ՀԱՅՐԵՆԻՔԸ, ՀՀ ՔԱՂԱՔԱՑԻ ԼԻՆԵԼԸ ԽԱՂ ՈՒ ՊԱՐ ՉԵՆ

ՀԱՅՐԵՆԻՔԸ, ՀՀ ՔԱՂԱՔԱՑԻ ԼԻՆԵԼԸ ԽԱՂ ՈՒ ՊԱՐ ՉԵՆ

Կարծես նորաձեւ է դարձել, որ հանրության` իրեն ՙհարգող՚ ամեն մի հայտնի դեմք  այս կամ այն պետական կառույցի հետ խնդրի առաջ բախվելով` իր ՙհարցերը՚ լուծում է համացանցում` գրառման միջոցով: Սա դեռ ոչինչ, բայց երբ այդ գրառումը վարկաբեկում է հայրենիքն ու ասում, որ երկիրը երկիր չէ, ու որ այստեղից փախչել է պետք` փորձելով սեփական մաղձը թոթափել, դա արդեն անընդունելի է: Բայց սպասե°ք. ավելի անընդունելի ու ահավոր իրավիճակ է լինում, երբ որոշ ժամանակ անց գրառման հեղինակ հայտնի անձնավորությունը սթափվելուց հետո մեղանչում է ու ասում, որ երկիրը լավ էլ երկիր է: Այնինչ չեն գիտակցում, որ իրենց այդ չմտածված քայլով արդեն հարստացրած են լինում թշնամու ինֆորմացիոն աղբյուրն ու մեկ անգամ եւս ուրախության առիթ տալիս նրանց: Բայց սա արդեն առանձին թեմա է:
Ամիսներ առաջ հոլիվուդյան մարտաֆիլմից դուրս եկած տղայի պահվածքով սեփական մոտոցիկլով քաղաքի կենտրոնում արկածների ժամանակ մարմնական վնասվածքներ ստանալուց հետո հիվանդանոցում հայտնված դերասան ՍԵՊՈՒՀ ԱՊԻԿՅԱՆՆ իր ֆեյսբուքյան էջում գրել էր. ՙԱյսօր վերջնականապես հիասթափվեցի եւ էլ ինձ չեմ համարում Հայաստանի քաղաքացի: Հայաստանն այլեւս չեմ ուզում համարել իմ հայրենիքը... Անչափ ՙցնցված՚ եւ ՙհիացած՚ մեծն Ճանապարհային ոստիկանության` ՙփոսի գայի՚ մականվամբ, վերաբերմունքից եւ աշխատանքից՚,- ինչ է թե մեծն դերասանին իր արկածների համար տուգանել են 200 հազար դրամի չափով:
Այնուամենայնիվ, ամիսներ անց` երեկ, ՙՓոփ արտ՚ հաղորդման շրջանակներում դերասանն ասաց, որ զղջում է իր գրառման համար եւ չի հրաժարվում Հայաստանի քաղաքացիությունից: Նա պարզաբանեց, որ գրառումն արել է ազդեցության տակ. ՙԱյդ գրառումը, գուցե շատերը չեն հավատա, բայց իրոք եղել է ոչ սթափ վիճակում: Այսինքն` ուժեղ դեղերի ու ՙնարկոզի՚ ազդեցության տակ: Հիմա ես նման բան չէի անի: Գուցե ինչ-որ բան գրեի, բայց երբ հիմա վերլուծում եմ ու հետ եմ նայում... գժեր կան, որ արթնանում են, հետո են հասկանում, թե ինչ են արել. ինձ մոտ նման վիճակ է եղել՚: Ապա ավելացնում է. ՙԾանր պոռթկման տակ գրեցի... Ես հասկացա, որ մեղավոր եմ, մեղավորությունն իմն է, ընդունել եմ դա: Ինչ որ եղել է, պոռթկման տակ է եղել: Այսպես ասած սառը գլխով դա ես հաստատ չէի անի՚:
Իսկ հայրենիքը լքելու մասին դերասանն ահա թե ինչ ասաց. ՙԵթե ես հայրենիքը լքող լինեի, վաղուց էի լքել ու հիմա այստեղ չէի լինի, բայց հիմա այստեղ եմ: Բազմիցս ասել եմ, որ ինձ ամենաամուրն եմ զգում իմ հողի վրա եւ 2 ոտքով ամուր կանգնած եմ իմ հողի վրա: Ես ոչ թե ուզում եմ արդարանալ, այլ իրոք այդպես է: Այո, ես չեմ հերքում, որ խախտումներ եմ արել, այո, իմ մեղավորությունն է` եղել եմ ոչ սթափ վիճակում՚:
Ինչ խոսք, հասկանալի է դերասանի պոռթկումը, գուցե յուրաքանչյուրիս հետ էլ, Աստված մի արասցե, նման դժբախտ իրավիճակ կարող է պատահել, բայց մի բան հստակ է` հայրենիքը, ու ՀՀ քաղաքացի լինելը խաղ ու պար չեն, որ պարբերաբար ՙաշխարհից խռովելու՚ դեպքում հրաժարվես ու ամիսներ անց կրկին մեղա գաս` ՙանառակ որդու՚ պես տուն վերադառնաս` հասկանալով, որ քո հայրենի հողի վրա ավելի ամուր ես:

Կույտը մշակեց ԼԻԼԻԹ ԵՂԻԱԶԱՐՅԱՆԸ