ԻՇԽԱՆ ԶԱՔԱՐՅԱՆԸ ՔԱՐ ԳՑԵՑ ՌՈԲԵՐՏ ՔՈՉԱՐՅԱՆԻ ԲՈՍՏԱՆԸ

ԻՇԽԱՆ ԶԱՔԱՐՅԱՆԸ ՔԱՐ ԳՑԵՑ ՌՈԲԵՐՏ ՔՈՉԱՐՅԱՆԻ ԲՈՍՏԱՆԸ

ԱԺ-ում երեկ Վերահսկիչ պալատի` քաղաքաշինության ոլորտին վերաբերող հաշվետվությունը հրապարակվեց:
Վերահսկիչ պալատը սկսած 2008 թվականից վերահսկում է բյուջետային միջոցներով իրականացվող շինարարական աշխատանքների օրինականությունն ու արդյունավետությունը: Վերահսկիչ պալատի կողմից արձանագրվել են չկատարված աշխատանքների դիմաց վճարումներ, անորակ աշխատանքներ, գների արհեստական բարձրացումներ, նախագծային եւ շինարարական աշխատանքների տարաբնույթ խախտումներ, թերի եւ սահմանված կարգի խախտումներով իրականացված տեխնիկական եւ հեղինակային հսկողություն եւ այլն:
Վերահսկողության արդյունքում խախտում թույլ տված բազմաթիվ սուբյեկտներ առ այսօր բավականին գումարներ են վերականգնել պետբյուջե, բացի այդ, վերջիններիս կողմից վերացվել են նաեւ կատարված անորակ աշխատանքները: Վերահսկիչ պալատի կողմից ՀՀ կառավարությանը ներկայացվել են ոլորտում առկա խնդիրների եւ կոռուպցիոն ռիսկերի նվազեցմանն ուղղված մի շարք առանցքային առաջարկություններ:
Արձանագրվել է 4,982 հազ. դրամի անորակ աշխատանք, ծավալային հավելագրում չի հայտնաբերվել: Հարկ է նշել, որ ծավալային հավելագրումներ չեն հայտնաբերվել մարզպետարաններում եւ Հայաստանի սոցիալական ներդրումների հիմնադրամում ստուգված շինարարական աշխատանքներում:
ՎՊ նախագահ Իշխան Զաքարյանը սա դրական տեղաշարժ համարեց, քանի որ շինարարության ոլորտն ուսումնասիրվում է 2006-ից, սակայն միայն 2008-2013 թվականներին հավելագրոումներ չեն հայտնաբերվել մարզպետարաններում եւ Հայաստանի սոցիալական ներդրումների հիմնադրամում ստուգված շինարարական աշխատանքներում: Մինչդեռ, նախորդ տարիներին այդ ցուցանիշը մշտապես բավականին բարձր է եղել:
Իշխան Զաքարյանը փաստորեն ժողովրդական լեզվով ասած` քար գցեց նախկին նախագահ Ռոբերտ Քոչարյանի բոստանը` նկատի ունենալով նրա ղեկավարման տարիները, երբ շինարարության ոլորտում առկա են եղել հավելագրումներ: ՙԻրավունքի՚ այս դիտարմանը ի պատասխան Իշխան Զաքարյանը խորհուրդ տվեց հարցը չքաղաքականացնել: ՙԻ±նչ կապ ունի այս պարագայում Քոչարյանը կամ այս նախագահը, մենք խոսում ենք ծրագրի մասին: Մենք միտում չունենք հարցերը քաղաքականացնելու: Թերություններ միշտ էլ եղել են, այն թերությունները, որոնց մասին խոսում ենք, բոլոր երկրներում էլ կան՚,- եզրափակեց ՎՊ նախագահը:
Ըստ ՎՊ նախագահի, սակայն, եթե վերոնշյալ կառույցներում հավելագրումներ չեն եղել, դա չի նշանակում, որ շինարարության ոլորտում խնդիրներ ու խախտումներ չկան:

ՍՈՆԱ ԴԱՎԹՅԱՆ