ՙ«ՍԵՌԱԿԱՆ ԿՅԱՆՔԻ ՎԱՂԱԺԱՄ ԶԱՐԹՈՆՔԸ ԿԱՐՈՂ Է ՍԵՌԱՎԱՐԱԿՆԵՐԻ ԵՎ ԱՆՑԱՆԿԱԼԻ ՀՂԻՈՒԹՅԱՆ ՊԱՏՃԱՌ ԴԱՌՆԱԼ»

«ՍԵՌԱԿԱՆ ԿՅԱՆՔԻ ՎԱՂԱԺԱՄ ԶԱՐԹՈՆՔԸ ԿԱՐՈՂ Է
ՍԵՌԱՎԱՐԱԿՆԵՐԻ ԵՎ ԱՆՑԱՆԿԱԼԻ ՀՂԻՈՒԹՅԱՆ ՊԱՏՃԱՌ ԴԱՌՆԱԼ»

- Ե՞րբ, ո՞ր տարիքից եւ ո՞վ պետք է երեխաների հետ խոսի սեռական դաստիարակությունից: Ո՞ր տարիքից կարելի է ապրել սեռական կյանքով: Ի՞նչ անցանկալի հետեւանքներով է հղի վաղաժամ սեռական կյանքը:

Հարցին պատասխանել է ԵՊԲՀ սեքսոպաթոլոգիայի կլինիկայի բժիշկ-սեքսոպաթոլոգ, սեքսոլոգիայի ամբիոնի դասախոս, բ.գ.թ.ՎՐԵԺ ՇԱՀՐԱՄԱՆՅԱՆԸ.

-Սեռակրթությունն ընդհանուր դաստիարակության անբաժանելի մասն է, հետեւաբար, պետք է սկսել կյանքի առաջին օրերից: Գոյություն ունի այն թյուր կարծիքը, թե սեռական դաստիարակությունը դպրոցում լսած դասախոսություն է կամ լուրջ խոսակցություն տանը` ծնողների հետ: Սա չափազանց նեղ մոտեցում է սեռական դաստիարակության հարցին: Եթե երեխաներն այդ մասին ճիշտը չիմանան` կտեղեկանան անառողջ ճանապարհով: Սեռական դաստիարակությունը շատ ավելի լայն խնդիր է, քան երեխաների աշխարհ գալու հարցը: Այն ամփոփում է տղամարդկանց եւ կանանց փոխհարաբերությունների եւ կյանքում նրանց կատարած համապատասխան դերի հարցերը: Օրինակ` տղայի հայրը վատ է վերաբերվում մորը, կոպիտ է վարվում նրա հետ: Ոչ մի դասախոսություն երեխային չի ապացուցի, թե ամուսնությունը փոխադարձ սիրո ու հարգանքի միություն է: Նրա կենսափորձն այլ բան է ասում, եւ նա հետագայում անընդհատ կպատկերացնի լավ ծանոթ կոպիտ փոխհարաբերություների տեսարանը: Այսպիսով, երեխայի սեռական դաստիարակությունն սկսվում է ծնողների փոխհարաբերություններից: Սեռական դաստիարակության խնդիրն է` նպաստել մատաղ սերնդի ներդաշնակ զարգացմանը, սեռական վարքի եւ մանկածնության գործառույթի ձեւավորմանը, ամուսնության եւ ընտանիքի ֆիզիոլոգիական եւ բարոյական հիմքերի ստեղծմանը: Երեխաների սեռական լիարժեք դաստիարակությունը ներառում է նաեւ մինչ սեռական հասունացման շրջանը: Սեռական դաստիարակությունը պետք է տարբերել սեռական լուսավորությունից, որի էությունը դեռահասներին ֆիզիոլոգիական, սեռաբանական, սանիտարահիգիենիկ եւ սեռական կյանքի այլ տեղեկություններին ծանոթացնելն է: Այն սովորաբար սկսվում է ութերորդ դասարանից:
Սեռական կյանքի սկզբի շարժառիթները տարբեր են եւ պայմանավորված չեն սիրով ու սեռական պահանջով:  Մտերմիկ շփման կարիք, հետաքրքրություն, զուգընկերոջ թախանձ, հասակակիցների օրինակ, ինտերնետ եւ էրոտիկ բնույթի զանազան հեռուստահաղորդումներ` ահա դրանց ոչ լրիվ թվարկումը: Ընդ որում որքան վաղ է սկսվել սեռական կյանքը` այնքան քիչ է այն սիրով պայմանավորված եղել: Ծնողները հասկանալի պատճառներով իրենց զավակների վաղաժամ սեռական  կյանքի սկսմանը վերաբերվում են բացասաբար: Միաժամանակ նրանք պետք է իմանան, որ դա կարող է ավելի վաղ տեղի ունենալ, եթե ընտանիքում դրվածքը թույլ է եղել, եթե դեռահասները ստացել են սեռական սխալ դաստիարակություն: Խորհուրդ տալ, թե երբ է հարկավոր սկսել ապրել սեռական կյանքով, դժվար է, դա պայմանավորված է սեռական դաստիարակության առանձնահատկություններով, ընդհանուր զարգացմամբ, սեռական հասունության ձեւավորմամբ, տվյալ հասարակության մեջ գործող ավանդույթներով եւ տիրող բարոյահոգեբանական մթնոլորտով, ինչպես նաեւ շատ ու շատ այլ գործոններով:
Այնուամենայնիվ, թե° տղայի, թե° աղջկա համար սեռական կյանքի սկիզբը ցանկալի է, որ լինի 18 տարեկանից հետո, քանի որ սեռական լրիվ հասունացումը տեղի է ունենում այդ տարիքում, ավարտվում է մարդու մտավոր եւ հոգեբանական ընդհանուր ձեւավորումը, այլ կերպ ասած` մարդն այդ տարիքում ի վիճակի է պատասխան տալ սեփական արարքների համար: Սեռական կյանքի վաղաժամ զարթոնքը կարող է սեռավարակների եւ անցանկալի հղիության պատճառ դառնալ, քանի որ պատանեկան տարիքում սեռական կյանքի այբուբենին, որպես կանոն, շատերը ծանոթ չեն:

ՎԼԱԴ ՄՈՒՐԱԴՅԱՆ