ՆԱԼԲԱՆԴՅԱՆ-ՄԱՄԵԴՅԱՐՈՎ ՀԱՆԴԻՊՈՒՄԸ ԱՆԱՐԴՅՈՒՆՔ ԷՐ

ՆԱԼԲԱՆԴՅԱՆ-ՄԱՄԵԴՅԱՐՈՎ ՀԱՆԴԻՊՈՒՄԸ ԱՆԱՐԴՅՈՒՆՔ ԷՐ

Սեպտեմբերի 23-ին ՄԱԿ-ի Գլխավոր ասամբլեայի 69-րդ նստաշրջանի աշխատանքների շրջանակներում տեղի է ունեցել հանդիպում` Հայաստանի եւ Ադրբեջանի արտգործնախարարներ Էդվարդ Նալբանդյանի եւ Էլմար Մամեդյարովի միջեւ: Հանդիպման ընթացքում երկու արտգործնախարարները, խոսելով արցախյան հակամարտության խաղաղ կարգավորման ուղիներից, եւս մեկ անգամ վերահաստատել են իրենց վճռականությունը, որպեսզի հարցը լուծվի խաղաղ ճանապարհով: Սա ըստ պաշտոնական հայտարարության: Իսկ ոչ պաշտոնապես, գաղտնիք չէ, որ Ադրբեջանը յուրաքանչյուր  հանդիպման ժամանակ խոսում է հարցի խաղաղ կարգավորումից, սակայն շփման գծում դրսեւորում է այլ դիրքորոշում` անընդհատ կրակելով սահմանի ուղղությամբ: Հայաստանյան փորձագետները ՙԻրավունքի՚ հետ զրույցում փաստեցին, որ ինչքան էլ նման հանդիպումները շատ լինեն, միեւնույնն է, անարդյունք են, քանի որ արցախյան հիմնախնդրի կարգավորման վերաբերյալ Հայաստանի եւ Ադրբեջանի պահանջները տարբեր են:

Ադրբեջանահայերի ասամբլեայի նախագահ, ադրբեջանագետ ԳՐԻԳՈՐԻ ԱՅՎԱԶՅԱՆԸ նշեց.
- Այսպիսի հանդիպումները պարբերաբար են տեղի ունենում, սակայն իրականության մեջ երկու երկրներում էլ քաջ գիտակցում են, որ իրենց դիրքորոշումները Արցախի հարցի վերաբերյալ 180 աստիճանով տարբեր են: Ադրբեջանն իր քայլերով ու վարվեցողությամբ ցույց է տվել, որ ո°չ միջազգային նորմերը, ո°չ հրադարարի ռեժիմը եւ ո°չ էլ ձեռք բերված պայմանավորվածություններն իր համար նշանակություն չունեն: Այսպիսի հանդիպումների ժամանակ Ադրբեջանը  հետապնդում է որոշակի ռազմավարական նպատակ, եւ, ցավոք, այդ նպատակը վերջնական խաղաղության հաստատումը չէ: Այդ հանդիպումները Ադրբեջանի համար ունեն հետեւյալ նշանակությունը` միջազգային հանրության եւ իր երկրի հասարակության աչքերում ցույց տալ, որ ինքը փորձում է խաղաղ բանակցային գործընթացով վերադարձնել Արցախը: Այսպիսով` Ադրբեջանը ժամանակ է շահում` նոր ռազմական ագրեսիայի նախապատրաստվելու համար: Հայաստանը մասնակցելով հանդիպումներին եւ հաշվի առնելով, թե ով է իր դիմաց կանգնած, քաջ գիտակցում է, որ հարցը խաղաղությամբ լուծել հնարավոր չէ: Հանդիպումներով Հայաստանն էլ է ժամանակ շահում, որպեսզի միջազգային հանրությանը ցույց տա ողջ ճշմարտությունը եւ հասնի Արցախի անկախության ճանաչման գործընթացի հաջողությանը: Հավելեմ նաեւ, որ ինչքան էլ նման բանակցությունները ապարդյուն լինեն, այնուամենայնիվ պահպանում են տարածաշրջանում ստատուս-քվոն, որը ժամանակային առումով ձեռնտու է մեզ: Մենք սա հասկացանք սահմանային վերջին լարված իրավիճակի ժամանակ, ինչքան էլ Ադրբեջանն իրեն հզոր հորջորջի, միեւնույնն է, իրականում նա այդքան է հզոր չէ: Հայկական կողմը շատ է ցանկանում հաստատել խաղաղություն, սակայն հակառակ կողմի պահանջները հաշվի առնելով, հասկանում ենք` նման պայմաններում խաղաղությամբ հարցը լուծել հնարավոր չէ:
Ադրբեջանագետ ՍԱՐԳԻՍ ԱՍԱՏՐՅԱՆԸ փաստեց.
- Սովորաբար այսպիսի հանդիպումներից հետո գոնե սահմանային լարվածության անկում չի գրանցվում: Արցախյան հիմնահարցի կարգավորման հարցում փորձեր արվում են, սակայն ոչ մի առաջընթաց չկա: Այս հանդիպումն էլ այն հերթական հանդիպումներից մեկն է, որը արդյունք չի տվել: Գիտենք, որ ադրբեջանական կողմը այս հարցում դրսեւորում է ոչ գործնական պահվածք: Կարծում եմ, որ մոտ ապագայում արցախյան հիմնախնդիրը այլ հարթակ չի տեղափոխվելու:
Քաղաքագետ ԼԵՎՈՆ ՄԵԼԻՔ-ՇԱՀՆԱԶԱՐՅԱՆՆ էլ ավելացրեց.
- Ո°չ այս հանդիպումը, ո°չ էլ այլ հանդիպումներ մոտ ապագայում չեն կարող օգտակար ազդեցություն ունենալ արցախյան հիմնախնդրի կարգավորման վրա: Սա այսօր բացառվում է, քանի որ Ադրբեջանն իր սադրիչ գործողություններով խանգարում է գործընթացին: Մեր եւ Ադրբեջանի պահանջները իրարամերժ են, այս  պայմաններում հնարավոր չէ հարցը լուծել բանակցային ճանապարհով:

Z-PR սոցհարցման կենտրոնը Երեւան քաղաքում 100 հոգու շրջանում կատարել է հարցում` պարզելու համար, թե Արցախի հիմնախնդրի խաղաղ կարգավորման համար ինչ ադյունք կտան Հայաստանի եւ Ադրբեջանի արտգործնախարարների` Նյու Յորքի այդ հերթական հանդիպումը:
1. Ոչ մի արդյունք չի ակնկալվում- 82%:
2. Այս հանդիպման արդյունավետությունը տեսանելի կդառնա հոկտեմբերին Փարիզում սպասվող նախագահների մակարդակով հանդիպման ժամանակ- 7%:
3. Քանի որ հանդիպումը կազմակերպված էր ԱՄՆ-ի նախաձեռնությամբ, այն բանակցային գործընթացում իր դերը կունենա- 4%:
4. Դժվարանում եմ պատասխանել- 7%:

ԶՎԱՐԹ ԽԱՉԱՏՐՅԱՆ