ՙՙՙՄԻ ՕԴՈՐԱԿԻՉԻ ՀԱՄԱՐ ԹԱՏՐՈՆԻՆ ՉԻ ԿԱՐԵԼԻ ՎԱՐԿԱԲԵԿԵԼ՚

ՙՄԻ ՕԴՈՐԱԿԻՉԻ ՀԱՄԱՐ ԹԱՏՐՈՆԻՆ
ՉԻ ԿԱՐԵԼԻ ՎԱՐԿԱԲԵԿԵԼ՚

ՙԻրավունքն՚ արդեն անդրադարձել էր Գ. Սունդուկյանի անվան ազգային ակադեմիական թատրոնում տեղի ունեցող ներքին սկանդալին` թատրոնի տնօրեն ՍՏԵՓԱՆ ԴԱՎԹՅԱՆԻ ու կադրերի բաժնի պետ ՎԱՀԵ ՄՈՎՍԻՍՅԱՆԻ միջեւ: Վ. Մովսիսյանը տնօրենին մեղադրում է անօրենության մեջ` կեղծ աշխատակիցներ ձեւակերպելու, ովքեր իրականում գոյություն չունեն, սակայն նրանց աշխատավարձերը դուրս են գրվում: Այսինքն` ըստ Վ. Մովսիսյանի` թատրոնին տասը տարվա հասցված վնասը կազմում է մոտ 14 մլն դրամ: Իսկ տնօրենն էլ իր հերթին կադրերի բաժնի պետին մեղադրում է ստախոսության մեջ, թեպետ շեշտելով, որ նա լավ աշխատող է: Ըստ Վ. Մովսիսյանի` թատրոնում իր դեմ ստորագրահավաք է սկսվել, որի գլխավոր մեղավորն ու շահագրգիռ անձը նույն թատրոնի դերասան, ՀՀ վաստակավոր արտիստ Արմեն Մարությանն է, քանի որ Վ. Մովսիսյանի խոսքերով` դերասանը եւս ուղիղ կապ ունի իր բարձրացրած խնդրի հետ:
ՙԻրավունքն՚ այդ թեմայի շուրջ զրուցեց թատրոնի դերասան, ՀՀ վաստակավոր արտիստ ԱՐՄԵՆ ՄԱՐՈՒԹՅԱՆԻ հետ.

ՙԹԱՏՐՈՆԻ ԿԱԴՐԵՐԻ
ԱՇԽԱՏՈՂՆ ԻՆՉՈՒ Է ԱՅԴՔԱՆ ԽԱՌՆՎԵԼ ԻՐԱՐ՚

- Պարոն Մարության, ի վերջո, այդ ինչ ստորագրահավաք է, եւ ինչո±ւ եք Դուք ստանձնել այդ ստորագրահավաքի պարտականությունը:

- Դա ստորագրահավաք չէ, մեր թատրոնի կադրերի աշխատողն ինչո±ւ է այդքան խառնվել իրար, ինչո±ւ է դա իրեն անհանգստացնում, չեմ հասկանում: Ինչո±ւ է նա թատրոնում բոլորի մեջ այդքան կեղտ ու զզվելի բաներ փնտրում: Յուրաքանչյուր թատրոն եւ յուրաքանչյուր հիմնարկ անթերի չի կարող լինել: Ամեն տեղ էլ թերություններ եւ նրա նման մարդկային տեսակ գոյություն ունի, որ իր օդորակիչի համար կարող է Արմեն Մարությանի պես դերասանի մասին իրեն թույլ տալ ավելորդ բաներ խոսել: Այն դեպքում, երբ Արմեն Մարությանը նրան պահում է ստուդիայում, քանի որ ես թատրոնի ստուդիայի տնօրենն եմ, ավելին` վստահում եմ իրեն: Երեւի շատ է ոգեւորվել, որ մի առիթով ասել եմ, թե ինքը լավ աշխատող է: Բայց հիմա դրան ավելացնում եմ, որ ինքը լավ աշխատող է, բայց վատ քաղաքացի է: Եթե Արմեն Մարությանն առաջինն է ստորագրել, ապա դա դիմում է, ոչ թե ստորագրահավաք:

ՙԵԹԵ ԱՅԴ ՕԴՈՐԱԿԻՉԸ ԹԱՏՐՈՆԸ ՉԳՆԻ,
ԵՍ ԻՄ ԳՈՒՄԱՐՈՎ ԵՄ ԳՆԵԼՈՒ՚

- Այդ ինչ դիմում է:
- Թատրոնի կոլեկտիվից 70 մարդ դիմում է գրել, որ այս տեսակի հետ չեն ուզում աշխատել: Իսկ նա դա փոխում է ու դեղին մամուլում իր նման բազմաթիվ ընկերների միջոցով փորձում է ինձ վարկաբեկել: Նա անձամբ այս թատրոնում ունի բազում թերություններ: Եթե կոլեկտիվից 70 մարդ դիմում է գրում, էլի եմ կրկնում, դա ստորագրահավաք չէ, ինքն է անունը փոխել: Եվ դա ոչ էլ իր ասածի նման անանուն դիմում չէ, մարդիկ բացահայտ ասում են` չեն ուզում իր հետ աշխատել: Իսկ նա հիմա թատրոնում ընկած է մարդկանց հետեւից, թե դու 2 ռոճիկ ես ստանում, դու այս ես արել, դու փորձից ուշացել ես, դու այս թատրոնում կերել ես... Նման բաներ է անում: Ուզում է ահուդողի մեջ պահել այս  թատրոնը: Բայց իմ դեպքում իր մոտ դա չի ստացվի, ես նրանից բարձր եմ կանգնած: Իսկ ինքը քանի ռոճիկ է ստանում այս թատրոնում: Յուրաքանչյուր տնօրեն կարող է թերանալ, բայց այդպես չէ, սա կոլեկտիվ է: Երկիրն այդքան թերություն ունի, այ սիրելի բարեկամ-հայրենակից, դու այս երկրի մասին գրելու բան չունես, ընկել ես թատրոնի մեջ ու քո օդորակիչի համար վարկաբեկում ես թատրոնը: Հիմա, որ այդ օդորակիչը տան, էլ չի գրելու, գիտեք չէ: Եղբայր, իսկ ով է ասում, թե նրան օդորակիչ չտան, ես ասել եմ, եթե այդ օդորակիչը թատրոնը չգնի, ես իմ գումարով եմ գնելու: Այն, որ գրում է` թե թատրոնում փողեր են ուտում... Ինչ փողեր, թատրոնում ընդհանրապես փող չկա, թատրոն փող բերում են, թատրոնից ոչ ոք փող չի տանում: Միայն դու ես տանում, 3-4 աշխատավարձ ես ստանում, դու դրա մասին մտածիր: Օրենքներին լավ հետեւոմ ես, բաց արա, նայի, տես, թե այդ ինչպես է լինում, որ դու այդքան ես ստանում, ու ոչ ոք  քո մասին չի գրում: Ասում են` ոչինչ, դե, երեւի այդ մարդը ընտանիք է պահում: Աշխատում է, ինքն աշխատասեր է, բայց մի օդորակիչի համար թատրոնին չի կարելի վարկաբեկել: Մենք թատրոնով հաջողությունների ենք հասնում: Գնում ենք փառատոների, ասում է` ինչու ինձ չեք տարել ձեզ հետ: Կադրերի բաժնի վարիչին տանենք` ինչ անի այնտեղ: Մի խոսքով, շատ տխուր պատմություն է, դրա մասին ես չէի էլ ցանկանա խոսել: Նույնիսկ չեմ էլ ուզում իր հետ մրցման մեջ մտնել, այնքան բաներ են գրել մեր մասին: Երկրիդ մասին մտածիր, ընկեր հայրենասեր:

ՙՀԱՄԲԵՐԱՏԱՐ ՍՊԱՍՈՒՄ ԵՆՔ, ՈՐ ՄԵՐ ՀԵՐԹՆ ԷԼ ԳԱ՚

- Փաստորեն, հիմա թատրոնում ակտիվ վերանորոգում է ընթանում:
- Եթե վերանորոգում է թատոնում, դա կարելի է սարքել հայոց հարց: Չէ որ թատրոնը սուղ միջոցներով, հազիվ կարողանում է վերանորոգում իրականացնել: Իրեն որ հարցնես, կասի` այս թատրոնն այնքան փող ունի, տվեք ինձ: Հերթով, սենյակներով գնում է վերանորոգումը, հիմա իր սենյակի հերթն էլ կգա, բայց դուք տեսե±լ եք, թե մեր գրիմանոցներն ինչ վատ վիճակում են, խոնավ ու վատ պայմաններ են: Իր սենյակը վերանորոգում են, բայց Ժողովրդական եւ Վաստակավոր արտիստները բացարձակ չեն բողոքում դրա համար: Մենք համբերատար սպասում ենք, որ մեր հերթն էլ գա, ու հիմա ինչ-որ կադրերի աշխատող, ուզում է Արմեն Մարությանին վարկաբեկե±լ: Եթե ժողովուրդը պիտի նրան հավատա, իսկ ինձ` ոչ, եղբայր, ուրեմն հավատացեք իրեն:

ԼԻԼԻԹ ԵՂԻԱԶԱՐՅԱՆ