«ՀՈԿՏԵՄԲԵՐԻ 10-Ի ՀԱՆՐԱՀԱՎԱՔԻ ՕՐԸ ԱՆՀԱՋՈՂ Է ԸՆՏՐՎԱԾ».ԱՐԾՎԻԿ ՄԻՆԱՍՅԱՆ

«ՀՈԿՏԵՄԲԵՐԻ 10-Ի ՀԱՆՐԱՀԱՎԱՔԻ  ՕՐԸ ԱՆՀԱՋՈՂ Է

ԸՆՏՐՎԱԾ».ԱՐԾՎԻԿ ՄԻՆԱՍՅԱՆ

Վերահսկիչ պալատի  նախորդ տարվա  հաշվետվությունն այս տարի քննարկվեց հանձնաժողովներում: Քննարկմանը, սակայն պասիվ էին  ընդդիմադիրներն ու  այլընտրանքային համարվող ԲՀԿ-ը: Իրավունքն արդեն ներկայացրել է  ՕԵԿ-ի եւ ԲՀԿ-ի դիրքորոշումը:   Իսկ ՀՅԴ-ի կարծիքը պարզելու համար «Իրավունքը» զրուցեց դաշնակցության խմբակցության պատգամավոր Արծվիկ Մինասյանի հետ:  «Ֆինանսավարկային եւ բյուջետային հարցերի հանձնաժողովում մեր խմբակցության ներկայացուցիչը ես եմ, բայց մեկնել էի գործուղման: Իսկ թե ինչու  էին մնացած ընդդիմադիր քաղաքական ուժերը պասիվ,  դժվարանում եմ ասել, բայց ցանկալի է, որ ակտիվ լինեն»,- ասաց  Ա. Մինասյանը:

-Պրն Մինասյան, հոկտեմբերի տասին կայանալիք  ՀԱԿ-ի, ԲՀԿ-ի, «Ժառանգության» համատեղ հանրահավաքին  ՀՅԴ-ը չի մասնակցում հանրահավաքի օրակարգում սահմանադրական բարեփոխումների  հարցի  ընդգրկման պատճառով, բայց եթե հաշվի առնենք, որ  «Քառյակի» 12 կետերի մասին եւս խոսվելու է հանրահավաքում, արդյոք դա հաշվի առնելով՝ չէր կարելի մասնակցել հանրահավաքին:

- Ո՞նց եք պատկերացնում՝մենք մասնակցենք մի հանրահավաքի, որտեղ քննադատություն է հնչում սահմանադրական բարեփոխումների անհրաժեշտության  մասին եւ չպատասխանե՞նք: Իսկ եթե պատասխանենք, դա արդեն հանրահավաք չի լինի, այլ կոնֆերանս: Ինչ վերաբերում է 12 կետերին, ապա  դրանց  մասով պայմանավորվածությունը հետեւյալն է՝ «Քառյակը» 12 կետերի միասնական ամփոփոում պետք է  տա: Այն կետերի շուրջ, որոնց մասով միասնականություն չի լինի, հանրահավաքում «Քառյակի» անունից այդ կետերի  մասին միասնական հայտարարություն չի արվի:  Իսկ այն կետերի շուրջ, որոնց  մասով կլինի միասնական տեսակետ,  հանրահավաքում դրա մասին կասվի:

- Հանրահավաքում Հայաստանի՝ԵՏՄ-ի անդամակցության հարցը քննարկվելո՞ւ է հանրահավաքում:

-Տեղեկություն չունեմ՝ «Եռյակն» ինչ հարցեր է քննարկելու:

- Այնուամենայնիվ, ճիշտ կլինի, որ քննարկվի, հաշվի առնելով, որ հենց այդ օրն է ստորագրվելու ԵՏՄ-ին անդամակցելու պայմանագիրը:

-Գիտեք, իմ անձնական կարծիքով ամսի տասը հանրահավաք անցկացնելու համար անհաջող  օր է: Անկախ նրանից՝կքննարկվի  Հայաստանի՝ ԵՏՄ-ին անդամակցելու հարցը, թե ոչ, բայց հնարավոր է միջազգային շատ լրատվամիջոցներ, օգտագործելով տեխնիկական հնարավորությունները,  փորձեն կապել այս հանրահավաքը Հայաստանի՝ ԵՏՄ-ին անդամակցության դեմ, որը լուրջ հարված կհասցնի մեր պետությանը: Մենք առաջարկել ենք, որ հանրահավաքն արվի հոկտեմբերի 15-ից հետո, որպեսզի սահմանադրական փոփոխությունների մասին մենք ունենանք մեր տեսակետը: Սա նաեւ հանրահավաքի կազմակերպիչ մյուս ուժերին է վերաբերվում, որպեսզի իրենք կարողանան  փաստարկված առարկություններ  ներկայացնել սահմանադրական բարեփոխումների մասին:

Հարցազրույցի շարունակությունն ընթեցրեք առաջիկայում iravunk.com կայքում:

Սոնա Դավթյան