ՙԻՆՉ Է, ՈՒԿՐԱԻՆԱՅԻ ԴԵՊՔԵՐՆ ԵՆ ՈՒԶՈՒՄ ՄԵԶ ՄՈՏ ԿՐԿՆԵԼ՚

ՙԻՆՉ Է, ՈՒԿՐԱԻՆԱՅԻ ԴԵՊՔԵՐՆ ԵՆ ՈՒԶՈՒՄ ՄԵԶ ՄՈՏ ԿՐԿՆԵԼ՚

Հայաստանում շարունակվում են քննարկումները` կապված  Եվրասիական տնտեսական միությանը (ԵՏՄ) մեր երկրի անդամակցության հետ: Ելնելով նրանից, որ փաստաթղթի ստորագրումը ձգձգվեց, քաղաքական դաշտում այսօր է կա տեսակետ, թե հոկտեմբերի 10-ին եւս այն կարող է չստորագրվել: Թեեւ փորձագիտական շրջանակներում կարծիքները հիմնականում այլ էին.
Քաղաքագետ ԱԼԵՔՍԱՆԴՐ ՄԱՐԿԱՐՈՎԸ նշեց.
- Այսօր կան նախադրյալներ, որ հոկտեմբերի 10-ին Հայաստանը միանալու է ԵՏՄ-ին, հավանականությունը շատ մեծ է: Եթե ստորագրվի պայմանագիրը, մենք ձեռք ենք բերելու, դառնալու ենք բավականին մեծ շուկայի մաս` առանց լրացուցիչ ծախսերի: ԵՏՄ-ի միտումը հասկանալի է` ստեղծել մեկ միասնական տարածք, որտեղ լինելու է մարդկանց, ծառայությունների եւ ապրանքների ազատ տեղաշարժ: Եթե պայմանագիրը չստորագրվի, ապա այս դեպքում ես ոչ թե բացասական կողմերին կանդրադառնամ, այլ կասեմ, որ երկկողմ հարաբերությունների ձեւաչափը կպահպանվի, որը եւս նպաստում է մեր տնտեսությանը: Բացասականը առայժմ բաց ենք թողնելու եւ ստեղծելու ենք ավելի նպաստավոր պայմաններ:
Քաղաքագետ ԼԵՎՈՆ ՇԻՐԻՆՅԱՆԸ փաստեց.
- Սա կանխատեսելու հարց չէ, այլ` կոնկրետ գործողություն: Թե ինչ կշահի Հայաստանը` ԵՏՄ-ի անդամ դառնալով, մի հարց է, որը երկար ժամանակ կախվել է մեր գիտակցության մեջ: Եթե մենք մեր երկիրը այս վիճակում պահենք, բնականաբար ոչինչ էլ չենք շահի, իսկ եթե ցանկանաք օգտվել ռուսական շուկայից եւ նրա ռեսուրսներից, ապա շատ բաներ կշահենք: Այն հարցը, թե կմիանանք մենք ԵՏՄ-ին, թե ոչ, միշտ հնչում է: Ամեն դեպքումª մենք այլ տարբերակ չունեինք, քան միանալ ՌԴ-ի առաջարկին. Հայաստանը անվտանգության առումով, իսկ ավելի կոնկրետª Թուրքիայի կողքին լինելու պարագայում պարզապես ընտրության այլ հնարավորություններ չուներ: Սակայն կասկածները մեր միջից պետք է կարողանանք դուրս բերել, որպեսզի Հայաստանը կարողանա ընդառաջ գնալ իր ընտրությանըª հաշվի առնելով, որ ոչ միայն մենք ենք ընտրել Եվրասիական տնտեսական միությունը, այլեւ նաեւª Ռուսաստանն է մեզ ընտրել: Այստեղ նաեւ աշխարհաքաղաքական հարց կա, որը անընդհատ շփոթում են տնտեսական հնարավորությունների հետ: Մեր տնտեսական հարցերը լուծվում են ռազմաստրատեգիական ընտրության հետ: Պետք է հստակ ասենք, որ տնտեսականից զատª Ցեղասպանության 100-րդ տարելիցն էլ կա: Վերջապեսª արեւմտյան որ երկրից Հայաստանին անվտանգության որեւէ երաշխիք կտան: Թող այդ պետությանը մատնանշեն, որից հետո խնդիր չկա` կբանավիճենք: Բայց եթե չկա այդ պետությունը, ուրեմն անիմաստ խոսակցություն է, որ ԵՏՄ-ին մեր երկրի անդամակցության ընտրությունը սխալ էր: Այս ամենը Արեւմուտքից ՙսրսկվող՚ մարդկանց լոզունգն է: Հայաստանում դիտավորյալ կասկածներ են առաջացնում, ինչ է, Ուկրաինայի դեպքե±րն են ուզում մեզ մոտ կրկնել:
Սոցիոմետր սոցիոլագիական կենտրոնի ղեկավար, սոցիոլոգ ԱՀԱՐՈՆ ԱԴԻԲԵԿՅԱՆՆ էլ կարծում է, որ պայմանագրի ստորագրումից հետո ռուսական շուկայում հայկական ապրանքի իրացման համար կլինեն լուրջ արտոնություններ եւ ազատություններ.
- Ըստ իս, նախատեսված օրը պայմանագիրը կստորագրվի: Մենք չենք կարող այդ տարածքից դուրս գալ, քանի որ մեր ապրանքների զգալի մասն իրացվում է այնտեղ: Եթե մենք մտնենք Եվրամիություն, ապա այնտեղ անելիքներ չենք ունենա. ես չեմ կարող ասել, թե մենք ինչ ունենք` Եվրոպային առաջարկելու: Այսպիսի խնդիրներ կան, որոնք պետք է հաշվի առնենք:


Z-PR սոցհարցման կենտրոնը Երեւան քաղաքում 100 հոգու շրջանում կատարել է սոցհարցում` պարզելու համար, թե 2014 թվականի հոկտեմբերի 10-ին կստորագրվի ԵՏՄ-ին Հայաստանի անդամակցության վերաբերյալ փաստաթուղթը:
1. Այո, կստորագրվի- 63%:
2. Կարեւորը` ոչ թե այդ օրը ստորագրել-չստորագրելն է, այլ որ գալիք տարեսկզբից լինենք այդ Միության կազմում- 26%:
3. Ոչ, առհասարակ չի ստորագրվի- 2%:
4. Դժվարանում ենք պատասխանել- 9%:

ԶՎԱՐԹ ԽԱՉԱՏՐՅԱՆ