ՁԱՅՆԱՍԿԱՎԱՌԱԿ ՎԱՃԱՌՈՂՆԵՐԸ ԴԱՏԱՐԱՆ ԿԴԻՄԵ՞Ն

ՁԱՅՆԱՍԿԱՎԱՌԱԿ ՎԱՃԱՌՈՂՆԵՐԸ ԴԱՏԱՐԱՆ ԿԴԻՄԵ՞Ն

Փաստաբան Տիգրան Մուրադյանն ու  ձայնա և տեսասկավառակների վաճառքը կազմակերպող մի քանի  կրպակատերեր մոտ երկու ամիս առաջ ասուլիսով հանդես եկան եւ հայտարարեցին, որ իրավապահների կողմից հետապնդումներ են իրականացվում, մասնավորապես ոստիկանության Արաբկիրի և Մալաթիա բաժինների իրավապահները առգրավել են որոշակի քանակով ձայնա և տեսասկավառակներ: Դա արել են  ձայնասկավառակներ արտադրող «Ադամս» ընկերության հաղորդումների հիման վրա: Ընկերությունը  հաղորդում է ներկայացրել ոստիկանություն՝ասելով, որ ձայնասկավառակների վաճառքով զբաղվող կրպակատերերը ապօրինի  վաճառում են իր արտադրանքը, բայց փաստաբանը պնդում է՝ առգրավված ձայնասկավառակների 90%-ը  չի պատկանում  «Ադամսին»:

Տիգրան Մուրադյանը մի քանի կրպակատիրոջ անունից  գրավոր բողոք էր ուղարկել  դատախազություն՝ պահանջելով  պարզել՝ Արաբկիրի և Մալաթիայի բաժինների աշխատակիցների կողմից «Ադամս» ընկերության  աշխատակցի ցուցումով մեր կրպակներից քանի սկավառակներ են վերցրել, որոնք չեն պատկանում «Ադամս» ընկերությանը:

«Իրավունքը» փաստաբան Տիգրան Մուրադյանից պարզեց՝գործին ինչ ընթացք է տվել դատախազությունը:  Պարզվում է՝ գործն ուղարկվել է  ոստիկանության ներքին  անվտանգության վարչություն: Սակայն խնդիրը, ըստ փաստաբանի, այն է, որ իրենք  վիճարկում են ոչ թե  կարգապահական, այդ դատավարական իրավունքի խախտում են վիճարկում: Հետեւաբար, գործը պետք է քննի Հատուկ քննչական ծառայությունը: «Մոտ քսան օր է՝ ոչ մի տեղեկություն չենք ստացել:Մեզ պետք է տասն օրվա ընթացքում պատասխանեին»,- մանրամասնեց Մուրադյանը:

Փաստաբանի խոսքով՝  իրենք առայժմ սպասում են  ոստիկանության ներքին  անվտանգության վարչության պատասխանին: «Ընդհանրապես դժգոհ եմ գործին ընթացք տալու պատշաճությունից ու օպերատիվությունից: Եթե ոստիկանության ներքին  անվտանգության վարչությունից պատասխան չստացանք, նորից բողոք  կգրենք: Պատշաճ արձագանք  չստանակու դեպքում  հավանաբար, դատարան կդիմենք»,- ասաց Տ. Մուրադյանը:

Փաստորեն, ասուլիսի կարծես թե միակ դրական կողմն  այն  է, որ դրանից հետո ինչպես մեզ հետ զրույցում հավաստիացրեց ձայնասկավառակ վաճառող Համեստ Խաչատրյանը, Ադամս ընկերությունից   բողոքի ձայն բարձրացրած ձայնասկավառակ վաճառողներին չեն անհագստացրել: «Առայժմ խաղաղ պայմաններում աշխատում ենք»,- եզրափակեց Համեստ Խաչատրյանը:

Սոնա Դավթյան