ԻՆՉ ՈՐԱԿԻ ՊԱՆԻՐ ԵՆՔ ՕԳՏԱԳՈՐԾՈՒՄ

ԻՆՉ ՈՐԱԿԻ ՊԱՆԻՐ ԵՆՔ ՕԳՏԱԳՈՐԾՈՒՄ

Այսօր Հայաստանում արտադրվում է 17 տեսակի պանիր: Բացի այդ, Հայաստանի սպառողների համար ընտրության շրջանակներն ավելի են մեծանում, քանի որ Հայաստան  պանիր ներկրվում է նաեւ Եվրոպայից: Ծավալների առումով` նեկրված պանիրը քիչ է, սակայն տեսականին շատ է:
Հայաստանի պանրագործների միության նախագահ Արմեն Գիգոյանի խոսքով` որակական առումով տարբերություն չկա տեղական եւ ներկրված պանիրների միջեւ. միակ տարբերությունն այն է, որ տեղական արտադրության պանիրներն արտադրվում են դասական տեխնոլոգիաներով եւ չունեն հավելումներ: Չնայած հավելանյութերի բացակայությունը պետք է, որ տեղական արտադրանքի որակական մակարդակը էականորեն բարձրացներ, սակայն վերջին շրջանում պանրի շուկայի հետ կապված` բողոքների պակաս չկա: Դժգոհությունները հիմնականում վերաբերում են բարձր յուղայնության պանիրների անվան տակ յուղազրկվածը վաճառելուն, ինչպես նաեւ, որ սխալ պահպանման կանոններ են կիրառվում, ինչը հաճախ տեղական պանիրները նույնիսկ վաճառքի փուլ հասցնում են փչացած վիճակում:
Ըստ Պանրագործների միության նախագահի` պանիր արտադրողներն այնքան շատ են, որ հնարավոր է լինեն որակի հետ կապված թերացումներ. ՙԵթե անդրադառնանք վերջին տարիների դինամիկային, ապա կարող եմ ասել, որ արտադրված պանրի որակը էականորեն բարձրացել է, ժողովուրդը սկսել է գումար վճարել որակի դիմաց: Այսինքն` մարդիկ սկսել են որակով պանիրը գնահատել: 13-14 տարիների ընթացքում ես չեմ ստացել բողոքներ` կապված պանրի որակի հետ: Եղել են թեթեւ խոսակցություններ. մեկն ասել է` պանիրը աղի է, մյուսը` պանրի մեջ աղը քիչ է եւ այլն: Լուրջ  բողոքներ չենք ունեցել՚,- նշեց Արմեն Գիգոյանը: Նրա հավաստմամբ` պանրի որակի վերահսկողության հարցում Սննդամթերքի անվտանգության պետական ծառայությունը եւս իր լիազորությունների սահմաններում կատարում է պատշաճ վերահսկողություն:
Ինչ վերաբերում է խանութներում վաճառվող պանրի որակին, պրն Գիգոյանն ասաց. ՙԽանութներում վաճառվող պանրի վերահսկողությունը մեկ այլ հարց է: Հայաստանում խանութները սկսել են ցանցավորվել, եւ այդ ցանցի տերերի հետ գործ ունենալը մի քիչ դժվար է: Այս դեպքումª խանութն արդեն դառնում է թելադրող: Եթե նրան ասես` անորակ պանիր մի բեր խանութ, կասիª իմ խանութն է` ինչ ուզեմ` կանեմ՚:
Ինչ վերաբերում է պանրի շուկայի նկատմամբ համընդհանուր վերահսկողությանը, ապա այդ դեպքում, ինչպես Արմեն Գիգոյանը մեկնաբանեց` կմեծանան կոռուպցիոն ռիսկերը, քանի որ սա ոչ թե Եվրոպան է, այլ` Հայաստանը, որտեղ ծանոթ, փող, ու ամեն ինչ կավարտվի հաջողությամբ:
Արմեն Գիգոյանը նաեւ նշեց, որ հնարավոր է` պանիրը թանկանա, ամեն ինչ կախված է այն հանգամանքից, թե ինչ ինտենսիվությամբ պանիր կարտահանվի: Արտահանումից բացի, խիստ նվազել են կաթի մթերման ծավալները, ինչը  պանրագործության մեջ այն մեծագույն խնդիրն է, որը խանգարում է պանրի արտադրության ծավալների մեծացմանը:

ԶՎԱՐԹ ԽԱՉԱՏՐՅԱՆ