հանելն էդքան էլ հեշտ չէ:

ԻԼՈՆԱ ԱԶԱՐՅԱՆ