ԻՍԱՀԱԿՅԱՆԻ ԱՆՎԱՆ ԳՐԱԴԱՐԱՆԸ ԽԼՈՒՄ Է ԸՆԹԵՐՑՈՂՆԵՐԻՑ ԿԱՐԴԱԼՈՒ ԻՐԱՎՈՒՆՔԸ

ԻՍԱՀԱԿՅԱՆԻ ԱՆՎԱՆ ԳՐԱԴԱՐԱՆԸ ԽԼՈՒՄ Է ԸՆԹԵՐՑՈՂՆԵՐԻՑ
ԿԱՐԴԱԼՈՒ ԻՐԱՎՈՒՆՔԸ

Վերջին շրջանում Երեւանի գրանցում չունեցող ուսանողները բողոքում էին, որ Ավետիք Իսահակյանի անվան կենտրոնական գրադարանը յուրաքանչյուր կիսամյակի ավարտին` քննական շրջանում, իրենց չի սպասարկում: Ոչ ոքի համար էլ գաղտնիք չէ, որ մարզերում գրադարանները, մեղմ ասած, անմխիթար վիճակում են: Դրանք կամ հիմնականում չեն գործում, կամ էլ չունեն համապատասխան գրականություն: Ըստ ուսանողների` միակ հույսը Ավ. Իսահակյանի անվան կենտրոնական գրադարանն է` այնտեղ կա համապատասխան գրականություն: Սակայն այս դեպքում էլ` կա խնդիր: Յուրաքանչյուր կիսամյակի վերջում` քննական շրջանում, մարզերի գրանցում ունեցող ուսանողները չեն սպասարկվում գրադարանի կողմից, քանի որ լրանում է տեղեկանքների սահմանված ժամկետը:
ՙԻրավունքի՚ հետ զրույցում Ավ. Իսահակյանի անվան կենտրոնական գրադարանի գիտական բաժնի վարիչ Ռուզան Մեսրոպյանը պատճառաբանեց, որ գրադարանը քաղաքային է, իսկ դա ենթադրում է, որ գրադարանը սպասարկում է միայն Երեւանի քաղաքացիներին. ՙՄենք ունենք 34.000 ընթերցող, որի 70%-ը Երեւանի գրանցում չունեն: Նրանք, բնականաբար, մարզերից են, եւ որպեսզի կարողանանք նրանց եւս սպասարկել, մշակել ենք այսպիսի մի սկզբունք: Կապ ենք պահպանում համալսարանների հետ եւ ընդունում տեղեկանք, որ տվյալ ուսանողը սովորում է տվյալ բուհում: Մենք պարզապես ստիպված ենք տարեկան երկու անգամ պահանջել տեղեկանք: Իսկ դա պայմանավորված է նրանով, որ յուրաքանչյուր կիսամյակի ավարտին մարզերի երեխաները գնում են Երեւանից, եւ որպեսզի նրանք գրքերն իրենց հետ չտանեն` իսկ այդպիսի դեպքեր շատ են եղել, մենք ստիպված ժամկետ ենք սահմանում` սեպտեմբեր ամսից մինչեւ դեկտեմբերի 15-ը, եւ հունվարից մինչեւ հունիս: Երկու անգամ տեղեկանք պահանջելը նպատակ ունի, որպեսզի նրանք զգույշ ու պարտաճանաչ վարվեն գրքերի հետ՚:
ՙԻրավունքի՚ այն հարցին, թե Երեւանի գրանցում չունեցող անձինք, բացի ուսանողներից, ուրիշ ի±նչ կարգավիճակով կարող են օգտվել գրադարանից, տիկին Ռուզանը պատասխանեց. ՙՄենք ունենք տարբերակներ, որոնց միջոցով սպասարկում ենք Երեւանի գրանցում չունեցող ընթերցողներին: Նրանք կարող են օգտվել ընթերցասրահից, այստեղ` գրադարանում կարդալ: Կամ էլ, ունենալով Երեւանի գրանցում ունեցող երաշխավոր` կարող են օգտվել գրադարանից: Այսինքն` պետք է իրենց հետ ներկայացնեն Երեւանի գրանցում ունեցող մեկին, ով իրենց կերաշխավորի: Այդ դեպքում նրանք սպասարկման հետ կապված` ոչ մի խնդիր չեն ունենա՚:
Առաջին հայացքից կարելի է ենթադրել, որ առանց այդ էլ, ՙչընթերցասեր՚ երիտասարդ սերունդը նման խոչընդոտների դեպքում ավելի կամրապնդի ՙչընթերցասիրությունը՚: Բայց ցանկացած իրավիճակում էլ ելք կա, պարզապես այն գտնել է պետք:

Կույտը մշակեց ՀԱՍՄԻԿ ՄԱՆՈՒԿՅԱՆԸ