ԱԶԱՏԱՄԱՐՏԻԿԻ ԸՆՏԱՆԻՔԸ ՀԱՅՏՆՎԵԼ Է ՓՈՂՈՑՈՒՄ. «ՊԱԼԱՏԿԱ ԵՄ ԽՓԵԼՈՒ ՈՒ ՆՍՏԵՄ»

ԱԶԱՏԱՄԱՐՏԻԿԻ ԸՆՏԱՆԻՔԸ ՀԱՅՏՆՎԵԼ Է ՓՈՂՈՑՈՒՄ. «ՊԱԼԱՏԿԱ ԵՄ ԽՓԵԼՈՒ ՈՒ ՆՍՏԵՄ»

«Իրավունքը» ազատամարտիկ Վարդան Դարբազյանի ընտանիքի խնդրին անդրադարձել էր օգոստոսի 8-ի, 18-ի,20-ի հրապարակումներում:  Խնդիրը վերաբերում էր Մադոյան փողոցի 24 տանը, որը կռվախնձոր էր դարձել Դարբազյանների ու նրանց դրկից Սարգսյանների միջեւ:

Հիշեցնենք՝ամեն ինչ սկսվել է 1988 թ-ին, երբ Դարբազյանները գնել են Մադոյան փողոցի 24 տունը  մայր ու որդի Արմենուհի և  Անդրանիկ Սարգսյաններից՝ իրենց հարևանից, նրան վճարելով 12.000 ռուբլի, սակայն այդ գումարի դիմաց որևէ փաստաթուղթ չեն վերցրել: Հետագայում Սարգսյանների ժառանգ Մելինե Սարգսյանը չեղյալ է համարել հարեւանների այդ գործարքը եւ պահաջել ազատել բնակարանը: Գործը հասել է դատական ատյաններին, մասնավորապես Շենգավիթ վարչական շրջանի ընդհանուր իրավասության դատարանը օգոստոսի 4-ին, մերժել է  Վարդուհի Գևորգյանի հայցը, որով պահանջել էր Մադոյան փողոցի 24 տան և տնամերձ հողի նկատմամբ իր ընտանիքի կողմից փաստացի զբաղեցրած մասը ճանաչել որպես իր սեփականություն, իսկ նվիրատվության պայմանագիրը եւ այլ անձի՝ Մ. Սարգսյանի անվամբ սեփականության իրավունքի գրանցումը ճանաչել անվավեր:

Այսօր «Իրավունքը» Վարդուհի Գեւորգյանից  տեղեկացավ, որ Դարբազյանների ընտանիքին սեպտեմբերի 12-ին ԴԱՀԿ-ի միջոցով վտարել են: «Մինչեւ դատի ավարտը մնալու ենք մորս տանը, իսկ դրանից հետո՝էս ձմռան շեմին, փողոցում»,- հուզված ասաց  ազատամարտիկի կինը:

Ըստ նրա՝ հակառակորդ կողմը «լավ թիկունքի» շնորհիվ կարողացավ իրենց ձեռքից բնակարանը խլել:

Առաջին ատյանի որոշումը տիկին Վարդուհին իր փաստաբանի հետ բողոքարկել է վերաքննիչ դատարանում:  «Հույս ունեմ, որ գոնե վերաքննիչը արդար որոշում կկայացնի, թե չէ պետք է Հանրապետության հրապարակում պալատկա խփեմ ու  մեջը նստեմ»,- արցունքոտված  ասաց  Վ. Գեւորգյանը:

Վերաքննիչ դատարանում  սույն գործով առաջին դատական նիստն արդեն եղել է: Երկրորդը կլինի հոկտեմբերի 9-ին:

Սոնա Դավթյան