ՎԵՐՆԻՍԱԺԻ ԳՈՐԾԻ ՇՈՒՐՋ ՋՐԵՐԸ ՍԿՍՈՒՄ ԵՆ ՊԱՐԶՎԵԼ

ՎԵՐՆԻՍԱԺԻ ԳՈՐԾԻ ՇՈՒՐՋ ՋՐԵՐԸ ՍԿՍՈՒՄ ԵՆ ՊԱՐԶՎԵԼ

Վերնիսաժի աղմկահարույց կրակոցների գործի շուրջ վերջերս բավականին հետաքրքիր ու նոր զարգացումներ են սկսում նկատվել: Բայց մինչ դրան հասնելը, նախ հակիրճ հիշեցնենք, թե այս գործում ՙով ում բարեկամն էր՚:
ԱԺ պատգամավոր Կարո Կարապետյանի փեսա Գոռ Առաքելյանը Վերնիսաժի մոտ գտնվող շենքերից մեկի կայանատեղիի մուտքը երկու այլ երիտասարդների` Ներսես Մելքոնյանի եւ Վալերի Հովհաննիսյանի կողմից փակելու պատճառով վիճաբանել ու սկսել էր կրակել` իր մոտ եղած գործարանային ջնջված  համարով ՙՄակարով՚ ատրճանակից: Արդյունքում վիրավորվել էին ոչ միայն Ներսեսն ու Վալերին, այլ նաեւ Վերնիսաժում գտնվող երեք պատահական անձիք: Այդ դեպքից գրեթե անմիջապես հետո լայն  շրջանառության մեջ դրվեց այն վարկածը, թե Ներսեսը եւ Վալերին են նախահարձակ եղել, ճնշել են Գոռին, եւ նա պարզապես ստիպված է եղել կրակել: Ավելին, Գոռի փաստաբան Երեմ Սարգսյանը գրեթե անմիջապես էլ անցավ այն ռազմավարությանը, թե իր պաշտպանյալը պարզապես ինքնապաշտպանության է դիմել:
Դեռ այդ փուլում հիշատակված վարկածը մեզ կասկածելի էր թվում այն առումով, որ մեր ունեցած տվյալներով` Գոռը մասնավորապես Վալերիի վրա կրակել է այն պահին, երբ վերջինս գտնվել է ավտոկայանատեղիի մուտքը փակած չարաբաստիկ մեքենայի ղեկին: Իսկ մեքենայի դուռ բացելն ու վարորդի վրա կրակելը այնքան էլ ինքնապաշտպանության չի նմանվում: Բայց հետագայում Ներսեսին, ապա` Վալերիին եւս խուլիգանության մեղադրանք ներկայացվեց: Ընդ որում, քննության ընթացքում զգացվում էր, որ փորձ է արվում համոզել Վալերիին ընդունել, թե իրոք ինքն է սկսել վեճ-կռիվ, որն  էլ պարզապես ստիպել է Գոռին կրակել: Բայց այն պարագայում, երբ նա գտնվել է մեքենայի ղեկին, մեծ ֆանտազիա է պետք` բացատրելու համար, թե այդ ինչպես է հաջողացրել իրավիճակն այդքան թեժացնել ու նույն պահին էլ, ամեն ինչ թողնել ու նստել մեքենա: Խոսվում էր նաեւ, որ այս թեմայով բավական լուրջ ՙլոբբինգ՚ է ծավալել նաեւ Գոռի պատգամավոր աները` ցանկանալով ամեն կերպ արդարացված տեսնել իր փեսային:
Բայց ահա վերջին ժամանակներս գործի քննությունը սկսեց բավականին հետաքրքիր ընթացքով գնալ: Մի կողմից Գոռի, ասենք նաեւ` Ներսեսի մեղադրանքները մի քիչ ավելացան, մյուս կողմից էլ` դատարանը մերժեց Գոռին բաց թողնելու միջնորդությունը: Թե ինչ մտքի է դա տանում, դեռ ենթադրությունների դաշտում է, բայց հույս ունենք որոշ մանրամասներ ներկայացնել` այս գործընթացին զուգահեռ: Բայց ահա վերջնական փուլում, երբ գործը գրեթե մտնում է դատարան, օրերս հետաքրքիր մանրամասներ հնչեցրեց նաեւ Գոռ Առաքելյանի փաստաբանը: Նախ` էլի այն ռազմավարությունն է առաջ տանում, թե Գոռը ոչ մեկին սպանելու միտք չի ունեցել, քանի որ նրա բոլոր կրակոցներն ուղղված են եղել ներքեւ: Մասնավորապես, ըստ լրատվամիջոցներում հնչած նրան վերագրվող մտքի. ՙՆերսես Մելքոնյանի մոտ առկա է եղել 4 հրազենային վնասվածք ոտքի վրա, եւ եթե իրար դիմաց կանգնած 4 կրակոց է արձակվում ոտքին ու ոչ թե կենսական այլ օրգաններին, ապա դա նշանակում է, որ սպանության նպատակ չի եղել՚:
Լավ, միգուցե: Բայց էլի գալիս ենք մյուս հիմնական վիրավորի` Վալերիի խնդրին. նա ոտքի վերքի հետ մեկտեղ` ունեցել է վերք (որն առ այսօր լուրջ առողջական խնդիր է առաջացնում) որովայնի հատվածում: Եվ ահա Գոռի պաշտպանը, ըստ նույն աղբյուրի` դա փորձում է բացատրել, թե Վալերին եղել է մեքենայի մեջ, եւ կրակոցներից մեկը նրա որովայնին է դիպել, որը նստած դիրքի կամ շարժման արդյունք է եղել, իսկ մյուս վնասվածքը եղել է ոտքի վրա: Եվ ամենահանճարեղը, որին դեռ կհասնենք. այսքանից հետո ատրճանակում փամփուշտներ են մնացել, ինչը, ըստ փաստաբանի, իր հերթին է նշանակում, որ սպանության նպատակ չի եղել:
Այսինքն, այնուամենայնիվ, Վալերին եղել է մեքենայում նստա±ծ, ինչպես որ ի սկզբանե մենք էինք պնդում: Երկրորդը. փաստաբանի խոսքերից երեւում է, որ դրանից մի չնչին ժամանակահատված առաջ Գոռը 4 անգամ կրակել է Ներսեսի ոտքերին: Ընդ որում, դժվար չէ ենթադրել, որ այն պահին, երբ Գոռը զենք է վերցրել, Վալերին արդեն այնտեղ չի եղել. հակառակ դեպքում` նա պարզապես չէր հասցնի հասնել եւ նստել ավտոմեքենան: Եվ ուրվագծվում է հետեւյալ տպավորությունը. միգուցեեւ նախնական վեճ է եղել, որը, սակայն դեռ զենքի չի հասել: Համենայնդեպս, եղել է ոչ այն աստիճանի ծայրահեղ շիկացած, որ Վալերին ստիպված լիներ մնալ տեղում. կարողացել է հանգիստ հեռանալ ու նստել ավտոմեքենան` մեր տվյալներով` այն ավտոկայանատեղիի մուտքից հեռացնելու նպատակով: Թե այդ պահին ինչն է պարտադրել Գոռին զենք վերցնել, դա արդեն իրավապահների պարզելիք խնդիրն է: Բայց ենթադրաբար նա այդ պահին պետք է որ դեմ առ դեմ լիներ անզեն Ներսեսի հետ, այսինքն, զենք հանելն այս պահին հազիվ թե ինքնապաշտպանություն դառնա:
Եվ վերջապես` ատրճանակում մնացած փամփուշտների մասին: Քանի± փամփուշտ է տանում ՙՄակարովը՚, դա երեւի հայտնի է ամեն դպրոցականի: Ուրեմն 4 անգամ կրակել է Ներսեսի ոտքերին, առնվազն 2 անգամ` Վալերիի վրա: Դրանից հետո 3 հոգի էլ վիրավորվել է Վերնիսաժում. արդեն իսկ զենքում փամփուշտ չպետք է մնար, բայց պարզվում է, որ մնացել է: Ի±նչ է, Գոռը նաեւ փամփշտատուփն է փոխել... Եթե` այո, ապա ինքնապաշտպանության վարկածը ո±ւր մնաց:  

Ս. ԱԲՐԱՄՅԱՆ