ՙԿՈԱԼԻՑԻԱ ԿԱԶՄԱՎՈՐԵԼԸ ԻՆՔՆԱՆՊԱՏԱԿ ՉԷ՚

ՙԿՈԱԼԻՑԻԱ ԿԱԶՄԱՎՈՐԵԼԸ ԻՆՔՆԱՆՊԱՏԱԿ ՉԷ՚

Հայաստանի Հանրապետության` Մաքսային միության անդամակցման չարչրկված հարցը հասնում է իր կուլմինացիային: Հոկտեմբերի սկզբին այն այլեւս իրականություն կդառնա` ճանապարհ բացելով դեպի ԵՏՄ անդամակցման, թեպետ հենց դրա շուրջ էլ այս օրերին հասունանում է ու միեւնույն ժամանակ քիչ-քիչ մարում ներքին քաղաքական օպոզիցիոն աղմուկը: Այս ամենի շուրջ ՙԻրավունքը՚ զրուցեց ԱԺ Պետաիրավական մշտական հանձնաժողովի նախագահ, ԱԺ ՀՀԿ խմբակցության պատգամավոր ՀՈՎՀԱՆՆԵՍ ՍԱՀԱԿՅԱՆԻ հետ:

ՙՄԵՆՔ ՔԱՅԼ ՉԵՆՔ ԿԱՏԱՐԵԼ` ԸՆԴԱՄԵՆԸ ԿԱՏԱՐԵԼՈՒ ՀԱՄԱՐ՚

-Պարոն Սահակյան, ե°ւ իշխանությունը, ե°ւ ընդդիմությունն այս օրերին պատրաստվում է հոկտեմբերի 10-ին սպասվելիք իրադարձություններին` կապված Եվրասիական միությանը Հայաստանի անդամակցության փաստաթղթի վավերացման հետ: Ըստ Ձեզ` Ազգային ժողովն այսօր պատրաստ է դրան:
- Մենք բազմիցս նշել ենք Եվրասիական տնտեսական միության հետ կապված մեր պատկերացումների մասին: Այսօր նորից անդրադառնալ, նշել այդ մասին կամ պատասխանել ընդդիմությանը, չեմ կարծում, որ ճիշտ է կամ տեղին: Մենք ունենք մեր պատկերացումները, որոնք ներկայացրել ենք, քննարկել ու շարունակում ենք ավելի բաց, թափանցիկ եւ հրապարակային գնալ այդ ուղղությամբ: Թե ով ինչ կասի, իրենց խնդիրն է: Ամեն անգամ յուրաքանչյուր խոսքին արձագանքնելով` կարծում եմ` որեւէ արդյունքի չենք հասնի:
- Ամեն դեպքումª տեսակետներ են շրջանառվում, որ եթե անգամ Ռուսաստանն ու Հայաստանը շատ ցանկանան, ԵՏՄ համահեղինակ Ղազախստանի նախագահ Նազարբաեւն ամեն ինչ կանի, որպեսզի Հայաստանի անդամակցման օրը, այնուամենայնիվ, ինչ-որ բան չստացվի:
- Չեմ կարող ասել, թե ինչպիսի նախաձեռնությամբ հանդես կգան Նազարբաեւը եւ մյուսները, բայց մեր պահանջներն ու պատկերացումները հստակ են: Մենք քայլ չենք կատարել` ընդամենը կատարելու համար, այլ արել ենքª պատկերացնելով մեր դերակատարումը այդ կառույցի մեջ: Պատկերացնելով նաեւ մեր տնտեսության բարելավման հեռանկարները այդ միության մեջ, միեւնույն ժամանակ` այն ռիսկերը, որոնք կարող են լինել: Այսինքն` մենք ամբողջությամբ ուսումնասիրել ենք այդ ամենը, հետո նոր քայլ ենք կատարել: Իսկ թե հիմա որ երկրի ղեկավարը, կամ ով ինչպիսի քայլեր կկատարի, իրենց խնդիրն է, բնականաբար, մենք ունենք մեր քայլերի հաջորդականությունը:

ՙՀՈԿՏԵՄԲԵՐԻ 10-Ի ՀԱՆՐԱՀԱՎԱՔԸ ԱՐՎԱԾ Է ՊԱՏԱՀԱԿԱՆ ԿԱՄ
ԴԻՏԱՎՈՐՅԱԼ, ԻՐԵՆՑ ԽՆԴԻՐՆ Է՚

-Այս ենթատեքստում ոչ իշխանական ՙքառյակը՚, որը ՀՅԴ-ի հեռանալուց հետո դարձավ ՙեռյակ՚, ի±նչ կկարողանա անել նույն հոկտեմբերի 10-ի իր հանրահավաքով, որպեսզի խոչընդոտի ԵՏՄ-ին անդամակցությանը:
- Հանրահավաքներ անցկացնելու, տեսակետներ հայտնելու հարցում ոչ ոք սահմանափակված չէ, եւ իրենք կարող են ազատ խոսել, հայտնել իրենց մոտեցումները եւ այլն: Թե ՙեռյակի՚ հանրահավաքն ինչպիսի բնույթ կունենա, այն հոկտեմբերի 10-ին արված է պատահական կամ դիտավորյալ, իրենց խնդիրն է: Այս ամբողջ կանոնները հարգելով հանդերձ` ունենք նաեւ շատ կարեւոր պատկերացում. մենք իրավական պետություն ենք եւ ցանկացած քայլ պետք է իրականացվի բացառապես օրենքի շրջանակներում:
- Այնուամենայնիվ, խորհրդարանական երեք ուժերը` ԲՀԿ-ն, ՙԺառանգությունն՚ ու ՀԱԿ-ը հանրությանը կկարողանա±ն իրենց շուրջ համախմբել, մանավանդ որ, առ այսօր հստակ չէ, թե իրենց առաջնորդները կմասնակցե±ն հանրահավաքին, թե` ոչ:
- Համախմբել ասվածը մեկ այլ խնդիր է. կարող են բերել մեկ-երկու կամ երեք-չորս հազար մարդ: Բայց պետք է ունենան քայլերի հաջորդականություն,  տրամաբանություն եւ պատճառահետեւանքային կապ` քայլերի եւ դրանց վերջնագծի հետ կապված: Այսինքն` կարեւոր է, թե ինչ նպատակով են անում, ինչ պետք է իրականացնեն եւ ինչպիսի մեխանիզմներ պետք է կիրառեն: Այլապես մենք կունենանք մի իրավիճակ, երբ նորից հավաքվում են ու որեւէ բան չեն որոշում: Սա է խնդիրը, որի շուրջ պետք է բոլորը ուշադիր լինեն, որպեսզի հերթական հանրահավաքից հետո չունենան, այսպես ասած, հիասթափություն:

ՙՄԵՐ ՀԻՇՈՂՈՒԹՅՈՒՆԸ ՎԱՏ ՉԷ,
ՈՒ ԿԱՐՈՂ ԵՆՔ ՀԻՇԵՑՆԵԼ ԻՐԵՆՑ ՏԵՍԱԿԵՏՆԵՐԸ՚

-Ի դեպ, ՙեռյակի՚ ներկայացուցիչներից շատերը հավատացած են, որ  սահմանադրական բարեփոխումների հետ կապված` ՀՅԴ-ի առաջարկները իշխանությունը չի ընդունի, եւ նրանք ստիպված կլինեն վերադառնալ ՙհարազատ՚ ՙքառյակ՚: Ի±նչ կասեք այս մասին:
- ՙԵռյակը՚ փորձում է կանխատեսումներով զբաղվել, բայց չի կարելի մի երկու-երեք տարի անընդհատ համագործակցել մի ուժի հետ, այնուհետեւ, երբ մի փոքրիկ հարցում տեսակետները սկսեն չհամընկնել, քարկոծել: Ես սրա վրա ուշադրություն եմ դարձնում, որովհետեւ սա մեր քաղաքական դաշտում դառնում է գործելաոճ, որը ճիշտ չէ: Սա շատ վատ տենդենց է, որը կարծես թե արմատանում է մեր քաղաքական դաշտում: Դաշնակցությունը միշտ խոսել է սահմանադրական բարեփոխումների մասին, այդ մասին խոսել են նաեւ այլ քաղաքական ուժեր` մինչեւ 2012 թվականի ընտրությունները: Այնուհետեւ, չգիտես ինչու, մոռացել են կամ ուզում են մոռանալ: Բայց մեր հիշողությունը վատ չէ, ու կարող ենք հիշեցնել իրենց տեսակետները, խոսքերը, որոնք արտահայտել են նախկինում: Ամեն դեպքում, երբ սահմանադրական բարեփոխումների հայեցակարգը պատրաստ լինի, այն կներկայացվի հանրության դատին ու այդ ժամանակ ավելի առարկայական կխոսենք, թե ինչ պատճառաբանությամբ են դեմ:
Իսկ թե ՀՅԴ-ն կարող է վերադառնալ ՙքառյակ՚, թե` ոչ, սա էլ այն քաղաքական հնարքներից է, որ ինչ-որ գործընթացներ են ուզում զարգացնել եւ ինչ-որ ենթադրյալ գործընթացներ խափանել կամ հերոսանալ:
- Ըստ Ձեզ, իշխանության եւ Դաշնակցության համագործակցությունը հնարավո±ր է բերի նոր կոալիցիայի կազմավորման:
- Դժվարանում եմ ասել, որովհետեւ կոալիցիա կազմավորելը ինքնանպատակ չէ: Դաշնակցության հետ մենք ունեցել ենք կոալիցիոն կառավարում, բայց տեսակետների տարանջատման արդյունքում` հայ-թուրքայան արձանագրությունների հետ կապված, իրենք կոալիցիայից դուրս եկան: Ընտրություններից առաջ դուրս եկավ նաեւ ԲՀԿ-ն, ապա ՙՕրինաց երկիրը՚...
Իհարկեª կարող են տեսակետները չհամընկնել եւ դուրս գալ, այնպես չէ, որ կոալիցիաները ձեւավորվում են ինչ-որ ցանկությունների հիման վրա: Բոլոր քաղաքական ուժերը ազատ են ե°ւ կոալիցա կազմելու, ե°ւ կոալիցիայից դուրս գալու հարցում: Եվ պետք չէ ստիպողաբար բերել ու ասելª կոալիցիա կնքեք:

ՙԻՆՁ ՀԱՄԱՐ ԶԱՎԵՇՏԱԼԻ Է ԵՎ ԱՆՀԱՍԿԱՆԱԼԻ, ՈՐ ԱՍՈՒՄ ԵՆ` ՍԱՀՄԱՆԱԴՐԱԿԱՆ ԲԱՐԵՓՈԽՈՒՄՆԵՐԻ ՊԱՀԸ ՉԷ՚

-Ոչ իշխանական ՙեռյակը՚ ասում է, որ սահմանադրական բարեփոխոմներին բոլորովին էլ դեմ չեն, պարզապես հարմար ժամանակ չի ընտրված դրա համար: Սա արդեն աթոռակռվի չի± նմանվում:
- Իրենք ասում են` պահը չէ, մենք էլ ասում ենքª պահն է: Բայց սահմանադրական բարեփոխումների միակ կրողը եւ որոշողը, թե պահն է, կամ պահը չէ, ժողովուրդն է: Երբ ժողովուրդը կգնա, կասի` ոչ, չենք ուզում, հետեւաբար կստացվի, որ պահը չէր: Իսկ եթե կասի` այո, ուզում ենք, հետեւաբար դա էլ կլինի քննարկման առարկա: Բայց քանի դեռ մենք չունենք այդ հայեցակարգը, ինձ համար զավեշտալի է եւ անհասկանալի, որ հայտնում են, թե դեռ սահմանադրական բարեփոխումների պահը չէ: Ինչի± պահը չէ, մենք գիտե±նք ինչ փոփոխություններ է նախատեսված, որ ասում ենք պահը չէ: Իսկ եթե մենք չգիտենք, ենթադրենք այս ներկապնակում ինչպիսի գույներ կան, ինչպե±ս կարող ենք որոշել, թե որ գույնն է ավելի վառ ու սիրուն: Հետեւաբար, եթե շեշտադրումը քաղաքական է, մենք էլ ասում ենք, որ դրա ճիշտ ժամանակն է:

ՀՐԱՆՏ ՍԱՐԱՖՅԱՆ