ՙՙԵՎՐԱՍԻԱԿԱՆ ՄԻՈՒԹՅԱՆ ՀԻՄՔԵՐԻ ՀԻՄՔԸ ԻՐԱՎԱՀԱՎԱՍԱՐՈՒԹՅՈՒՆՆ Է՚

ՙԵՎՐԱՍԻԱԿԱՆ ՄԻՈՒԹՅԱՆ ՀԻՄՔԵՐԻ ՀԻՄՔԸ ԻՐԱՎԱՀԱՎԱՍԱՐՈՒԹՅՈՒՆՆ Է՚

Այլեւս օրերի հարց է, որ Հայաստանը կդառնա Եվրասիական միության անդամ, իսկ թե այս փուլում նոր միության անդամակցումն ինչ խոչընդոտների առաջ կկանգնեցնի Հայաստանին կամ ինչպիսի օգուտներով դուրս կգա, ՙԻրավունքը՚ պարզեց ԱԺ ՀՀԿ խմբակցության պատգամավոր ՍԱՄՎԵԼ ՆԻԿՈՅԱՆԻՑ:
Արդյոք Հայաստանը ԵՏՄ-ում կստանա լիարժեք արտոնություններ ու պարտավորություններ, ինչպես Միության հիմնադիր երկրներն ունեն:
- Լիարժեք անդամակցություն եւ դրանից բխող իրավունքներ ու պարտականություններ, իհարկե, կունենանք: Վերջիվերջո, դա իրավահավասարների միություն է, հետեւաբար անդամագրվելով` անպայմանորեն այդ պայմանը պետք է բավարարվի: ԵՏՄ-ի հիմքերի հիմքը իրավահավասարությունն է, այսինքն` այստեղ այլ խոսք, այլ մոտեցում չի կարող լինել:
- Իսկ այս փուլում ինչ խոչընդոտների կարող ենք հանդիպել ԵՏՄ-ի անդամակցման ճանապարհին:
- Սա բարդ գործընթաց է: Հիշեք եվրաասոցացման ճանապարհին ինչ դժվարություններ եղան, քանի տարի այդ գործընթացը քննարկում էին, մշակում, համապատասխանեցնում, օրենսդրական փոփոխություններ անում: Եվ պետք չէ այսօր ենթադրել, թե Մաքսային եւ Եվրասիական տնտեսական միությունը շատ ավելի հեշտ ու պարզ կառույց է, որովհետեւ այստեղ յուրաքանչյուր երկիր անդամակցում է` իր երկրի տնտեսական եւ քաղաքական շահը ունենալով: Իհարկե, երեք պետությունները` Ռուսաստանը, Բելառուսը եւ Ղազախստանը, այսօր ունեն ընդհանուր տնտեսական, քաղաքական շահ, բայց, միեւնույնն է, յուրաքանչյուրն ունի իր առանձինը, այլապես չէին մտնի այդ միության մեջ: Եվ միության այս նոր համալրման ժամանակահատվածում, բնականաբար, շատ ավելի պետք է երեւային տարբեր երկրների դիրքորոշումները պետությունների ղեկավարների հայտարարությունների միջոցով: Եվ այս փուլում կարող են հայտարարություններ հնչել, որը թվում, թե չի բխում Եվրասիական միության զարգացման հեռանկարից եւ այլն, բայց դրան էլ պետք է շատ բնական մոտենալ: Սրանք գործընթացներ են, որոնց միջով ե°ւ այս միության հիմնադիրները պետք է անցնեն, ե°ւ նրանք, ովքեր նոր են պատրաստվում մտնել այդ միություն: Այնպես որ, որեւիցե մի տեղ որեւիցե մեկի համար հեշտ չէ: Ավելին` որեւիցե տեղ դռները բացած ու ցափահարություններով չեն սպասում, այլ դու պետք է գնաս, տեսնես, թե որտեղ կարող ես լավագույնս քո երկրի տնտեսական եւ քաղաքական, ինչու չէ, նաեւ անվտանգության շահերը գտնել: Սա բարդ ճանապարհ է, եւ երբ նշանակում են ինչ-որ օր, ամիս, ժամ, ինձ համար դրանք երկրորդական են: Կարեւորն այն է, որ մենք մեր դիրքորոշումը արտահայտել ենք, եւ որեւէ բացասական վերաբերմունք չկա, իսկ թե որ ամսի ու որ օրը կլինի անդամակցումը, ինձ համար երկրորդական հարցեր են:

ՀՐԱՆՏ ՍԱՐԱՖՅԱՆ