ՀԱՅ ԲԵՄՆ ԱՌԱՆՑ ՍՈՍ ՍԱՐԳՍՅԱՆԻ

ՀԱՅ ԲԵՄՆ ԱՌԱՆՑ ՍՈՍ ՍԱՐԳՍՅԱՆԻ

Մեկ տարի հայ բեմն առանց ԽՍՀՄ ժողովրդական արտիստ, Մեսրոպ Մաշտոց շքանշանակիր Սոս Սարգսյանի է: Դերասան` ում կերտած կերպարները թե′ կինոարվեստում, թե′ թատերարվեստում մնում են անգերազանցելի: Հայ մեծանուն դերասանի մահվան առաջին տարելիցի կապակցությամբ Երեւանի Կոմիտասի անվան պանթեոնում բացվեց վարպետի կիսանդրին, որի հեղինակը քանդակագործ Մկրտիչ Մազմանյանն է: Կիսնադրու բացմանը ներկա էին ՀՀ պաշտպանության եւ մշակույթի նախարարները, թատերական եւ մշակութային գործիչներ, ինչպես նաեւ քաղաքական բարձրաստիճան պաշտոնյաներ, ովքեր իրենց հարգանքի տուրքը մատուցեցին դերասանի շիրիմին: Քանդակագործ Մ. Մազմանյանի խոսքով`քանդակը ստեղծելիս ինքը մի քիչ «տանջվել» է, քանի որ Սոս Սարգսյանի նման մեծության քանդակ ստեղծելն այդքան էլ հեշտ գործ չէ.«Կարծես թե դերասանն էր թելադրում, թե ինչպես քանդակեմ: Սարգսյանը ահռելի մի անձնավորություն է,ոչ միայն թատերարվեստում , այլեւ`քաղաքականության եւ գրականության մեջ»,-նշեց ՄԿՐՏԻՉ ՄԱԶՄԱՆՅԱՆԸ:
Մեծանուն դերասանի կինը` Նելլի Սարգսյանը միշտ հիշում է դերասանի խոսքերը, որոնք նա անընդհատ կրկնում էր.«Նա միշտ ասում էր մարդը երջանիկ է այն ժամանակ, երբ գտնում է գոնե մեկին ում կարողանում է իր սիրտը բացել: Միշտ ինձ ասում էր, գիտես վատություն անելը միշտ էլ հեշտ է, բարություն պետք է անել եւ չմտածել, թե դրա դիմաց ինչ ես ստանալու: Նա ոչնչից անմասն չմնաց, ամեն ինչում կար, վիրավորվում էր ամենափոքր անշնորքությունից: Նրա ամենկարեւոր խոսքը վերջին տարիներին հետեւյալն էր` Արցախը Ադրբեջանի համար ընդհամենը տարածք է, իսկ մեզ համար`Հայրենիք: Նրա համար հայրենիքից բարձր ոչինչ չկար, պատրաստ էր իրեն եւ իր շրջապատին նվիրել այդ հայրենիքին»,-նշեց տկն. ՍԱՐԳՍՅԱՆԸ:
«Իրավունքի» հետ զրույցում մշակութային մի շարք գործիչներ եւս հիշեցին ու վերհիշեցին Սոս Սարգսյան դերասանին եւ հային:
ՀՀ թատերական գործիչների միության նախագահ ՀԱԿՈԲ ՂԱԶԱՆՉՅԱՆ.« Սոս Սարգսյանը հզորագույն մի անհատ էր, մտավորական, քաղաքացի, որը կարողնում էր կայծակնային արագությամբ արձագանքել ամեն տեսակ իրադարձությունների`քաղաքական թե մշակութային: Անբացատրելի փիլիսոփայությամբ եւ անբացատրելի կարողությամբ այնպես էր վերլուծում այդ ամենը, որ հաճախ ապշում էիր նրա  ժողովրդական մտքի վրա: Ես կարծում եմ ամեն ինչ պետք է անենք, որպեսզի մոտ ժամանակներս ներկա լինենք համազգային թատրոնի նոր շենքի բացման արարողությանը: Համոզված եմ, որ այդ շենքի շքամուտքին հավերժ կդաջվի Սոս Սարգսյանի անունը »:
Գրող, հրապարակախոս ԶՈՐԻ ԲԱԼԱՅԱՆ.«Մեզ համար Սոսը գնացել է, որպեսզի մնա, ինձ համար նա միշտ ներկա է: Նա տարիներ ի վեր լինելով, որպես հանճարեղ դերասան, արցախյան շարժման շեմին մտավ ֆիդայիների շարքի մեջ եւ դարձավ զինվոր մինչեւ կյանքի վերջ: Նա գնաց, որպես զինվոր, սա շատ կարեւոր է: Նա միշտ ասում էր, որ արցախյան շարժումը որոշում է հայության ապագան,այսպիսի մոտեցումը շատ կարեւոր է»:
Լեզվի պետական տեսչության պետ ՍԵՐԳՈ ԵՐԻՑՅԱՆ.«Սոս Սարգսյանի ձեռագիրը երբեք դուրս չի գա մեր արվեստից, նա կերպար էր, անհատականություն: Նա իրեն ճանապարհեց դեպի հավերժություն`արվեստի ու մշակույթի հավերժություն: Նրա կողմից ստեղծվել են ինքնատիպ գործեր եւ կերպարներ: Այս ամենի ապացույցը այն մտքերն են, որոնք նա արտահայտեց նաեւ իր արձակում»:

ԶՎԱՐԹ ԽԱՉԱՏՐՅԱՆ