ԱԴՐԲԵՋԱՆԸ ԵՐԱՇԽԱՎՈՐՈՒՄ Է ՀԱՅ ՄԱՐԶԻԿՆԵՐԻ ԱՆՎՏԱՆԳՈՒԹՅՈՒՆԸ

ԱԴՐԲԵՋԱՆԸ ԵՐԱՇԽԱՎՈՐՈՒՄ Է ՀԱՅ ՄԱՐԶԻԿՆԵՐԻ ԱՆՎՏԱՆԳՈՒԹՅՈՒՆԸ

2015թ. Եվրոպական խաղերը պատմության մեջ Առաջին Եվրոպական օլիմպիական խաղերն են, որոնք կանցկացվեն Ադրբեջանի մայրաքաղաք Բաքվում: Հիշեցնենք, որ դրա անցկացման վերաբերյալ որոշումը կայացվել է 2012 թ. դեկտեմբերի 8-ինª Հռոմում անցկացված Եվրոպական օլիմպիական կոմիտեի 41-րդ Գլխավոր հանձնաժողովի նիստի ժամանակ: Հայաստանի ներկայացուցիչները հրաժարվել էին մասնակցել քվեարկությանը:
Այդ խաղերին կմասնակցեն շուրջ 6 000 մարզիկ` Եվրոպայի 49 երկրից: Ըստ նախնական տեղեկությունների` մրցումները կանցկացվեն 20 մարզաձեւերից եւ 31 մարզական դիսցիպլինաներից, ինչպիսիք ենª բադմինտոնը, բասկետբոլը, բռնցքամարտը, ըմբշամարտը, հեծանվավազքը, ջրային մարզաձեւերը, վոլեյբոլը, լողափնյա վոլեյբոլը, մարմնամարզությունը, ձյուդոն, կարատեն, թեթեւ աթլետիկան, լողափնյա ֆուտբոլը, սեղանի թենիսը, հրաձգությունը, նետաձգությունը, տրիաթլոնը, թաեկվոնդոն, սուսերամարտը:

Հատկանշական է, որ օրերս I Եվրոպական խաղերի մարզաձեւերն ավելացան եւս մեկով`հասնելով 20-ի: Եվրախաղերի ծրագրի մեջ է ներառվել սամբո մարզաձեւը: Կխաղարկեն ընդհանուր թվով 223 մեդալ:
Պետք է նշել, որ 7 մարզաձեւերում, ինչպիսիք են հեծանվավազքը, հրաձգությունը, լողը, սեղանի թենիսը, թաեկվոնդոն, տրիաթլոնը եւ լողափնյա վոլեյբոլը, կխաղարկվեն ուղեգրեր 2016 թ. Ռիո դե Ժանեյրոյում կայանալիք Օլիմպիադային մասնակցելու համար:
Հայաստանի մասնակցությունը այս խաղերին ի սկզբանե հարցականի տակ էր, ինչը մեկնաբանելով` ՀԱՕԿ գլխավոր քարտուղար Հրաչյա Ռոստոմյանը` ասել էր. ՙ2015-ը նախաօլիմպիական տարի է: Բոլորը տարված են լինելու օլիմպիական վարկանիշ նվաճելով: Որեւէ հստակեցում չկա այդ խաղերում օլիմպիական վարկանիշ տալու են, չեն տալու: Հոկտեմբերյան հանդիպումից հետո Հայաստանի մասնակցության ձեւաչափը պարզ կլինի:  Մեզ համար այս պահին կարեւոր են վարկանիշային մրցաշարերը, բոլորս սեւեռված ենք լինելու աշխարհի առաջնությունների վրա, որտեղ օլիմպիական վարկանիշ է խաղարկվելու՚: Այս մասին հայտարարություն է արել նաեւ Ադրբեջանի սպորտի եւ երիտասարդության հարցերի նախարար Ազադ Ռագիմովը. ՙԲոլորին հրավիրել ենք մասնակցել Եվրոպական խաղերին: Հաշվի առնելով հայկական մամուլում տեղ գտած լուրերըª կարծում ենք, որ Հայաստանը կմասնակցի խաղերին: Մենք պետական մակարդակով երաշխավորել ենք  Եվրոպական խաղերի բոլոր մասնակիցների անվտանգությունը՚: Ադրբեջանը երաշխավորում է հայ մարզիկների անվտանգությունը, սակայն փորձը ցույց է տալիս, որ միջազգային մարզական եւ այլ միջոցառումներ կազմակերպելու քաղաքակիրթ փորձ, այնուամենայնիվ, մեր հարեւանները ձեռք չեն բերել: Այնպես որ, մասնակցությունից առաջ նախ պետք է լավ մտածել:

ՔՐԻՍՏԻՆԵ ՊԵՏՐՈՍՅԱՆ