Գալուստ Սահակյան. Մարդկանց ազատում ես հարկերից, իսկ նրանք բողոքի ցույցեր են անցկացնում

Գալուստ Սահակյան. Մարդկանց ազատում ես հարկերից, իսկ նրանք բողոքի ցույցեր են անցկացնում

Գալուստ Սահակյանը, պատասխանելով լրագրողների հարցերին կապված «Շրջանառության հարկի մասին » օրենքի հետ, ասաց.

«Խոսք չկա տուգանքների, հարկադրանքի կամ էլ որեւէ այլ խնդիրների մասին: Ֆինանսների նախարարը պատգամավորներին նույնիսկ առաջարկել է իրենց ներկայացուցիչներն ունենալ նախարարությունում: Ես հավատում եմ, որ առեւտրի կենտրոններում նման խնդիրներ չեն ծագի, քանի որ կառավարությունն ազատել է նրանց հարկերից: Շատ տարօրինակ է. մարդկանց ազատում ես հարկերից, իսկ նրանք բողոքի ցույցեր են անցկացնում՝ ասելով, թե ո՛չ, թող հարկեր լինեն:  Դա նշանակում է, որ կա ստվերային տնտեսություն: Այդ պատճառով էլ ամեն ինչ պետք է փաստաթղթերով լինի, սակայն  դա չի իրականացվելու այն ուղիներով, որոնք ներկայացվում են բնակչությանը»:

Մեկ այլ հարցի` ինչպե՞ս է գնահատում ոչ իշխանական եռյակի հանրահավաքները, Գալուստ Սահակյանը պատասխանեց. «Ես մասնակից չեմ եղել: Մի բանը, եթե գաղափարախոսություն չունի, սկզբունքներ չի ձևավորել եւ ամեն մեկը բառախաղերով իր կողմն է ձգում, նման պարագայում ինչ-որ մարդիկ կհավաքվեն, բայց արդյունքի դժվար է սպասել»:

Ինչ վերաբերում է տարածված այն կարծիքին, թե փոքր եւ միջին բիզնեսի ներկայացուցիչներին ցույցի են ուղարկում խոշոր ձեռնարկատերերը, խոսնակը նշել է, որ կա մի քանի սցենար` միաժամանակ հավելելով.  «Չեմ կարծում, որ ստեղծված իրավիճակը փոքր եւ միջին բիզնեսի ներկայացուցիչներին ստիպի լքել երկիրը»:

{youtube}2mgGqovxX04{/youtube}