ՙԹՈՒՐՔԻԱՆ 100 ՏԱՐԻ ՉԻ ԸՆԴՈՒՆԵԼ ՑԵՂԱՍՊԱՆՈՒԹՅՈՒՆԸ, ՀԻՄԱ ԿԱՍԻ` ԱՅՍ ՏԱՐԻ 100-ԱՄՅԱԿՆ Է, ԵԿԵՔ ԸՆԴՈՒՆԵ՞ՆՔ

«ԹՈՒՐՔԻԱՆ 100 ՏԱՐԻ ՉԻ ԸՆԴՈՒՆԵԼ  ՑԵՂԱՍՊԱՆՈՒԹՅՈՒՆԸ,  ՀԻՄԱ ԿԱՍԻ` ԱՅՍ ՏԱՐԻ 100-ԱՄՅԱԿՆ Է, ԵԿԵՔ ԸՆԴՈՒՆԵ՞ՆՔ»

Օրերս Երեւանում կայացավ ստամբուլահայ երգչուհի ՍԻԲԻԼ ՓԵԿԹՈՐՈՍՕՂԼՈՒ «Սեր» ձայնասկավառակի հայաստանյան շնորհանդեսը, ինչից անպակաս չէին անակնկալներն ու արցունքները: Շնորհանդեսի ժամանակ ՀՀ սփյուռքի նախարար Հրանուշ Հակոբյանը երգչուհուն պարգեւատրեց «Կոմիտաս» մեդալով: Սիբիլը հուզված էր ու տպավորված եւ իհարկե` չափազանց ուրախ, որ ձայնասկավառակի ողջ հասույթը տրամադրվելու է հայաստանյան մանկապարտեզներից մեկի վերանորոգմանը: Շնորհանդեսի, Հայոց ցեղասպանության 100-րդ տարելիցի եւ իր նոր ծրագրերի մասին «Իրավունքը» առիթ ունեցավ զրուցելու Սիբիլի հետ:

«ԹՈՒՐՔԻԱՅԻ ՀԱՄԱՐ ԱՅԴՔԱՆ ԴՅՈՒՐԻՆ ՉԷ ԸՆԴՈՒՆԵԼ ՀԱՅՈՑ ՑԵՂԱՍՊԱՆՈՒԹՅՈՒՆԸ»

-Սիբի՛լ, նախ խոսենք «Սեր» ձայնասկավառակի շնորհանդեսի մասին:

- Շատ ուրախ եմ, իսկապես շատ մարդիկ ներկա եղան շնորհանդեսին, եւ հրաշալի մեդալով պարգեւատրվեցի: Հատկապես ուրախ եմ, որ բարեգործական նպատակով թողարկեցի ձայնասկավառակս եւ միեւնույն ժամանակ կրկին եկա հայրենիք` նոր երգերիս ծանոթացնելու համար: Հուսամ` բոլորի սրտերի մեջ այն տեղ կգրավի:
- Այս ալբոմով Սիբիլը ողջ աշխարհի վրա սեր է սփռում, իսկ հաջորդ ձայնասկավառակը ինչի՞ն նվիրված կլինի:
- Կշարունակի այդ սերը սփռվել (ծիծաղում է երգչուհին- Հ. Ս.): Դեռ կտեսնենք, թե հաջորդը ինչ կլինի:
- Իսկ չե՞ք պատրաստվում գտնել Ձեր սերը:
- Ինչու ոչ, հուսամ:
- Հետաքրքիր է` հաջորդ քայլը ո՞րը կլինի, որով կներկայանաք հանրությանը:
- Այս ձայնասկավառակը դեռ նոր է, հուսամ` դեռ շատ լավ բաներ կկարողանամ անել: Շատ ծրագրեր ունեմ, տա Աստված` բոլորն էլ կարողանամ իրականացնել:
- Մյուս տարի լրանում է Հայոց ցեղասպանության 100-րդ տարելիցը, ինչ-որ բան նախատեսե՞լ եք անել Թուրքիայում:
- Թուրքիայում ես միայնակ այդպիսի բան չեմ կարող անել. եթե կազմակերպվի, ինչու ոչ: Այդ կազմակերպիչների խնդիրն է հարցը, ես կազմակերպիչ չեմ, իսկ շուրջս այդպիսի մարդիկ չկան: Եթե ասեն` Սիբիլ, այսինչ տեղում համերգ կա, կմասնակցես, սիրով ներկա կլինեմ:
- Այսինքն` Թուրքիայում որեւէ բան նախաձեռնելն անհնա՞ր է:
- Ապրիլի 24-ին չեմ կարծում, որ հնարավոր լինի համերգ կազմակերպել: Ով պիտի անի: Հայերը չեն կարող այդպիսի բան անել` կառավարական խնդիրների պատճառով, բայց երեւի արտասահմանը կկարողանա անել... Չգիտեմ, ինչ որ ասեմ` սուտ կլինի, որովհետեւ այդպիսի բան դեռ չի եղել: Ապրիլի 24-ին ցույցեր անում են Թուրքիայում, այն ուրիշ է, բայց Հայոց ցեղասպանությանը նվիրված համերգ կկարողանան անել, թե ոչ, դա ես չեմ կարող ասել:
- Դուք այսքան տարի ապրել եք թուրքերի մեջ ու թերեւս ավելի լավ գիտեք` ի վերջո, հնարավո՞ր է, որ Թուրքիան 2015-ին ճանաչի Հայոց ցեղասպանությունը:
- Շատ դժվար հարց է, դուք որքան գիտեք, այնքան էլ ես գիտեմ: Աստված գիտի… Թուրքիայի համար այդքան դյուրին չէ ընդունել Հայոց ցեղասպանությունը: Թուրքիան 100 տարի չի ընդունել ցեղասպանությունը,  հիմա կասի` այս տարի 100-ամյակն է, եկեք ընդունենք: Դժվար է, բայց մենք էլ ձեզ պես կսպասենք:

«ՈՐՊԵՍԶԻ ՍԻԲԻԼԸ ԹՈՒՐՔԻԱՅՈՒՄ ՃԱՆԱՉԵԼԻ ԴԱՌՆԱ, ԱՌԱՋԱՐԿԵԼ ԵՆ ԹՈՒՐՔԵՐԵՆ ԵՐԳԵԼ, ՉԻ ՀԱՄԱՁԱՅՆԵԼ»

Ի դեպ, շնորհանդեսին ներկա էր նաեւ ՀՀ վաստակավոր արտիստուհի, երգչուհի ԼԵՅԼԱ ՍԱՐԻԲԵԿՅԱՆԸ, ով մեզ հետ զրույցում նշեց, որ իր համար Սիբիլը նախեւառաջ հայուհու կերպար է. «Անկախ նրանից, թե մարդը որտեղ է ապրում, ամեն դեպքում արյան կանչն է որոշողը, եւ ես շատ ուրախ եմ, որ Թուրքիայում ապրում է մի երգչուհի, ով ինձ համար առաջին հերթին լավ մարդ է, հետո լավ երգչուհի: Սիբիլն իր հարցազրույցներից մեկի ժամանակ ասել է, թե որպեսզի ինքը Թուրքիայում ճանաչելի դառնա, պրոդյուսերն իրեն առաջարկել է թուրքերեն երգել, բայց չի համաձայնել: Կարծում եմ` սա եւս մեկ անգամ ապացուցում է, որ նա շատ սկզբունքային մարդ է: Սփյուռքում այսպիսի մարդիկ, հատկապես արվեստի, մեզ շատ պետք են: Պետք են, որպեսզի մենք եւս մեկ անգամ կարողանանք ասել, որ Սփյուռքի մեր համայնքը շատ վստահելի ձեռքերում է: Որեւէ անգամ չեմ լսել` նա թուրքաարաբական ելեւէջների երգեցողությամբ երգի, եւ ուրախ եմ, որ ինքն այսօր կա երգարվեստում, հատկապես ուզում եմ նշել` հայ երգարվեստում: Հուսամ` մի օր կգա, որ Սիբիլի հետ կկարողանանք համագործակցել, որի համար կլինեմ շատ ուրախ»: Ապա մաղթեց. «Շնորհավորում եմ եւս մեկ ձայնասկավառակի ծնունդը, թող այն լինի իր երազնանքների իրականացման եւս մեկ հիմնաքար, եւս մեկ ներդրում հայ երգարվեստի մեջ»:

«ՍԻԲԻԼԸ ԴՐՍՈՒՄ ԱՎԵԼԻ ՀԱՅԱՊԱՀՊԱՆ ԳՈՐԾ Է ԱՆՈՒՄ, ՔԱՆ ՇԱՏՈՒՇԱՏ ԵՐԳԻՉ-ԵՐԳՉՈՒՀԻՆԵՐ` ՀԱՅԱՍՏԱՆԻ ՆԵՐՍՈՒՄ»

Խոսելով Սիբիլի մասին` «Իրավունքի» հետ զրույցում երգչուհի ԱՆՆԱ ԽԱՉԱՏՐՅԱՆՆ անկեղծացավ. «Պիտի խոստովանեմ, որ Սիբիլին շատ սիրում եմ ու նոր չէ, որ նրան ճանաչում եմ: Նա շատ ճիշտ ժամանակին, ճիշտ տեղում հայտնվեց: Համենայնդեպս, ինձ համար իր կատարած աշխատանքը շատ կարեւոր ու գնահատելի է, որովհետեւ Սիբիլի նման երգչուհիներ ընդհանրապես մեզ շատ են պետք: Եվ ասեմ, որ Սիբիլի նման երգչուհիներ մեզ պետք են առաջին հերթին Հայաստանում: Ցավով եմ նշում այդ փաստը, բայց Սիբիլը դրսում ավելի հայապահպան գործ է անում, քան շատուշատ երգիչ-երգչուհիներ` Հայաստանի ներսում»: Անցնելով շնորհավորանքներին` հավելեց. «Սիբիլն այն երգչուհին է, ով ապրել ու մեծացել է թուրքական մշակույթի մեջ, բայց ամեն կերպ խուսափում է թուրքական ելեւէջներից: Իսկ շատուշատ երգիչ-երգչուհիներ Հայաստանի ներսում վարվում են ճիշտ հակառակ կերպ, ինչն ինձ` որպես երգչուհու, անկեղծ ասած, նյարդայնացնում է: Ինքս էլ աշխատում եմ երբեւէ այդ ելեւէջներին չմոտենալ ու շատ ուրախ եմ, որ Սիբիլն ընդհանրապես կա ու կա նաեւ իմ կյանքում: Ընդհանրապես ուզում եմ` նրա բոլոր երազանքները կատարվեն, եւ կարծում եմ, որ այդ բոլոր երազանքների հիմնական մասը կապված է հենց հայ ժողովրդի ու Հայաստանի հետ»:

ՀՐԱՆՏ ՍԱՐԱՖՅԱՆ