«ՊԵՏՔ Է ՄՏԱԾԵԼ ՍԻՐԻԱՀԱՅԵՐԻՆ ՀԱՅԱՍՏԱՆՈՒՄ ՏԵՂԱՎՈՐԵԼՈՒ ԵՎ ՆՐԱՆՑ ԱՊԱԳԱՅԻ ԽՆԴԻՐՆԵՐԸ ԼՈՒԾԵԼՈՒ ՄԱՍԻՆ»

«ՊԵՏՔ Է ՄՏԱԾԵԼ ՍԻՐԻԱՀԱՅԵՐԻՆ ՀԱՅԱՍՏԱՆՈՒՄ ՏԵՂԱՎՈՐԵԼՈՒ ԵՎ ՆՐԱՆՑ ԱՊԱԳԱՅԻ ԽՆԴԻՐՆԵՐԸ ԼՈՒԾԵԼՈՒ ՄԱՍԻՆ»

Եկեղեցական-ներկայացուցչական 5-րդ ժողովին, որը տեղի է ունեցել ընդգրկուն կազմով` 164 հոգի, քննարկվել է Հայոց Ցեղասպանության 100-րդ տարելիցի միջոցառումների հարցը: Նախատեսված է իրականացնել 18 միջոցառում, որոնցից երկուսը՝ Մյուռոնօրհնեքը եւ Ցեղասպանության զոհերի սրբադասումը, ընդգրկված են պետական միջոցառումների ցանկում: Այս մասին այսօր կայացած մամլո ասուլիսի ժամանակ նշեց Տ. ԱՐՇԱԿ եպիսկոպոս ԽԱՉԱՏՐՅԱՆԸ եւ հավելեց. «Նախատեսված է նաեւ Ամենայն հայոց կաթողիկոսի մասնակցությամբ միջեկեղեցական միջոցառումներ կազմակերպել հայաշատ կենտրոններում՝ Վաշինգտոն, Թավրիզ, Մոսկվա, ինչպես նաեւ քույր եկեղեցիների հոգեւոր կենտրոններում՝ Վրաստան, Քենթբերի եւ այլն»: Անդրադառնալով ժողովին ընդունված կանոնադրությանը Արշակ Սրբազանը նկատեց. «Իրապես այն կարելի է կարեւոր համարել: Նախատեսված է այն գումարել երկու տարին մեկ անգամ: Ժողովն արդեն դարձել է համաեկեղեցական ինստիտուտ»: Մամուլում տարածված այն կարծիքը, թե սեպտեմբերի 21-ին Դեյր Զորի Սուրբ Նահատակաց եկեղեցու պայթեցումը մեծապես կապված էր Արամ Ա կաթողիկոսի հայտարարության հետ, ըստ որի, Սիսի կաթողիկոսարանը պետք է վերականգնել, Տ. Արշակ եպիսկոպոս Խաչատրյանը  խուսանավեց գնահատականներ հնչեցնել` մասնավորապես նշելով. «Ես չեմ ուզում վերադառնալ այդ մեկնաբանություններին, բայց հստակ է, որ այն ուղղված է ոչ միայն եկեղեցու` որպես պատմամշակութային եւ պաշտամունքային հուշարձանի, այլ ընդհանրապես ցեղասպանության` մեր ժողովրդի ընկալումների ու մեր ժողովրդի սպասելիքների հետ: Ինչ վերաբերում է Սիսի կաթողիկոսարանին, մենք սա դիտարկում ենք նույն պահանջատիրական ձգտումների համատեքստում եւ կարծում ենք, որ Մայր Աթոռը պետք է ամեն կերպ աջակցի այդ գործընթացին»: Բանախոսը խոսեց նաեւ սիրիահայության այսօրվա խնդիրների մասին եւ կոչ արեց. «Պետք է մտածել սիրիահայերին Հայաստանում տեղավորելու եւ նրանց ապագայի խնդիրները լուծելու մասին»:

ՀՐԱՆՏ ՍԱՐԱՖՅԱՆ