ՙՙՙՙՙՙՙՊԱՀԵՆՔ ԵՐԵԽԱՆԵՐԻՆ ԸՆՏԱՆԻՔՈՒՄ՚

ՙՊԱՀԵՆՔ ԵՐԵԽԱՆԵՐԻՆ ԸՆՏԱՆԻՔՈՒՄ՚

041 կոդով լավագույն 11 հեռախոսահամարների բարեգործական աճուրդից ստացված 27 մլն դրամն Orange-ը նվիրաբերել է ՙՊահենք երեխաներին ընտանիքում՚ ծրագրին
Չորեքշաբթի Orange-ը հայտարարեց ՙՄեկ հեռախոսահամար` մեկ ճակատագիր՚ բարեգործական աճուրդի արդյունքները: Աճուրդում վաճառքի էին հանվել նոր` 041 համարային շարքի 11 լավագույն համարները: Աճուրդի ընթացքում մասնակիցները ներկայացրել էին 181 հայտ: Ներկայացված համարների վաճառքից ստացված ընդհանուր գումարը կազմել է 26.956.717 դրամ: Իր խոստումի համաձայն` Orange-ն ամբողջ գումարը նվիրաբերել է ՙՊահենք երեխաներին ընտանիքում՚ բարեգործական ծրագրին: Բացի այդ, Orange-ը կրկնապատկել է ամենաբարձր հայտագինը, որը կազմել է 5.200.000 դրամ` այն նույնպես ուղղելով նշված ծրագրին:
ՙՏպավորված ենք մեր բարեգործական աճուրդի արդյունքներով: ՙՊահենք երեխաներին ընտանիքում՚ ծրագիրն իրականացնում ենք ՙՎորլդ Վիժն Հայաստան՚ կազմակերպության հետ համատեղ եւ այն Orange հիմնադրամի ամենակարեւոր ծրագրերից մեկն է: Այս 32 մլն դրամը հնարավորություն կտա օգնել շուրջ 30 երեխայի վերադառնալ տուն: Orange Հիմնադրամի անունից շնորհակալություն եմ հայտնում աճուրդի բոլոր մասնակիցներին` ակտիվ մասնակցության եւ առատաձեռնության համար՚,- ասաց ՙՕրանժ Արմենիայի՚ գլխավոր տնօրեն, Orange հիմնադրամի խորհրդի նախագահ Ֆրանսիս Ժելիբտերը:
ՙԱվելի քան 15 տարի ՙՎորլդ Վիժնը՚ Հայաստանում իրականացնում է ծրագրեր` նպատակ ունենալով համայնքներում եւ ընտանիքներում ապահովել բարենպաստ միջավայր երեխաների համար` զարգանալու եւ լիարժեք դրսեւորելու իրենց ներուժը: Orange-ի բաժանորդների առատաձեռն նվիրատվությունների շնորհիվ ՙՎորլդ Վիժնը՚ կշարունակի Հայաստանում աշխատել անապահով ընտանիքների հետ` ստեղծելու կայուն տնտեսական պայմաններ, որոնք թույլ կտան պետական խնամքի հաստատություններից երեխաներին վերադարձնել տուն` վայելելու իրենց ծնողների սերն ու հոգատարությունը՚,- նշեց ՙՎորլդ Վիժն Հայաստան՚ ծրագրի տնօրեն Ժիրայր Էդիլյանը:
Orange հիմնադրամի եւ ՙՎորլդ Վիժն՚ Հայաստան կազմակերպության ՙՊահենք երեխաներին ընտանիքում՚ համատեղ ծրագիրն իրականացվում է 2012 թվականից: Այն Orange-ի բաժանորդներին հնարավորություն է տալիս յուրաքանչյուր ամիս նվիրաբերել 100 կամ 500 դրամ: Ամսվա վերջում Orange հիմնադրամը կրկնապատկում է ամսվա ընթացքում հավաքագրված գումարը եւ ուղղում ծրագրի իրականացմանը: Ծրագրի շրջանակներում սոցիալապես անապահով ընտանիքները ստանում են միջոցներ եւ սարքավորումներ, որոնք նրանց եկամտի կայուն աղբյուր ապահովելու եւ երեխաներին ընտանիք վերադարձնելու հնարավորություն են ընձեռում: Մինչ բարեգործական աճուրդը, այս ծրագրի շնորհիվ արդեն ավելի քան 35 երեխա վերամիավորվել է իր ընտանիքի հետ:

Վ. ՎԱՐԴԱՆՅԱՆ