«ՎԱՇԽԱՌՈՒԻ ՓԱՍՏԱԲԱՆԸ ԴԱՏԱՐԱՆՈՒՄ «ԲԼԹՑՆՈՒՄ ԷՐ»

«ՎԱՇԽԱՌՈՒԻ ՓԱՍՏԱԲԱՆԸ ԴԱՏԱՐԱՆՈՒՄ «ԲԼԹՑՆՈՒՄ ԷՐ»

Վարչական դատարանում երեկ՝ժամը 11:00-ին,  տեղի է ունեցել  Բաբաջանյան  փողոցի 103 շենքի  22 Սողոմոնյանների բնակարանի գործով հերթական դատական նիստը: Այս ընտանիքի պատմությանը «Իրավունքը» մի քանի հրապարակումներում անդրադարձել է:

Հիշեցնենք, որ բնակարանը կորցնելու վտանգի առաջ կանգնած Հովհաննես Սողոմոնյանի բնութագրմամբ վաշխառու Նորիկ Տեր-Գրիգորյանը ցանկանում է վերականգնել սույն հասցեում գտնվող բնակարանի առք ու վաճառքի շինծու պայմանագիրը: Նորիկ Տեր-Գրիգորյանը, ում Հովհաննես Սողոմոնյանը համարում է վաշխառու, որպես հայցվոր կողմ, դատի է տվել կադաստրի պետական կոմիտեին, թե ինչու է այդ կառույցը սեփականատեր ճանաչել Հովհաննես Սողոմոնյանին, ով դատական այս գործում երրորդ կողմ է հանդես գալիս:

«Իրավունքի» հետ զրույցում  բնակարանի սեփականատեր Հովհաննես Սողոմոնյանն ասաց, որ երեկվա դատական նիստում  հայցվոր կողմը նորից պնդել է իր պահանջը, իսկ պատասխանող կողմը փորձել ապացուցել  պահանջի անօրինական  լինելը: Նորիկ Տեր-Գրիգորյանը, ինչպես այս, այնպես էլ նախորդ դատական նիստին ներկա չի եղել: «Նա երբեք նման տեղեր չի գնում: Երեսատեղ ունի՞, որ գնա»,- ասաց Սողոմոնյանը:

Հայցվոր Տեր-Գրիգորյանի փաստաբանն էլ կրկնում է նույն բանը՝ Նորիկը ոչ թե վաշխառու է, այլ բարեխիղճ գնորդ: «Ինչպես ժողովուրդն է ասում, Նորիկը փաստաբանը բլթցնում էր դատարանում: Կարծում եմ՝ դատարանը մեր օգտին վճիռ կկայացնի»,- ասաց  մեր զրուցակիցը:

Սույն գործով դատական վճիռը կհրապարակվի հոկտեմբերի 22-ին 17:30-ին:

Փորձեցինք զրուցել նաեւ Նորիկ Տեր-Գրիգորյանի հետ, ով, սակայն, «ժամանակ չունեմ» պատճառաբանությամբ անջատեց հեռախոսը:

Ի դեպ, տեղեկացնենք, որ սույն դատական գործի պատճառով Սողոմոնյանների ընտանիքը չի կարողանում  բնակարանը վաճառել` մի երիկամ ունեցող իրենց թոռանը բուժման տանելու նպատակով: Երեխային ֆինանսապես աջակցելու համար «Արարատ» բանկում բացվել է հաշվեհամար՝ 1510004370130100:

Սոնա Դավթյան