ՀԱԿՈԲ ՀԱԿՈԲՅԱՆՆ ԱՆՆՈՒՂՂԵԼԻ ԼԱՎԱՏԵՍ Է, ԳՈՒՐԳԵՆ ԱՐՍԵՆՅԱՆՆ ԷԼ ԲԱՎԱՐԱՐՎԵՑ ՇՆՈՐՀԱԿԱԼՈՒԹՅԱՄԲ

ՀԱԿՈԲ ՀԱԿՈԲՅԱՆՆ ԱՆՆՈՒՂՂԵԼԻ ԼԱՎԱՏԵՍ Է, ԳՈՒՐԳԵՆ

ԱՐՍԵՆՅԱՆՆ ԷԼ ԲԱՎԱՐԱՐՎԵՑ ՇՆՈՐՀԱԿԱԼՈՒԹՅԱՄԲ

Շրջանառության հարկի 3,5%-ից մեկ տոկոսի  նվազեցումն առաջացրել է ՓՄՁ-ի  բողոքը:  Վառ ապացույցը  առեւտրականների երեկվա բողոքի ակցիան էր ՀՀ ԱԺ-ի դիմաց: Նրանց խոսքով՝ շրջանառության հարկի նվազեցումն իրենց կանգնեցրել է փաստաթղթավորման խնդրի առաջ   «Իրավունքը» փորձեց պատգամավորներից պարզել՝ առեւտրականների բողոքը  հիմնավոր է, թե՞ ոչ:  ՀՀԿ պատգամավոր, ԱԺ սոցիալական հարցերի մշտական հանձնաժողովի նախագահ Հակոբ Հակոբյանն ասաց, որ առեւտրականների բողոքը խնդրի մի մասն է, իսկ խնդիրն իրականում ավելի խորն է:

- Պրն Հակոբյան, հստակեցնենք՝ առեւտրականների բողոքը հիմնավորված է:

- Գիտեք,  բարդ է ասել: Տեղ կա հիմնավորված է, տեղ կա՝ ոչ:

Ո՞րն է հիմնավորված, որը՝ ոչ:

-Օրինակ, վարչապետը հարցրեց. «մենք ձեր 3,5% հարկը դարձնում ենք մեկ տոկոս, դուք դժգո՞հ եք»: Իրոք, էստեղ դժգոհելու տեղ չկա: Ցանկացած հարկատու կհասկանա՝3,5% հարկն ավելի շատ է, քան մեկը: Իսկ ինչու   մարդիկ համաձայն չեն, այ սա պետք  է հասկանալ:

- Իսկ ինչո՞ւ համաձայն չեն:

-Չեմ կարող ասել:

- Բողոքներն ասում են՝ խոշոր բիզնեսից   փաստաթուղթ պետք է պահանջենք, նա էլ չի տա…

-Դա չեմ կարող ասել:

- Կարծիք կա, որ առեւտրականների այս բողոքն ուղղորդվում է խոշոր բիզնեսի ներկայացուցիչների կողմից…

-Դե դա քաղաքական բան է… ես  նման տեղեկատվություն չունեմ: Կա խնդիր, պետք է լուծվի:

- Դուք ի՞նչ լուծում եք առաջարկում:

-Չեմ կարող ասել: Հարցի էության մեջ չեմ խորացել: Բայց իմ կարծիքով կառավարությունն ու բողոքողները պետք է միասին լուծում գտնեն:

- Իսկ, եթե կառավարությունն այս հարցում փոփոխություն չանի՞:

- Հարցը կլուծվի, միեւնույնն է:

- Իսկ ԲՀԿ-ի այն առաջարկը, ըստ որի՝  առեւտրականները կարող են աշխատել շրջանառության հարկի 3,5%-ի շեմով եւ առանց փաստաթղթավորման  կամ 1%-ով, բայց փաստաթղթավորմամբ:

- Հարկային համակարգում կամավորության սկզբունքը չի աշխատում: Դա նշանակում է հարցի չլուծում:

Փորձեցինք առեւտրականների բողոքի մասին պարզաբանում ստանալ ԲՀԿ պատգամավոր Գուրգեն Արսենյանից: Վերջինս լսելով «Իրավունքի»  անունը՝ հակիրճ ու կտրուկ պատասխանեց. «Շնորհակալություն, մյուս անգամ»:

Սոնա Դավթյան