ԱՅՍ ՏԱՐԻ «ԿԻՆՈԱՇՈՒՆԸ» ԿԱՅՑԵԼԻ ՆԱԵՎ ՍԱՀՄԱՆԱՄԵՐՁ ԳՅՈՒՂԵՐ

ԱՅՍ ՏԱՐԻ «ԿԻՆՈԱՇՈՒՆԸ» ԿԱՅՑԵԼԻ ՆԱԵՎ ՍԱՀՄԱՆԱՄԵՐՁ ԳՅՈՒՂԵՐ

Հայաստանի ազգային կինոկենտրոնի նախաձեռնությամբ մեկնարկում է «Կինոաշուն» ազգային կինոյի ամիս» ծրագիրը, որը արդեն հինգերրդ անգամ հայ կինոսիրողներին կներկայացնի հայկական հին ու նոր կինոյի լավագույն նմուշները: 5-րդ «Կինոաշունը» կմեկնարկի հոկտեմբերի 7-ին ` Լոռու մարզի Վանաձոր քաղաքից: ՀՀ մշակույթի նախարարության եւ Երեւանի քաղաքապետարանի աջակցությամբ անցկացվող «Կինոաշունը» , ինչպես նաեւ բոլոր կինոմիջոցառումները այս տարի նվիրվում է Սերգեյ Փարաջանովի 90-ամյակին: Կինոտոնի մեկնարկը կտրվի Փարաջանովին նվիրված ֆիլմով եւ Վանաձոր քաղաքի արդյունաբերական կյանքի մասին պատմող վավերագրական ֆիլմի ցուցադրությամբ:

Ինչպես նախորդ տարիներին, այս տարի եւս կինոաշնան ծրագրում ներառված են ՀՀ բոլոր մարզերը, որտեղ եւս կցուցադրվեն հայկական ֆիլմեր: ՀՀ մշակույթի փոխնախարար Արթուր Պողոսյանի խոսքով` «Կինոաշունը» հայ իրականության մեջ արդեն դարձել է ավանդական, այն ամենամասսայականն է, քանի որ ընդգրկում է ՀՀ բոլոր մարզերը, ուսումնական հաստատությունները, սահմանամերձ գյուղերը.«Մեկ ամսվա ընթացքում Հայաստանի ամբողջ տարածքում կլինեն շուրջ 150 կինոդիտումներ, որտեղ կներկայացվի մեր կինոն եւ հայկական կինոյի պատմությունը: Այս տարվա ծրագիրը ներառել է նաեւ սահմանամերձ գյուղերը: Խնդիր է դրված հանրահռչակելու ոչ միայն հայ կինոն, այլե երիտասարդ կինոգործիչներին»,-նշեց ԱՐԹՈՒՐ ՊՈՂՈՍՅԱՆԸ եւ ընդգծց, որ «Կինոաշնան» ծրագրի շրջանակներում հայտարարվել է «Հին ու նոր երեւանցի» թեմայով կինոմրցույթ, որին կարող են մասնակցել 10 րոպե տեւողությամբ ֆիլմերը եւ լավագույն գրախոսականների մրցույթ,որին կարող են մասնակցել Հայաստանում արտադրված վերջին 3 տարիների ֆիլմերը:

«Կինոաշնան» ծրագրում կներկայացվի նաեւ հատուկ ծրագիր հայկական բանակի ու արցախյան ազատամարտի թեմայով, որոնք կներառվեն ոչ միայն հիմնական ցուցադրություններում, այլեւ կներկայացվեն սահմանապահ գյուղերում եւ երկրի համար հատուկ նշանակության այլ բնակավայրերում:

Հայաստանի ազգային կինոկենտրոնի տնօրեն Գեւորգ Գեւորգյանը ուրախւթյամբ արձանագրեց, որ այս ծրագրի միջոցով կարողանում են տարածել հայկական կինոն.«Կինոաշունը» սպասված տոն է ամբողջ հանրապետությունում: Այս տարվա ծրագիրը շատ հագեցած է լինելու: Ի շնորհիվ այս ծրագրի` ՀՀ շատ մարզեր մեզ հետ ձեռք են բերել պայմանավորվածություն եւ իրենց մարզերում անվճար ցուցադրում են հայկական ֆիլմեր»,-մեկնաբանեց ԳԵՎՈՐԳ ԳԵՎՈՐԳՅԱՆԸ:

Ավանդույթի համաձայն այս անգամ եւս ծրագրի շրջանակներում կնշվեն անվանի կինոգործիչների հոբելյարները: Տեղի կունենա նրանց ստեղծագործությունների հետահայաց ցուցադրություններ: Այս ամենից զատ, բուհերի ուսանողների մասնակցությամբ կանցկացվի կլոր սեղան «Մեր մեծերը» խորագրով:

Կինոշատ աշունը կեզրափակվի նոյեմբերի 7-ին` գրախոսականների եւ ֆիլմերի մրցույթների ամփոփումով`Արտաշատ քաղաքում:

ԶՎԱՐԹ ԽԱՉԱՏՐՅԱՆ