«ԴԵՐԱՍԱՆԸ ՍԽԱԼ ՊԱՐԱՆ Է ԲՌՆԵԼ». ՎԱՆԱՁՈՐԻ ԹԱՏՐՈՆԻ ՓՈԽՏՆՕՐԵՆԻ ՊԱՐԶԱԲԱՆՈՒՄԸ

«ԴԵՐԱՍԱՆԸ ՍԽԱԼ ՊԱՐԱՆ Է ԲՌՆԵԼ». ՎԱՆԱՁՈՐԻ ԹԱՏՐՈՆԻ

ՓՈԽՏՆՕՐԵՆԻ ՊԱՐԶԱԲԱՆՈՒՄԸ

«Իրավունքն» օրեր առաջ   անդրադարձել էր սեպտեմբերի 30-ին Վանաձորի Հովհաննես Աբելյանի անվան դրամատիկական թատրոնում տեղի ունեցած դեպքին:

Հիշեցնենք՝ «Լիր արքա» ներկայացման ժամանակ պարանը պոկվել էր,  դերասանը երկու մետր բարձրությունից ընկել էր, կոտրել աջ թեւը եւ աջ կոնքը:

Այսօր «Իրավունքը» դեպքի առնչությամբ պարզաբանում ստացավ  Վանաձորի  Հովհաննես Աբելյանի անվան դրամատիկական թատրոնի փոխտնօրեն Արամ Մխիթարյանից: Մինչ այդ, իհարկե, փորձեցինք թատրոնի տնօրեն Հովհաննես Չախմախչյանից մեկնաբանություն ստանալ, սակայն վերջինս, հասկանալով  ինչի համար ենք իրեն զանգահարել, ասաց՝ խորհրդակցության է եւ խորհուրդ տվեց կապ հաստատել թատրոնի փոխտնօրենի հետ, ով  դեպքի օրը թատրոնում է եղել:

Արամ Մխիթարյանը մեզ հետ զրույցում ասաց, որ նման բան բոլորի հետ կարող էր տեղի ունենալ: «Դերասանը սխալ պարան է բռնել: Օգտագործվող պարանի փոխարեն դեկորատիվ պարան է բռնել»,- պարզաբանեց  թատրոնի փոխտնօրենը:

Նրա խոսքով՝  մինչ ներկայացումը փորձերի ժամանակ  ստուգվում են դերասանների կողմից օգտագործվող բոլոր  պարանները. «Ձեւավորումը պարաններով է  արված: Մոտ  40  պարան է կախված, որոնցից մի մասը  օգտագործվող  է, մի մասը՝ դեկորատիվ: Պետք է դերասանը 1 մետր 70 սմ-անոց պարանը բռներ ու սահելով իջներ ներքեւ:Բայց բռնել է դեկորատիվ պարանը, որն էլ ծանրությունից պոկվել  է: Տեխնիկական խնդրի մասին խոսք լինել չի կարող: Իրավապահները եկել, ստուգել են, դերասանն էլ պնդել է, որ սխալ պարան է բռնել»:

Տուժող դերասան Վասիլ Նազլուխանյանը դեռ հիվանդանոցում է: Մեզ հետ զրույցում նա ասաց, որ աստիճանաբար ապաքինվում է: Դերասանի կոտրված  թեւը գիպսի մեջ է եւ ինչպես ասել են  բժիշկները, մոտ մեկ ամիս էլ  գիպսի մեջ  կմնա. «Իսկ կոնքիս վերականգնման համար ժամանակ է   անհրաժեշտ, չեմ կարողանում ոտքս գետնին դնել»:

Ապաքինվելուց հետո դերասանը կկարողանա նորից թատրոնում  խաղալ: Համենայնդեպս, բժիշկներն այդպես են ասել:

Իսկ ո՞վ է հոգում դերասանի  բուժման  ծախսերը: «Դե ես բժշկական ապահովագրությունից եմ օգտվում, բացի այդ թատրոնի տնօրենն ասել է՝ բոլոր ծախսերը թատրոնը վերցնում է իր վրա: Բայց մինչ այս պահը տնօրենին դիմելու կարիք չի զգացվել: Դեռ իմ ապահովագրության շնորհիվ ամեն ինչ հոգում եմ»,- պատասխանեց պարոն Նազլուխանյանը:

Թատրոնի փոխտնօրենից պարզեցինք՝եթե դերասանն է, ըստ էության, պատասխանատու տեղի ունեցած դեպքի համար, ինչո՞ւ է թատրոնի տնօրինությունը որոշել  ֆինանսապես աջակցել դերասանին  հիվանդանոցի ծախսերը հոգալու համար: «Մենք կորցրե՞լ ենք մեր արժանապատվությունը, մարդկային վերաբերմունքը: Դրա համար էլ մեր ազգը կործանվում է: Դա ընդամենը  մեր ցանկությունն է: Ես էլ կարող եմ տուժող դերասանին աջակցել, դա ո՞ւմ խնդիրն է»,- եզրափակեց Արամ Մխիթարյանը

ՀՀ ոստիկանության հասարակայնության հետ կապերի եւ լրատվության բաժնից մեզ փոխանցեցին, որ դեպքի առնչությամբ  կատարվում է  հետաքննություն:

Սոնա Դավթյան