ԱՇԽԱՐՀԱՀՌՉԱԿ ԴԱՇՆԱԿԱՀԱՐ ԱԼԵՔՍԵՅ ԼՅՈՒԲԻՄՈՎԸ` ՀԱՅ ԲԵՄՈՒՄ

ԱՇԽԱՐՀԱՀՌՉԱԿ ԴԱՇՆԱԿԱՀԱՐ

ԱԼԵՔՍԵՅ ԼՅՈՒԲԻՄՈՎԸ` ՀԱՅ ԲԵՄՈՒՄ

«Երևանյան Հեռանկարներ» 15-րդ միջազգային երաժշտական փառատոնի շրջանակներում հոկտեմբերի 8-ին Արամ Խաչատրյան համերգասրահում մենահամերգով հանդես կգա աշխարհահռչակ ռուս դաշնակահար ԱԼԵՔՍԵՅ ԼՅՈՒԲԻՄՈՎԸ: Այդ երեկո դաշնակահարի կատարմամբ կհնչեն Մոցարտի, Շուբերտի, Կոմիտասի և Դեբյուսիի ստեղծագործությունները:

Այս տարի «Երևանյան Հեռանկարները» փառատոնը մեկնարկեց մեծանուն կոմպոզիտոր Քշիշտոֆ Պենդերեցկու 80-ամյա հոբելյանին նվիրված հինգ համերգներով, այնուհետև, կայացավ Ելենա Բաշկիրովայի մենահամերգը, իսկ մայիսի 13-ին տեղի ունեցավ Բեռլինի պետական նվագախմբի (Staatskapelle Berlin) հիշարժան համերգը` Դանիել Բարենբոյմի ղեկավարությամբ:

Իր հոբելյանական 15-րդ տարում, «Երևանյան Հեռանկարները» ընդգրկվեց Բրյուսելում կայացած կրթության, մշակույթի, բազմալեզվության և երիտասարդության հարցերով Եվրակոմիսար Անդրուլա Վասիլիուի հետ կայացած կլոր սեղանի մասնակիցների շարքում, և համարվեց Եվրոպայի առաջատար մեկ տասնյակ փառատոներից մեկը:

Մոսկվայում ծնված ականավոր ռուս դաշնակահար Ալեքսեյ Լյուբիմովին հիրավի համարում են մեր իրականության ամենակրթված և բազմակողմանի, ամենագունեղ և ինքնատիպ երաժիշտ կատարողներից մեկը, ում անսահման նվիրվածությունը երաժշտությանը և ​​բարոյական սկզբունքներին դարձրել է նրան մի ուշագրավ բացառություն այսօրվա երաժշտական ​​ասպարեզում:

1968թ. ավարտելով Մոսկվայի կոնսերվատորիան Հ. Նեյհաուզի և Լ. Նաումովի մոտ, Ա. Լյուբիմովը դարձել է մի քանի հեղինակավոր միջազգային մրցույթների դափնեկիր, և արժանացել միջազգային լայն ճանաչման: Նա համերգներով հանդես է եկել Եվրոպայում, Հյուսիսային Ամերիկայում, Ճապոնիայում։ Ելույթներ է ունեցել Հելսինկիի, Իսրայելի, Լոս Անջելեսի, Մյունխենի և Սանկտ-Պետերբուրգի ֆիլհարմոնիկ, Լոնդոնի Թագավորական ֆիլհարմոնիկ, Ռուսաստանի ազգային նվագախմբերի, Ռադիո Ֆրանսի, Թորոնթոյի սիմֆոնիկ և Բեռլինի Գերմանական սիմֆոնիկ նվագախմբերի հետ։ Համագործակցել է դիրիժորներ՝ Աշկենազիի, Յարվիի, Կոնդրաշինի, Հոգվուդի, Մաքերասի, Նագանոյի, Նորինգթոնի, Պլետնևի, Սարաստեի, Սալոնենի, Յանովսկիի և Տորտելիեի հետ։ Պատմական ելույթներ է ունեցել «Լուսավորության դարի նվագախմբի», «Վիեննայի ակադեմիայի» և «Գենտի Կոլեգիա վոկալե» խմբերի հետ։

Ռուսաստանի Դաշնության ժողովրդական արտիստ Ալեքսեյ Լյուբիմովի երկացանկը ահռելի է և ընդգրկում է մի քանի դարաշրջան, որտեղ հավասար տեղ է հատկացված կլավիրային երաժշտությանը` Շամբոնյերից մինչև Բախ և Մոցարտ, բարոկկո և ժամանակակից կոմպոզիտորների երաժշտությանը Շնիտկեից մինչև Պյարտ և Սիլվեստրով, Կնայֆել, Ռայխ, Նոնո, Լիգետի, Այվզ, Շյոնբերգ, Վեբեռն, Շտոկհաուզեն, Բուլեզ, Այվզ, Լիգետի, Գուբայդուլինա և Քեյջ:

Կամերային երաժշտության ասպարեզում պարբերական ելույթներ է ունենում փառատոներում հայտնի մենակատարների և համույթների հետ` ողջ աշխարհում։ Վերջին համերգաշրջանում նա համերգներ է ունեցել Բիրմինգհեմի սիմֆոնիկ նվագախմբի, Մոսկվայի Ռուսաստանի ազգային նվագախմբի և Թոնքյունսթլերօրքեսթերի (երկու համերգ Վիեննայի Մյուզիքվերայնի մեծ դահլիճում), ինչպես նաև բազմաթիվ մենահամերգներ։ Շրջագայել է «Հայդն» սիմֆոնիետայի, Իտալական Շվեյցարիայի նվագախմբի, Կամերատա Զալցբուրգի, Վիեննայի ռադիոյի սիմֆոնիկ նվագախմբի, Տամպերեի ֆիլհարմոնիկ նվագախմբի հետ։ Այլ կատարումներից են Սկրյաբինի «Պրոմեթևսը» Զալցբուրգի փառատոնում, Մյունխենի ֆիլհարմոնիկի, Շթութգարդի ռադիոյի սիմֆոնիկ, Բեռլինի Գերմանական սիմֆոնիկ, Դանիական ազգային սիմֆոնիկ նվագախմբերի  հետ:

Ա. Լյուբիմովն իրականացրել է ժամանակակից երաժշտության բազմաթիվ պրեմիերաներ Ռուսաստանում և այնտեղ հիմնադրել «Այլընտրանք» երաժշտական ​​փառատոնը:

Լ. ԵՂԻԱԶԱՐՅԱՆ