ՀԱՅԿ ՕՐԴՅԱՆ. «ԵԹԵ ՈՒԶՈՒՄ ԵՍ ՃԱՆԱՉԵԼ ՌԵԺԻՍՈՐԻՆ` ԴԻՏԻՐ ՆՐԱ ՖԻԼՄԵՐԸ...»

ՀԱՅԿ ՕՐԴՅԱՆ. «ԵԹԵ ՈՒԶՈՒՄ ԵՍ ՃԱՆԱՉԵԼ ՌԵԺԻՍՈՐԻՆ` ԴԻՏԻՐ ՆՐԱ ՖԻԼՄԵՐԸ...»

Սեպտեմբերի 30-ին «Մոսկվա» կինոթատրոնի կարմիր դահլիճում տեղի ունեցավ ռեժիսոր ՀԱՅԿ ՕՐԴՅԱՆԻ «Գաղափարի ուժը» փաստավավերագրական ֆիլմի պրեմիերան: Ֆիլմում ներկայացված էր «Գևորգյան մարտարվեստի դպրոց» հայրենասիրական-երիտասարդական կենտրոնի գործունեությունը: ինչպես նաեւ Արցախի հերոս, գեներալ-մայոր Արկադի Տեր-Թադևոսյանի, գեներալ-մայոր Ֆելիքս Գզողյանի, քաղաքական, հասարակական, մշակութային գործիչներ, մտավորականների, երիտասարդների դիտարկումները ազգային գաղափարների շուրջ:

Ըստ «Գևորգյան մարտարվեստի դպրոց» հայրենասիրական-երիտասարդական կենտրոնի հիմնադիր և տնօրեն Գևորգ Գևորգյանի ֆիլմը բարձրաձայնում է ազգային արժեքների քարոզչության, Հայաստանում ապրելու, արարելու, և ի նպաստ պետականության գործելու կարևորությունը:

Ֆիլմի պրեմիերային ներկա էին ողջ ստեղծագործական կազմը, Գևորգ Գևորգյանի ընկերները, բարեկամները, դպրոցի սաներն ու պարզապես հայկական մարտարվեստով հետաքրքրված մարդիկ. «Ես շատ ուրախ եմ, որ դահլիճն այսքան լիքն է:Սա նշանակում է, որ մենք իսկապես ունենք հայրենասեր երիտասարդներ, ովքեր չեն խուսափում իրենց հայենիքն ըստ արժանվույն ճանաչել: Հպարտ եմ նրանցով և հույս ունեմ, որ այսօր այս ֆիլմից նրանք իրենց հետ կտանեն վերջինիսհիմնական գաղափարը` հայենասիրությունն ու հայրենիքում մնալու, գործելու գիտակցությունը»,-նշեց ԳԵՎՈՐԳ ԳԵՎՈՐԳՅԱՆԸ:

Ֆիլմի ռեժիսոր ՀԱՅԿ ՕՐԴՅԱՆԻ կարծիքով ևս այսպիսի ֆիլմերը մեծ կարևորություն ունեն հայ երիտասարդների դաստիարակության գործում.«Եթե ուզում ես ճանաչել ռեժիսորին` դիտիր նրա ֆիլմերը, հակառակ դեպքում լսիր նրա խոսքը: Չեմ ցանկանա երկար խոսել և կասեմ ֆիլմի հետ կապված ամենակարևոր բանը. Այսօրվա սերնդի դաստիարակության համար  կարևոր են նման ֆիլմերը:Մի կողմից դրանցում քարոզվում է հայրենասիրություն, մյուս կողմից էլ դրանց ճանաչողական մեծ նշանակություն ունեն: Կոնկրետ այս ֆիլմի շնորհիվ կարելի է բացահայտել, որ մենք ունենք հայկական մարտարվեստ կան մարդիկ, ովքեր զբաղվում են դրա պահպանմամբ և տարածմամբ»:

Ֆիլմում ներկայացված էր «Գևորգյան մարտարվեստի դպրոց» հայրենասիրական-երիտասարդական կենտրոնի առօրյան:Նրանց մեկ օրվա առօրյան բացահայտում է կենտրոնի ամբողջ գործունեությունն ու միաժամանակ պատմում հայկական մարտարվեստի մասին:

ՀԱՍՄԻԿ ՄԱՆՈՒԿՅԱՆ