ՄԻ ԿԱԹԻԼ ԱՐՅՈՒՆ

ՄԻ ԿԱԹԻԼ ԱՐՅՈՒՆ

Ոստիկանությունը չի շտապում չճշտված ՙհավելյալ՚ տեղեկություններ հայտնել սեպտեմբերի 27-ին մայրաքաղաքի Տերյան 19 հասցեում գործող գարեջրատուն-ռեստորանում տեղի ունեցած սպանության մասին: Կարծում եմª ճիշտ է անում, քանի որ արյունալի բախման եւ հանցագործության դրդապատճառները չի կարելի համարել ստույգ, քանի դեռ դրանց մասին չի արտահայտվել հանցագործը: Իսկ նա հետախուզման մեջ է...
Փոխարենը` լուրեր են շրջանառվում, թե դաժան հաշվեհարդարի պատճառը մի կաթիլ արյունն էր, որը վիճաբանողներից մեկի մատից ընկել էր մյուս վիճաբանողի վրա: Մեկ բան սակայն փաստված է. մինչ այս դեպքը, գարեջրատունը վայելում էր քաղաքակիրթ վայրի համբավ, ուր այցելում էին հասարակական, քաղաքական գործիչներ, արտասահմանից ժամանած հյուրեր: Սպանվողը գարեջրատան տնօրենն էր...


ԾՈՎԱԿՑԻ ՀՈՐՆ ՈՒ ՈՐԴՈՒՆ
ԾԵԾԻ ԵՆԹԱՐԿՈՂՆԵՐԻՑ ԵՎՍ ՄԵԿՆ Է ՀԱՅՏՆՎԵԼ

Սեպտեմբերի 20-ին Երեւան-Վարդենիս ավտոճանապարհին տեղի ունեցած դաժան ծեծի մասնակիցներից եւս մեկը` Մարտին Հակոբյանը, երեկ կամավոր ներկայացել է Գավառի ոստիկանություն: Այս մասին մեզ տեղեկացրին Ոստիկանության հասարակայնության հետ կապերի վարչությունից: Մ. Հակոբյանը խոստովանել է, որ մասնակցել է այդ պատմությանը:


ԳՈՂՈՒԹՅՈՒՆ ԿԱՏԱՐԵԼՈՒ ՀԱՄԱՐ ՄԵՂԱԴՐԱՆՔ Է
ԱՌԱՋԱԴՐՎԵԼ ՈՍՏԻԿԱՆԻՆ

Մի խումբ անձանց կողմից նախնական համաձայնությամբ գողություն կատարելու համար ՀՀ ոստիկանության Քանաքեռ-Զեյթուն բաժնի հետաքննության բաժանմունքի տեսուչ, ոստիկանության լեյտենանտ Ռազմիկ Կարապետյանին մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 1-ին կետով: Քրեական գործը մեղադրական եզրակացությամբ հանձնվել է նախաքննության նկատմամբ հսկողություն իրականացնող դատախազին` այն հաստատելու եւ դատարան ուղարկելու համար: