ՇԱԼԱՆԴԻՆ ՄՆՈՒՄ Է ՄԻԱՅՆ ԱՆՁԱՄԲ ԴՈՒՐՍ ԳԱԼ ԽԱՂԱԴԱՇՏ

ՇԱԼԱՆԴԻՆ ՄՆՈՒՄ Է ՄԻԱՅՆ ԱՆՁԱՄԲ ԴՈՒՐՍ ԳԱԼ ԽԱՂԱԴԱՇՏ

Արաս Օզբիլի եւ Յուրա Մովսիսյանի վնասվածքները բավական չէին, հիմա էլ շարքից դուրս է եկել Հենրիխ Մխիթարյանը, ով վնասվածք է ստացել ՙՄայնցի՚ դեմ գերմանական Բունդեսլիգայի չորրորդ տուրի խաղում:
Այդ խաղում Հայաստանի հավաքականի 25-ամյա ֆուտբոլիստը փոխարինման դուրս եկավ երկրորդ խաղակեսի միջնամասում, իսկ վերջին րոպեներին ստացավ վնասվածք, բայց կարողացել է ավարտել հանդիպումը: Տպավորությունն այն էր, թե լուրջ բան չկա, բայց ահա ՙԲորուսիայի՚ բժիշկ Մարկուս Բրաունի խոսքով` Մխիթարյանի ապաքինման համար կպահանջվի մոտ 4 շաբաթ: Իսկ դա նշանակում է, որ Մխիթարյանը չի մասնակցի մեր հավաքականի սերբերի դեմ ՙԵվրո-2016՚-ի ընտրական փուլի երկրորդ տուրի խաղին, որը կայանալու է հոկտեմբերի 11-ին` Երեւանում: Բացի այդ, Հայաստանի հավաքականն ընկերական խաղ է անցկացնելու նաեւ ՙԵվրո-2016՚-ը հյուրընկալող ֆրանսիացիների հետ:

Այսպիսով` եթե Օզբիլիսի բացակայության դեպքում ազգային ընտրանին կորցնում է առջեւի գծում անկանխատեսելի գործելու եւ մրցակիցներին հեռահար հարվածներով անակնկալի բերելու հնարավորությունները, իսկ Մովսիսյանի դեպքում` առաջարատ ընդգծված հարձակվողին, ապա Մխիթարյանի դեպքում մենք կորցնում ենք գրեթե ամեն ինչ: Որքան էլ որ փորձեն չընդունել, միեւնույնն է` ազգային ընտրանու խաղն այսօր կառուցվում է հենց Մխիթարյանի շուրջ: Ասենք` դա ցույց տվեց նաեւ ՙԵվրո-2016՚-ի առաջին խաղը, երբ վնասվածքի պատճառով Մխիթարյանին փոխարինելուց հետո մեր հավաքականի խաղը միանգամից ՙավարտվեց՚: Վիճակն անհուսալի է դառնում հատկապես, երբ ոչ միայն համարժեք, այլեւ առհասարակ փոխարինման հարմար թեկնածու չունենք:
Խնդիրները սակայն այսքանով էլ չեն ավարտվում. իրանական ՙԷսթեղլալի՚ կազմում հանդես եկող Հայաստանի ազգային հավաքականի պաշտպան Հրայր Մկոյանը եւս վնասվածք է ստացել Իրանի առաջնության խաղում: Նախնական տվյալների համաձայն` գյումրեցի պաշտպանի վերականգնման համար կպահանջվի 2 շաբաթ, ինչը նշանակում է, որ նրա մասնակցությունը սերբերի դեմ խաղին` եւս հարցականի տակ է: Իսկ սա իր հերթին նշանակում է, որ այդ հանդիպման ժամանակ փորձարարական կազմ ենք տեսնելու: Հայաստանի ազգային հավաքականի գլխավոր խնդիրը միշտ էլ պաշտպանությունն է եղել: Եթե նախորդ խաղում ազգային ընտրանին հադես էր գալիս 5 պաշտպանով, ինչն առաջացրել էր համընդհանուր դժգոհություն, ապա այս պարագայում խիստ պաշտպանողական ֆուտբոլի համար գլխավոր մարզիչ Բեռնար Շալանդին մեղադրել չի հաջողվի: Ստացվում է, որ ո՞չ հարձակվելու, ոչ էլ կարգին պաշտպանվելու հնար չունենք:
Եվ, առհասարակ, պարտվելու դեպքում էլ, Շալանդին որեւէ կերպ մեղադրել հնարավոր չէ. իսկապես որ նրան մեկ հնար է մնում՝ հագնել մարզազգեստն ու անձամբ դուրս գալ խաղադաշտ: Ինչ լուծում կգտնի այս հարցին շվեյցարացի մասնագետը, կտեսնենք առաջկա հանդիպման ժամանակ: Ամեն դեպքում՝ սերբերի դեմ կայանալիք հադիպումը լավ հնարավորություն է` մեր գլխավոր մարզչի ֆուտբոլային հնարամտությունը ստուգելու համար:

ՔՐԻՍՏԻՆԵ ՊԵՏՐՈՍՅԱՆ