ՆԱԻՐԱ ԶՈՀՐԱԲՅԱՆԸ ԲՀԿ-ԻՆ ԿՐԱԿՆ Է ԳՑԵ՞Լ

ՆԱԻՐԱ ԶՈՀՐԱԲՅԱՆԸ ԲՀԿ-ԻՆ ԿՐԱԿՆ  Է ԳՑԵ՞Լ

ԱԺ ոչ իշխանական ուժերի՝ ԲՀԿ-ի, ՀԱԿ-ի, «Ժառանգության» համատեղ մարզային հանրահավաքները շարունակվում են: Սակայն կարծես թե ժողովուրդն այդքան էլ ոգեւորված չէ դրանցով, քանի որ ի թիվս այլ հարցերի, խոսվում է նաեւ սահմանադրական բարեփոխումների մասին, որը դեռ խմորման փուլում է: «Իրավունքն» այս  եւ այլ հարցերի շուրջ զրուցեց ԲՀԿ մամլո խոսնակ Տիգրան Ուրիխանյանի հետ:

-Պրն Ուրիխանյան, ԲՀԿ խմբակցության քարտուղար Նաիրա Զոհրաբյանը  մարզային հանրահավաքներից մեկում հայտարարել էր. «Գնում ենք իշխանափոխության»: Սա տիկին Զոհրաբյանի անձնական, թե՞ կուսակցության դիրքորոշումն է:

-Ես զարմանում եմ ձեր հարցադրման վրա, քանի որ Նաիրա Զոհրաբյանը ԲՀԿ-ի առանցքային դեմքերից է եւ նա պատահական արտահայտություններ չի անում:

-Այսինքն՝ սա կուսակցության դիրքորոշումն է, ոչ թե Ն. Զոհրաբյանի:

-Ես ձեզ տվեցի պատասխան, որը կարող եք մեջբերել:

-Այս հայտարարությունից կարելի՞ է ենթադրել, որ ԲՀԿ-ը պահանջում է ՀՀ նախագահի հրաժարականը:

-ԲՀԿ-ը առաջ էր քաշել ոչ իշխանական այլ ուժերի հետ միասին  սոցիալական օրակարգ, որը  վերաբերում է ձեզ հայտնի 12+ եւս մի քանի կետերին, այսինքն՝ երկրում ՀՀ քաղաքացու ապրելու անհնարինությանը: Քանի որ սոցիալական օրակարգի շրջանակներում առաջ քաշվող պահանջները  իշխանությունները չեն բավարարում, սոցիալական օրակարգը վերածվել է քաղաքականի: Հետեւաբար, պրոբլեմների առաջացման կամ  դրանք չվերացնողները պետք է կրեն պատասխանատվություն: Եվ որեւէ սահմանափակում պատասխանատվության մեջ լինել չի կարող:

-Պրն Ուրիխանյան, հստակեցնենք, հիմա ԲՀԿ-ը պահանջո՞ւմ է  նախագահի հրաժարականը, թե՞ ոչ:

-ԲՀԿ-ը  մտահոգ է երկրում առկա իրավիճակով եւ Հայաստանում  կենսակերպ կազմակերպելու անհնարինությամբ: Եթե դրանում կան մեղավորներ, իսկ   մենք գտնում ենք, որ դրա մեղավորն իշխանությունն է, բոլորը պետք է կրեն պատասխանատվություն:

-Երբ ասում եք, որ մեղավոր է իշխանությունը, ո՞վ է առաջին մեղավորը:

-Առաջին ու երկրորդ ու այլ հերթականություններ չունեմ  ու խնդրում եմ ինձ նման հարցերից զերծ պահեք:

Հարցազրույցի շարունակությունը կարդացեք Իրավունքի վաղվա համարում:

Սոնա Դավթյան