ՍԼՈՎԱԿ ԱՐՏԻՍՏՆԵՐԸ ՈԳԵՇՆՉՎԱԾ ԷԻՆ ՄԱՅՐ ՏԱՃԱՐԻՑ

ՍԼՈՎԱԿ ԱՐՏԻՍՏՆԵՐԸ ՈԳԵՇՆՉՎԱԾ ԷԻՆ ՄԱՅՐ ՏԱՃԱՐԻՑ

Ալեքսանդր Սպենդիարյանի անվան օպերայի եւ բալետի ազգային ակադեմիական թատրոնի 81-րդ թատերաշրջանը, որը նվիրված է Գոհար Գասպարյանի հոբելյանին, գերհագեցած ու անակնկալներով լի է լինելու: Համենայնդեպս, թատրոնի ղեկավարությունը հարուստ խաղացանկ է խոստանում` բազմաթիվ օպերային ներկայացումներով, նախատեսված են նաեւ պրեմիերաներ, որոնք հանդիսատեսի դատին կհանձնվեն մինչեւ տարեվերջ:
Բայց հայ հանդիսատեսը նաեւ արտասահմանցի օպերային խմբերի համերգները վայելելու պակաս չի ունենա: Նման համերգի մեկնարկը տրվեց օրերս Բրատիսլավայի օպերային թատրոնի մեներգիչների հայաստանյան մենահամերգով` «Սլովակիայի օպերային աստղերը Հայաստանում» խորագրով:

ՀԱՅ ՀԱՆԴԻՍԱՏԵՍԻՆ ՍԼՈՎԱԿ ԱՐՏԻՍՏՆԵՐԸ ԱՅԴՔԱՆ ԷԼ «ՉԳՐԱՎԵՑԻՆ»

Մարտինա Մասարկովան (սոպրանո), Թերեզա Կրուզլիակովան (մեցցո-սոպրանո), Պավոլ Բրեսլիկին (տենոր) եւ Ռոբերտ Պեչանեցը (դաշնամուր) հայ հանդիսատեսին համերգի ընթացքում ներկայացրին Ալեքսանդր Ալաբեւի, Ջոակինո Ռոսսինիի, Գայետանո Դոնիցետտիի,  Ջուզեպպե Վերդիի, Ֆրանչեսկո Չիլեայի ստեղծագործությունները:

Մեներգիչներն առաջին անգամ էին Հայաստանում եւ առաջին անգամ ելույթ ունեցան հայ հանդիսատեսի առջեւ: Չնայած` հայ հանդիսատեսին սլովակ արտիստները այդքան էլ «չգրավեցին», քանզի նրանցից շատերը համերգի մեկնարկից րոպեներ անց լքեցին դահլիճը: Այնուամենայնիվ, ներկա հայ հանդիսատեսը ջերմորեն ընդունեց արտիստներին եւ յուրաքանչուր ելույթից հետո մինչեւ կուլիսներ ծափահարություններով ուղեկցեցին նրանց: Համերգի երկու բաժիններում էլ ծափահարությունները չդադարեցին:
Մինչ համերգը, սլովակ արտիստնեն այցելել էին Հայաստանի հոգեւոր կենտրոն` Էջմիածին եւ ինչպես փոխանցեցին «Իրավունքին»` մայր տաճարից եւ թանգարանից ստացած տպավորություններով շատ էին ոգեշնչվել: Արտիստները  խոստովանեցին, որ Հայաստանից ստացել են հրաշալի տպավորություններ:

«ՀԱՅԱՍՏԱՆ ԱՌԱՋԻՆ ԱՅՑԵԼՈՒԹՅՈՒՆԸ ՄԵԶ ՀԱՄԱՐ

ՅՈՒՐԱՀԱՏՈՒԿ ՓՈՐՁՈՒԹՅՈՒՆ ԷՐ»

Համերգից առաջ «Իրավունքի» հետ զրույցում մեներգիչները կիսվելով իրենց տպավորություններով` նշեցին. «Մենք չգիտեինք, թե որտեղ ենք գալիս, այդ պատճառով էլ, Հայաստան առաջին այցելությունը մեզ համար յուրահատուկ փորձություն էր: Տպավորված եմ մարդկանց վերաբերմունքից: Հայ ընկերներ ընդհանրապես չենք ունեցել: Դեռ չենք հասցրել ծանոթանալ հայ օպերային երգիչների հետ: Սակայն, հուսով եմ` այդ բացը կլրացնենք»,- նշեց ՊԱՎՈԼ ԲՐԵՍԼԻԿԸ:

ԴԵՄ ՉԷԻՆ ՄՆԱԼ ՆԱԵՎ ՀԱՅԱՍՏԱՆՈՒՄ

Աշխարհի տասնյակ հեղինակավոր օպերային թատրոնների բեմերում հանդես եկած սլովակ արտիստները դեմ չէին մնալ նաեւ Հայաստանում: Կես կատակ-կես լուրջ ասում էին, թե Երեւանում կմնան եւ կերգեն օպերային թատրոնում: Համերգին լավ էին տրամադրված, քանի որ կարողացել էին Սլովակիայից Հայաստան գալ ու երգել հայ հանդիսատեսի համար: Իսկ թե հատկապես որ երկրի հանդիսատեսն է նրանց դուր եկել` արտիստները դժվարացան նշել, քանի որ ամենաշատը հանդիսատեսի մեջ գնահատում են նրանց սերը դեպի երաժշտությունը:
Հայաստանյան այս ելույթն այն եզակի համերգներից մեկն է, երբ բոլոր չորս արտիստները հանդես են գալիս միասին. «Ֆրանսիայում ու եվրոպական մի քանի երկրներում ենք հանդես եկել միասին: Սակայն, առանձին-առանձին շատ բեմերում ենք եղել, բայց Հայաստանն այն երկրներից է, որտեղ մենք չորսով միասին նույն բեմից կներկայանանք հանդիսատեսին»,-շեշտեց ՌՈԲԵՐՏ ՊԵՉԱՆԵՑԸ:
Արտիստները համերգից առաջ եւս մեկ օր ունեին Հայաստանով հմայվելու եւ մի քանի ժամ` հայ հանդիսատեսին իրենց երգը մատուցելու համար: Թե երբ կրկին Հայաստան կվերադառնան, իրենք էլ չգիտեին, կարեւորը` իրենց հետ կտանեն հրաշալի տպավորություններ եւ հիշողություններ:

ԶՎԱՐԹ ԽԱՉԱՏՐՅԱՆ