ԱԿՆԱԼՃԻ ՍՐԲԱՏԵՂԻՈՒՄ` ՙՀԱՅ-ԵԶԴԻԱԿԱՆ ԲԱՐԵԿԱՄՈՒԹՅԱՆ՚ ՀՈՒՇԱՀԱՄԱԼԻՐ

ԱԿՆԱԼՃԻ ՍՐԲԱՏԵՂԻՈՒՄ` ՙՀԱՅ-ԵԶԴԻԱԿԱՆ ԲԱՐԵԿԱՄՈՒԹՅԱՆ՚ ՀՈՒՇԱՀԱՄԱԼԻՐ

Բազմահազար եզդիներ, հայեր, այլազգիներ էին հավաքվել Արմավիրի մարզի Ակնալիճ գյուղում գտնվող սրբավայրում` ներկա գտնվելու ՙՀայ-եզդիական բարեկամության՚ հուշահամալիրի բացմանը:
Հանդիսությունը սկսվեց լռության րոպեով, որով ներկաները հարգեցին եզդիների բնօրրանում այս տարվա հուլիս-օգոստոս ամսին տեղի ունեցած կոտորածների զոհերի հիշատակը: Այնուհետեւ հնչեց ՙՀայաստան երկիր, դրախտավայր՚ երգը` ՀՀ վաստակավոր արտիստ Ռուբեն Սահակյանի կատարմամբ` որպես հիմն այն հողին, որ անցած դարասկզբին ապաստան տվեց եզդի ժողովրդին եւ հնարավորություն` վերընձյուղվելու: Այդ գործընթացների հիմքում կանգնած էին Ուսուբ բեկ Թեմուրյանցը` Հայաստանի առաջին խորհրդարանի պատգամավորը, Ջհանգիր աղա Խատոյանը` հզոր մարտիկը եւ հրամանատարը, ովքեր իրենց հայ բարեկամների հետ գնացին եղբայրության ուղիով` տասնյակ, հարյուր հազարավոր հայերի եւ եզդիների փրկելով կոտորածներից: Հիմա նրանց արձաններն են բացվում սրբատեղիում եւ նաեւ Անդրանիկ զորավարինը: Հուշահամալիրի կենտրոնում` ՙԵղբայրության եւ բարեկամության՚ հուշարձանն է: Օրվա բանախոսները` ՀՀ արդարադատության նախարար Հովհաննես Մանուկյանը, Արմավիրի մարզպետ Աշոտ Ղահրամանյանը, ՀՀ մշակույթի փոխնախարար Արթուր Պողոսյանը, ՙՄիդիա-Շանգալ՚ ՀԿ-ի նախագահ Ամո Շարոյանը, ուրիշներ եւ իհարկե հուշահամալիրը կառուցող Միրզա Սլոյանը:
Նախեւառաջ խոսեցին երկու ժողովուրդների անխախտ բարեկամության մասին, եւ անշուշտ կարելի է ասել, որ մենք մի ժողովուրդ ենք` երկու ազգ: Հուզիչ է Միրզա Սլոյանի խոսքը. ՙԵս փորձել եմ իմ երախտագիտության զգացումը այս հուշահամալիրի միջոցով արտահայտել,- ասում է նա,- մեր ազգերի մեծերը պատգամել են միշտ միմյանց կողքին լինել, միմյանց ձեռք մեկնել, ինչը եւ անում ենք ոչ միայն Հայաստանում, այլեւ օտար ափերում՚:
Հանդիսավարը խնդրում է պատվավոր հյուրերին եւ ազգային գործիչների հարազատներին մոտենալ հուշարձաններին եւ միանգամից 5 սավաններ ցած են սահում եւ մեր աչքերի առջեւ վեր են խոյանում հրաշալի խորհրդանիշներ եւ արձաններ` Ուսուբ բեկի, Ջհանգիր աղայի, Անդրանիկ զորավարի կերպարները, ՙԲարեկամության եւ եղբայրության՚ հսկա կոմպոզիցիան` իր 7 մետրանոց սլացքով: ՙՄեր հուշահամալիրին չէր կարող մաս չկազմել Հայոց եղեռնի 100-ամյակին նվիրված հուշաքարը,- շարունակում է Միրզա Սլոյանը,- այդ հուշաքարը նվիրված է Եղեռնի բազում նահատակների հիշատակին, եւ յուրաքանչյուր ոք, ով կգա այստեղ, առաջին հերթին իր աղոթքով կմոտենա այդ հուշաքարին, որի վրա Մայր աթոռ Սուրբ Էջմիածնի եւ Սուրբ Լալըշի պատկերները կան եւ նաեւ այն ծառը, որը չնայած ճղակոտոր է եղել, բայց վերընձյուղվել է՚:
Ծաղկեպսակներ են դրվում հուշարձաններին, նաեւ համայն աշխարհի եզդիների հոգեւոր առաջնորդի Միրե Միրա Թահսին Բեգի կողմից:
ՙՄենք ամեն տարի մեր սրբատեղիի տարեդարձի ոգեկոչումը սկսում ենք Ծիծեռնակաբերդի հուշահամալիր այցելությամբ,- ասում է ՙՄիդիա-Շանգալ՚ կազմակերպության նախագահ Ամո Շարոյանը,- այս տարի եւս բացառություն չկազմեց, մանավանդ, որ մենք նաեւ այդ կերպ հարգեցինք բոլոր ցեղասպանությունների զոհերի հիշատակը: Մենք այս տարի, իհարկե տխուր ենք` կապված եզդիների կոտորածների հետ, բայց եւ` ավելի միասնական: Մեր հուշահամալիրը մեզ ուժ եւ միասնություն է տալիս՚:

ԿԱՐԻՆԵ ՏԻՏԱՆՅԱՆ
Ակնալիճ-Երեւան