ՙՙՊԱՏԳԱՄԱՎՈՐԱԿԱՆ ՔԱՐՏԻ ԳՈՂԸ ԳՈՂ ՉԻ

ՊԱՏԳԱՄԱՎՈՐԱԿԱՆ ՔԱՐՏԻ ԳՈՂԸ ԳՈՂ ՉԻ

ԱԺ-ի քառօրյայում դարձյալ ուշադրության կենտրոնում է ՙԺառանգություն՚ խմբակցության պատգամավոր Զարուհի Փոստանջյանը, ով առաջարկեց փոփոխություն կատարել ԱԺ կանոնակարգում` պատգամավորների կարգազանցության հետ կապված:
Նախագծի վերաբերյալ հարց ու պատասխանով հանդես եկան պատգամավորներ Խոսրով Հարությունյանը, Հեղինե Բիշարյանը, Խաչատուր Քոքոբելյանը, Սուքիաս Ավետիսյանը, ով ի դեպ հիշեցրեց Զ.Փոստանջյանին, թե ինչպես էր ՙՀայաստանի Հանրապետության կառավարության եւ Ռուսաստանի Դաշնության կառավարության միջեւ ՙՀայՌուսգազարդ՚ փակ բաժնետիրական ընկերության բաժնետոմսերի առքուվաճառքի եւ հետագա գործունեության պայմանների մասին՚ համաձայնագրի քվեարկության ժամանակ տիկին Փոստանջյանը հավաքել պատգամավորների գրանցման քարտերը: ՙՀիմա դա հանցագործություն է, թե կարգազանցություն՚,- հետաքրքրվեց ԱԺ փոխնախագահը, իսկ Սուքիաս Ավետիսյանն էլ խորհուրդ տվեց Զ. Փոստանջյանին` ներողություն խնդրել այդ արարքի համար:
Զ. Փոստանջյանը հայտարարեց, որ եթե նորից նույն վիճակը լիներ, էդպես էր վարվելու, իսկ իր արարքը գողություն չի եղել, հակառակ դեպքում` իր դեմ ՀՀ գլխավոր դատախազը քրեական գործ կհարուցեր:
Զարուհի Փոստանջյանին հարց ուղղեց նաեւ Խաչատուր Քոքոբելյանը: ՙՀամեցեք, տիկին Փոստանջյան՚,- ձայնի իրավունք տվեց պատգամավորին ԱԺ փոխնախագահ Էդ. Շարմազանովը:
ՙՊրն Շարմազանով, Դուք որ նիստը վարում եք, պարբերաբար խախտում եք կանոնակարգ-օրենքը՚,- ասաց պատգամավորը, այն դեպքում, երբ ԱԺ փոխնախագահն ընդամենը ձայնի իրավունք էր տալիս` կատարելով իր պարտականությունները:
ՙՏիկին Փոստանջյան, պատասխանեք պրն Քոքոբելյանի հարցին՚,- հակադարձեց փոխնախագահը:
ՙՀիմա ես պատասխանում եմ, Դուք ընդհատում եք ինձ: Ես հուշե±մ Ձեր իրավունքների մասին՚,- ասաց պատգամավորը:
ՙԵս Ձեր գիտելիքները շատ գնահատում եմ, բայց կգաք ընդմիջմանն ինձ խորհուրդներ կտաք՚,- հեգնեց փոխնախագահը:
Հարց ու պատասխանից հետո խոսքով հանդես եկավ ԱԺ նախագահ Գալուստ Սահակյանը, ով կողմ է կարգազանց պատգամավորներին կարգի հրավիրելուն, բայց նրանց հանցագործ անվանելը չափազանցված է. ՙԷդպես որ լիներ, ուկրաինացի պատգամավորները պետք է բերդերում նստած լինեին: Ի վերջո, ԱԺ-ն մի ընտանիք է՚:
Իսկ ԱԺ փոխնախագահ Էդ. Շարմազանովն էլ կոչ արեց ուրիշի աչքի շյուղը տեսնելու փոխարեն` սեփական աչքի գերանը տեսնել:

ՍՈՆԱ ԴԱՎԹՅԱՆ