ՎԵՐԱՀՍԿԻՉ ՊԱԼԱՏԸ ԽԱԽՏՈՒՄՆԵՐ Է ՀԱՅՏՆԱԲԵՐԵԼ ՏՐԱՆՍՊՈՐՏԻ ԵՎ ԿԱՊԻ ՆԱԽԱՐԱՐՈՒԹՅՈՒՆՈՒՄ

ՎԵՐԱՀՍԿԻՉ ՊԱԼԱՏԸ ԽԱԽՏՈՒՄՆԵՐ Է  ՀԱՅՏՆԱԲԵՐԵԼ

ՏՐԱՆՍՊՈՐՏԻ ԵՎ ԿԱՊԻ ՆԱԽԱՐԱՐՈՒԹՅՈՒՆՈՒՄ

ՎՊ-ն այսօր ԱԺ-ին ներկայացրեց  ճանապարհաշինության ոլորտի տարեկան հաշվետվութունը: Ըստ փաստաթղթի՝ հյուսիս-հարավ ճանապարհային միջանցքի ներդրումային ծրագրի կատարման օպերատիվ վերահսկողության արդյունքները ցույց տվեցին, որ խորհրդատվական ծառայություններ մատուցող Սաֆեջ Էս. Ա. (Safege (Ֆրանսիա) և Էպտիսա (Eptisa (Իսպանիա) համատեղ ձեռնարկության կողմից չեն կատարվում պայմանագրային պարտականությունները:

Ըստ էության, աշխատանքների որակի որևէ վերահսկողություն չէր իրականացվում: Կատարված աշխատանքները չէին համապատասխանում տեխնիկական մասնագրերով, ամերիկյան AASHTO և բրիտանկան BS ստանդարտներով սահմանված նորմերի պահանջներին և որակական չափանիշներին: Աշխատանքների տեմպը դանդաղել էր, որակը՝ նվազել:

Վերահսկիչ պալատի վերահսկողության արդյունքում աշխատանքներն իրականացնելիս օգտագործված բիտումը չի ունեցել ծագման ու որակի հավաստագիր: Որոշ դեպքերում ասֆալտբետոնի խառնուրդում բիտումի և հանքային փոշու չափաբաժինը, ինչպես նաև բիտումի և օգտագործված խիճի մակնիշը չի համապատասխանում ՀՀՇՆ-ով, ԳՕՍՏ-ով և բաղադրատոմսով սահմանվածին: Լաբորատոր հետազոտությունների արդյունքներն արժանահավատ չեն

Ինչ վերաբերում է ֆինանսական խախտումներին,  ըստ ՎՊ-ի տարեկան հաշվետվության՝ տրանսպորտի և կապի նախարարությունում հաշվետու տարում ընտրանքային կարգով ստուգվել է 3,877,448.4 հազ. դրամի աշխատանք և հայտնաբերվել 28,051.3 հազ. դրամի ծավալային հավելագրում: Համեմատության համար պետք է նշել, որ այդ ցուցանիշը նախորդ տարիներին եղել է ավելի բարձր:

Ի դեպ, այսօր ԱԺ-ում բացի  ճանապարհաշինության ոլորտի հաշվետվությունից,  ՎՊ-ը  ներկայացրեց նաեւ քաղաքաշինության ոլորտի հաշվետվությունը, որի քննարկման  ժամանակ  պարբերաբար միջամտում եւ իր անհամաձայնությունն էր հայտնում տրանսպորտի եւ կապի  նախարար Գագիկ Բեգլարյանը: Քննարկման ավարտից հետո լրագրողների այն հարցին՝ ինչու էր Գագիկ Բեգլարյանը պարբերարբար  իր անհամաձայնությունը հայտնում  քաղաքաշինության ոլորտի հաշվետվության քննարկմանը, նախարարը կարճ պատասխանեց՝ ընդամենը  ճշգրտումներ անելու նպատակով:

Հիշեցնենք, որ Գագիկ Բեգլարյանի եղբայրն այս տարի նշանակվել է փոխնախարար  քաղաքաշինության  նախարարությունում:

Սոնա Դավթյան