ՀՀԿ-ն կադրերի մեծ բանակ ունի. Գալուստ Սահակյան

ՀՀԿ-ն կադրերի մեծ բանակ ունի. Գալուստ Սահակյան

«ՀՀԿ-ն միակ քաղաքական ուժն է, որ կադրերի պակաս չունի և շատ մեծ բանակ ունի կադրերի: Ըստ երևույթին, դա է պատճառը, որ որևէ մեկը, որ պաշտոնի է նշանակվում, նրանք, ովքեր որ մտածել են, որ իրենք կարող են լինել, ըստ երևույթին, նրանք էլ են հրահրում, որ պաշտոն ստացած անձը մի քիչ վարկաբեկվի»,- ասել է ԱԺ նախագահ Գ. Սահակյանը Սյունիքի մարզպետ Սուրիկ Խաչատրյանի վերանշանակման մասին : Ներկայացնում ենք Լիսկայի վերանշանակման և սահմանադրական բարեփոխումների մասին «Հրապարակի» հարցերին Գալուստ Սահակյանի պատասխանները:

- Պարոն Սահակյան, ինչպե՞ս կգնահատեք Սուրիկ Խաչատրյանի վերանշանակումը մարզպետի պաշտոնում:

- Գիտեք ինչ, կարծիքները ցանկացած անձի վերաբերյալ շատ տարբեր կլինեն, ասում են՝ հանցագործություններ է կատարում, աղմկոտ գործերի մեջ է, ըստ էության, և պաշտոնական շրջանակներում, և լրագրողական, և քաղաքացիների, գոյություն ունի անմեղության կանխավարկածը: Դրա համար կան համապատասխան լիազոր մարմիններ, որոնք ասում են՝ այդպիսի բան չկա: Հիմա բնական է, որևէ մեկը եթե գնում է պաշտոնի, այնպես չէ, որ զերծ մնա քննադատություններից:

- Իրավական ատյանների որոշումը և դեպքն արձանագրած տեսագրությունը բոլորովին այլ են՝ ի վնաս Խաչատրյանի:

- Հա, բայց մենք այդ տեսակետն ունենք, մյուսներն այլ տեսակետ ունեն, այնպես չէ, որ բոլորը նույն տեսակետն ունեն: Եվ հետո, դա կառավարության լիազորության շրջանակներում է, թիմ է, կառավարությունն այդպես է որոշել, իսկ կառավարության անդամները տասնութն են, եթե ինչ-որ քննարկելու բան լիներ, կքննարկեր:

- Ինչո՞վ է անփոխարինելի Սուրիկ Խաչատրյանը ձեզ համար, անընդհատ և պարբերաբար մամուլում աղմկահարույց հրապարակումներ են հայտնվում նրա և մերձավորների անվան հետ կապված, կա հասարակական ընդգծված բացասական կարծիք:

- Անփոխարինելի որևէ մարդ գոյություն չունի, մանավանդ պետական պաշտոններում և ծառայություններում: Իսկ ես ինձ իրավունք չեմ վերապահի, որ ասեմ հասարակական կարծիքը, որովհետև հասարակության մեջ ոչ հանրաքվե եմ անցկացրել, ոչ էլ: Կան տարբեր կարծիքներ, կան դրական և պասիվ կարծիքներ, կան խիստ բացասական կարծիքներ, այնպես չի, որ հարթ է ամեն ինչը, և դա կարելի է վերագրել ինձնից սկսած՝ վերջացրած ցանկացած չինովնիկի: Համենայնդեպս, դատաիրավական համակարգը երբևէ այդ կարծիքների ամբողջությամբ չի առաջնորդվել, քանի որ գտնում է, որ Սուրեն Խաչատրյանն անմեղ է:

- Կոնկրետ Դուք է՞լ եք կարծում, որ այդ մարդը նման բաներ անել չի կարող և անմեղ է:

- Ես Սուրեն Խաչատրյանին ճանաչում եմ 90-ական թվականներից, բոլոր պարագաներում, եղել է պատգամավոր, և այն ժամանակ, որ ես խմբակցության ղեկավար եմ եղել, համենայնդեպս այդ ընթացքում այդպես բաց… բարձրագոչ բացասական վերաբերմունքի առիթ չի տվել: