ԲԵՐՄԱՆ ԵՆԹԱՐԿԵԼՈՒ ԻՐԱՎԱՉԱՓՈՒԹՅՈՒՆԸ

ԲԵՐՄԱՆ ԵՆԹԱՐԿԵԼՈՒ ԻՐԱՎԱՉԱՓՈՒԹՅՈՒՆԸ

- Որքանով է իրավաչափ Վարդգես Գասպարիին բերման ենթարկելը ոստիկանություն` զրկելով ազատությունից:
Մի խումբ ակտիվիստներ
Ճիշտ գնահատական տալու համար անհրաժեշտ է ծանոթանալ գործին, գործ, որի շրջանակներում, ենթադրում եմ, պարոն Գասպարին անցնում է կա°մ որպես վկա, կա°մ` տուժող, կա°մ էլ` կասկածյալ...
Օրենսդիրը տվյալ անձանց բերման ենթարկելը թույլատրում է բացառիկ դեպքում, երբ վերջիններս առանց հարգելի պատճառի չեն ներկայանում քննության, եւ օրենքի ուժով, հարկադրաբար, քրեական վարույթն իրականացնող համապատասխան մարմնի որոշման առկայության պայմաններում, ներկայացվում են վարույթն իրականացնող մարմնին` համապատասխան դատավարական գործողություններ կատարելու համար, ընդ որում, դա կարող էր զուգորդվել բերման ենթարկվող անձի իրավունքների եւ ազատությունների ժամանակավոր սահմանափակումով: Այսինքն, եթե լիազոր մարմնի գործողությունները եղել են իրավաչափ, իրավաչափ է նաեւ անձի ազատության ժամանակավոր սահմանափակման հետ կապված գործողությունը: Լիազոր մարմնի որոշումը` անձին բերման ենթարկելու հետ կապված, պետք է լինի հիմնավոր եւ պատճառաբանված, իսկ հարկադրանքի կիրառումը պետք է լինի բացառիկ դեպքում, երբ բացառվում է ալտերնատիվ միջոցների կիրառման գործառույթը:
Նշանակված ժամկետում կանչով ներկայանալուն խոչընդոտող հարգելի պատճառների առկայության մասին տվյալ անձը պարտավոր է տեղյակ պահել իրեն կանչած մարմնին:
Չի թույլատրվում բերման ենթարկել մինչեւ 14 տարեկան անչափահասներին, հղի կանանց եւ ծանր հիվանդությամբ տառապողներին, բացառությամբ ծանր կամ առանձնապես ծանր հանցագործության մեջ կասկածվելու դեպքերի:
Բերման որոշումը ենթակա է բողոքարկման եւ վերացման ինչպես դատախազի կողմից, այնպես էլ դատական կարգով այն անվավեր ճանաչելով:
Հարկավոր է իմանալ.
Ոստիկանության գործունեությունը պետք է հիմնվի օրինականության, անձի իրավունքների եւ ազատությունների, պատիվն ու արժանապատվությունը հարգելու, մարդասիրության ու հրապարակայնության սկզբունքների վրա: Ոստիկանության հարկադրական բնույթի լիազորությունների իրականացումը պետք է ուղղված լինի Հայաստանի Հանրապետության Սահմանադրությամբ եւ օրենքներով հետապնդվող նպատակներին, իսկ դրանց հասնելու միջոցները պետք է լինեն պիտանի, անհրաժեշտ եւ չափավոր, հակառակ պարագայում ունենալու ենք հասարակությունից օտարված ուժային կառույց` բխող կործանարար հետեւանքներով:

ԼԵՎՈՆ ՍՈԽԱԿԻ ԲԱՂԴԱՍԱՐՅԱՆ
ՙԼեւ գրուպ՚ փաստաբանական
գրասենյակի հիմնադիր նախագահ
www.levgroup.am
Հարցեր կարող եք ուղարկել նաեւ
[email protected] հասցեով