ԲՈԼՈՐ ՌՈՒՍ ՊԱՇՏՈՆՅԱՆԵՐԸ ՕՊՈԶԻՑԻԱՅԻ ԱՉՔԻՆ ԿԻՍԵԼՅՈՎ ԵՆ ԵՐԵՎՈՒՄ

ԲՈԼՈՐ ՌՈՒՍ ՊԱՇՏՈՆՅԱՆԵՐԸ ՕՊՈԶԻՑԻԱՅԻ ԱՉՔԻՆ

ԿԻՍԵԼՅՈՎ ԵՆ ԵՐԵՎՈՒՄ

ՌԴ նախագահի միջազգային եւ մշակութային համագործակցության գծով հատուկ ներկայացուցիչ Միխայիլ Շվիդկոյը երեկ  Ռուսաստանի եւ Հայաստանի բարեկամական խորհրդարանական ակումբի հյուրն էր: Թեպետ ռուս պաշտոնյան մի քանի անգամ ՀՀ ԱԺ պատգամավորներին տեղեկացրեց, որ ՌԴ նախագահի խորհրդականը չէ ու ինքը մշակութային գործիչ է, սակայն այդպես էլ չկարողացավ շրջանցել քաղաքական հարցերը: Մ. Շվիդկոյն իր ելույթում նշեց. «Վստահ եմ, որ Հայաստանը Ռուսաստանի հետ ունի ընդհանուր մի շարք ծրագրեր` կրթության, զենքի, տնտեսության հետ կապված, բայց առաջին հերթին` տնտեսական: Այսօր, որպեսզի բիզնեսով զբաղվես Ռուսաստանի հետ, պետք է առաջին հերթին ռուսերեն իմանաս, ոչ թե` անգլերեն: Երբ դու քո գործընկերոջ լեզվով ես խոսում, դա վստահություն է առաջացնում նրա մոտ»:

Սա բոլորովին դուր չեկավ ԱԺ «Ժառանգություն» խմբակցության պատգամավոր ԹԵՎԱՆ ՊՈՂՈՍՅԱՆԻՆ. «Ձեր խոսքից հասկացա, որ Կիսելյովից հետո դուք ռուսական soft power-ի հաջորդ ներկայացուցիչն եք: Բայց հավանաբար նա ավելի խիստ «զենքով» էր եկել: Նորից շեշտը դնում եք լեզվի վրա: Բայց ֆիզիկա սովորելու համար հայը պետք է հայերենով սովորի, որպեսզի գյուտի հեղինակ դառնա: Դրեք այդ բոլոր հարցերը հավասար հարթության վրա»: Ապա մտերմաբար հավելեց. «Դուք Վլադիմիր Պուտինի հետ բավական սերտ կապեր ունեք, խորհուրդ տվեք նրան` կամ ատոմային զենք վաճառել ե՛ւ Հայաստանին, ե՛ւ Ադրբեջանին, կամ էլ օրենք ընդունեք, որ սանկցիաներ կկիրառեք այն երկրների վրա, որոնք զենք կվաճառեն Հարավային Կովկասում: Համոզված եմ, որ Ռուսաստանը կարող է դա անել»: Ի վերջո, որքան էլ սադրիչ էին պատգամավորների հնչեցրած հարցերը, սակայն Մ. Շվիդկոյը, ով հայտնի է հայ-ադրբեջանական կոնֆլիկտի հաշտեցման գործում մեծ ներդրում ունենալու համար, խուսափեց շատ հարցերի պատասխանից, մասնավորապես կես կատակ-կես լուրջ նշելով, որ իր որդու կինը ադրբեջանահայ ծագում ունի, հետեւաբար իր համար դժվար է արձագանքել նման հարցերին:

ՀՐԱՆՏ ՍԱՐԱՖՅԱՆ